ରିପୋର୍ଟ : ବିରଞ୍ଚି ପ୍ରସାଦ ଶତପଥୀ
ଗୁଣପୁର, (୨୨/୨) : ଗ୍ରାମାଞ୍ଚଳର ବହୁବିଧ ଉନ୍ନତି ପାଇଁ ରାଜ୍ୟ ସରକାରଙ୍କ ପକ୍ଷରୁ ଆମ ଵିକାଶ କାର୍ଯ୍ୟକ୍ରମ ଆରମ୍ଭ କରାଯାଇଛି ।
ପ୍ରତ୍ୟେକ ବର୍ଷ ଏହି ଯୋଜନା ମାଧ୍ୟମରେ ୧୦୦୦ କୋଟି ଟଙ୍କାର ବ୍ୟୟ ବରାଦ ହୋଇଛି ଏଵଂ ଆଦିବାସୀ ଅଧ୍ୟୁଷିତ ଜିଲ୍ଲାରେ ଆଇ .ଟି. ଡି. ଏ ମାଧ୍ୟମରେ ଯୋଜନାର ୪୦ ଭାଗ ଅର୍ଥ ଖର୍ଚ୍ଚ କରିବାକୁ ଘୋଷଣା କରାଯାଇଛି । ଏହି ଯୋଜନା ମାଧ୍ୟମରେ ଗ୍ରାମାଞ୍ଚଳରେ ପାରିପାର୍ଶ୍ବିକ ଉନ୍ନତି ରାସ୍ତାଘାଟ, ଗମନାଗମନ , ଆଲୋକି କରଣ ଏଵଂ ଧର୍ମାନୁଷ୍ଠାନର ଉନ୍ନତି ଇତ୍ୟାଦି ବିକାଶ ମୂଳକ କାର୍ଯ୍ୟ କରାଯିବ । ଏହି ଯୋଜନାର କାର୍ଯ୍ୟକାରୀତା ଆରମ୍ଭ ତଥା ଶେଷ ପର୍ଯ୍ୟାୟ ରୂପାୟନରେ ଆର୍ଥିକ ସ୍ବଚ୍ଛଳତା ରଖିବା ଓ ରାଜ୍ୟ ସଙ୍ଗଠନ ପକ୍ଷରୁ ବିଭିନ୍ନ ପ୍ରକଳ୍ପ ଖର୍ଚ୍ଚର ଆକଳନ ସଠିକ ନିରୁପଣ କରିବା ଅଖିଳ ଭାରତ ଭ୍ରଷ୍ଟାଚାର ବିରୋଧୀ ସଙ୍ଗଠନର ମୂଳ ଲକ୍ଷ୍ୟ । ଗତ ସରକାର ଅମଳରେ ଯୋଜନା ଗୁଡିକରେ ଲୋକଙ୍କ ଭାଗିଦାରୀ ନ ରହିବାରୁ ଅଧିକାଂଶ ଅର୍ଥ ରାଜନୈତିକ ବ୍ୟକ୍ତିବିଶେଷ ଓ ସରକାରୀ କର୍ମଚାରୀଙ୍କ ମଧୁ ଚନ୍ଦ୍ରିକା ଯୋଗୁଁ ହରିଲୁଟ ହୋଇଥିଲା ।
ତେଣୁ ଏହି ସମସ୍ୟାର ଗୁରୁତ୍ୱ ଉପଲବ୍ଧି କରି ଜନସାଧାରଣଙ୍କୁ ଏହି ଯୋଜନା ସହିତ ଯୋଡିବା ପାଇଁ ସଙ୍ଗଠନର ରାଜ୍ୟ ଆବାହକ ବରିଷ୍ଠ ଆଇନଜୀବି ସୁବ୍ରତ କୁମାର ନନ୍ଦ , ରାଜ୍ୟ ସଂଯୋଜକ ସୁବାଷ ଚନ୍ଦ୍ର ପଣ୍ଡା , ରାୟଗଡ଼ା ଜିଲ୍ଲା ସଂଯୋଜକ ରାଧାକୃଷ୍ଣ ପଟ୍ଟନାୟକ , ନବରଙ୍ଗପୁର ଜିଲ୍ଲା ସଭାପତି ଇଶ୍ଵର ରାଓ , କୋରାପୁଟ ଜିଲ୍ଲା ଆବାହକ ଜି. ରାମବାବୁ , ଜୟପୁର ବ୍ଲକ ସଭାପତି ନରସିଂହ ନାୟକ , ଗୁଡ଼ାରୀ ବ୍ଲକ ଆବାହକ ଗୈାରି ଶଙ୍କର ମିଶ୍ର ପ୍ରମୁଖ ଗୁଣପୁର ପୂର୍ତ୍ତ ବିଭାଗ ଡାକବଙ୍ଗଳା ରେ ଅନୁଷ୍ଠିତ ଏକ ସାମ୍ବାଦିକ ସମ୍ମିଳନୀରେ ଜନସାଧାରଣ ଙ୍କ ସହଯୋଗ କାମନା କରିଛନ୍ତି ।
ଆମ ଗାଁ ଆମ ବିକାଶ କାର୍ଯ୍ୟକ୍ରମରେ ଜନସାଧାରଣ ଠିକଣା ଭାବରେ ସହାୟତା କରିବା ସଙ୍ଗେ ସଙ୍ଗେ ଦୁର୍ନୀତି ବିରୁଦ୍ଧରେ ସ୍ବର ଉତ୍ତୋଳନ କରିବା , ଜିଲ୍ଲା ଯୋଗାଣ ବିଭାଗ ଚରମ ଅବହେଳା ଓ ମିଲ ମାଲିକଙ୍କ ମଧୁ ଚନ୍ଦ୍ରିକା ଯୋଗୁଁ ଅଧିକାଂଶ ଚାଷୀ ଧାନ ଦେବାପରେ ମଧ୍ୟ ପ୍ରାପ୍ୟ ପାଇନାହାନ୍ତି, ତୁରନ୍ତ ଜିଲ୍ଲାପାଳ ହସ୍ତକ୍ଷେପ କରି ଏହି ସମସ୍ୟାର ସମାଧାନ କରିବାକୁ ସଙ୍ଗଠନ ପକ୍ଷରୁ ଦାବୀ କରାଯାଇଛି । ଶେଷରେ ଏତିକି କହିବୁ ଏଠି ” ପ୍ରତିଦିନ ଯୋଜନା ପ୍ରତିଦିନ ପ୍ରକଳ୍ପ ମାନେ ଯୋଜନା ପ୍ରବଳ ରୂପାୟନ ଦୁର୍ବଳ ” ।
