ଗୁଣପୁର, (୨୮/୪) : ଆପ୍ର. : ଜାମ୍ମୁ କାଶ୍ମୀର ର ପହଲଗାମ୍ ଠାରେ ଆତଙ୍କବାଦୀଙ୍କ ଗୁଳି ମାଡ଼ରେ ପ୍ରାଣ ହରାଇଥିବା ହିନ୍ଦୁ ପର୍ଯ୍ୟଟକଙ୍କ ଆତ୍ମାର ସଦଗତି କାମନା କରି ଗୁଣପୁର ଅଟୋ ଚାଳକ ସଂଘ ପକ୍ଷରୁ ଆଜି ଏକ ଶାନ୍ତିପୂର୍ଣ୍ଣ କ୍ୟାଣ୍ଡେଲ୍ ଶୋଭାଯାତ୍ରା କରାଯାଇଛି ।
ସ୍ଥାନୀୟ ନୂତନ ବସଷ୍ଟାଣ୍ଡ ଠାରୁ ଏକ ବିଶାଳ ଶୋଭାଯାତ୍ରା ବାହାରି ପୁରୁଣା ବସଷ୍ଟାଣ୍ଡ ଗାନ୍ଧୀମୂର୍ତ୍ତୀ ଠାରେ ପହଞ୍ଚିଥିଲେ । ଶୋଭାଯାତ୍ରା ବେଳେ ଭାରତମାତା କି ଜୟ, ହିନ୍ଦୁସ୍ତାନ ଜିନ୍ଦାବାଦ, ପାକିସ୍ତାନ ମୁର୍ଦାବାଦ ସ୍ଲୋଗାନରେ ଗୁଣପୁର ରାଜରାସ୍ତା ପ୍ରକମ୍ପିତ ହୋଇ ଉଠିଥିଲା । ଏଥିରୁ ଜନସାଧାରଣଙ୍କ ଆତଙ୍କବାଦ ବିରୁଦ୍ଧରେ ଆକ୍ରୋଶ ସ୍ପଷ୍ଟ ବାରି ହୋଇପଡୁଥିଲା । ସମସ୍ତେ ମାନ୍ୟବର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଆତଙ୍କବାଦ ବିରୁଦ୍ଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି ଜଣାଇଥିଲେ । ଅଟୋ ଚାଳକ ସଂଘର କର୍ମକର୍ତ୍ତାମାନେ ଆତଙ୍କବାଦୀ ଗୁଳିରେ ପ୍ରାଣ ହରାଇଥିବା ହିନ୍ଦୁମାନଙ୍କ ଆତ୍ମାର ସଦଗତି କାମନା କରିବା ସହ ପାକିସ୍ତାନ ବିରୁଦ୍ଧରେ ବର୍ଷିଥିଲେ ।
ଏହି ଶୋଭାଯାତ୍ରା ରେ ଅଟୋ ଚାଳକ ସଂଘର ସଭାପତି ଗୁପ୍ତ ପ୍ରସାଦ ବାଉରୀ, ସମ୍ପାଦକ ଅଜିତ ଶ୍ରୀରାମ, ଉପସଭାପତି ରାମଚନ୍ଦ୍ର ମହାନ୍ତି, ସୁରେଶ କୁମାର, ବସନ୍ତ ରାଓ, ବିଘ୍ନ ପାଢ଼ୀ, ଟିକି ଭାଇ, ସୁରେଶ, ବାବୁଲା ପ୍ରମୁଖ ଶତାଧିକ କର୍ମକର୍ତ୍ତା ଉପସ୍ଥିତ ରହି ଶାନ୍ତିପୂର୍ଣ୍ଣ ଭାବେ ଶୋଭାଯାତ୍ରାରେ ସାମିଲ ହୋଇଥିଲେ । ଏହି ଅବସରରେ ସ୍ବାମୀ ନିର୍ବାଣ ନନ୍ଦ ଗିରି ଉପସ୍ଥିତ ରହି ନିଜର ଅଭିଭାଷଣ ପ୍ରଦାନ କରିଥିଲେ ।
