ରିପୋର୍ଟ : ସୁଶାନ୍ତ ବେହେରା //
ହରଭଙ୍ଗା,(୩୦/୧୧) : ଓଡିଶା ପୋଲିସ ଫୁଟବଲ ଦଳର ପ୍ରାକ୍ତନ ଅନ୍ତର୍ଜାତୀୟ ଫୁଟବଲ ଖେଳାଳି, ଅନ୍ତର୍ଜାତୀୟ ଖ୍ୟାତି ସମ୍ପନ୍ନ ଖେଳାଳି ବିଶେଶ୍ବର ଭୋକ୍ତା (ନକୁଳା ବାବୁ) ଙ୍କ ଗତ କାଲି ରାତିରେ ୭୨ ବର୍ଷ ବୟସରେ ହୃଦଘାତ ରେ ମୃତ୍ୟୁ ହୋଇଯାଇଛି |
ଏହି ଅନ୍ତର୍ଜାତୀୟ ଫୁଟବଲ ଖେଳାଳି ଙ୍କ ହୃଦଘାତ ଘଟଣା ଜଣାପଡିବା ପରେ ଆଜି ସକାଳୁ ଜିଲ୍ଲା ର କୋଣ ଅନୁକୋଣ ରୁ ବହୁ ସଂଖ୍ୟାରେ ଫୁଟବଲ ପ୍ରେମୀ, ପୋଲିସ ବାହିନୀ ଓ ଆଖପାଖ ଅଞ୍ଚଳର ବହୁ ବିଶିଷ୍ଠ ବ୍ୟକ୍ତି ପୁରୁଣାକଟକ ବାସଭଵନ ରେ ପହଁଚି ଶ୍ରଦ୍ଧାଞ୍ଜଳି ଜ୍ଞାପନ ସହ ଶେଷ ଦର୍ଶନ କରିଥିଲେ | ଗତ କାଲି ତାଙ୍କର ଛାତିରେ ଯନ୍ତ୍ରଣା ହେବାରୁ ତାଙ୍କୁ ପ୍ରଥମେ ପୁରୁଣା କଟକ ଓ ପରେ କଟକ ନିଆଯାଉଥିଲା ତେବେ ବାଟରେ ତାଙ୍କର ମୃତ୍ୟୁ ହୋଇଯାଇଥିଲା | ଶ୍ରୀ ଭୋକ୍ତା ଓଡିଶା ପୋଲିସ ଫୁଟବଲ ଦଳରେ ଜଣେ ଆଗ ଧାଡ଼ିର ଖେଳାଳି ଥିଲେ |
ସେ ୮୦ ଦଶକରେ ନେପାଳ ଶ୍ରୀଲଙ୍କା ଆଦି ଦେଶ କୁ ଦଳ ପକ୍ଷରୁ ଖେଳି ବିଜୟୀ କରାଇଥିବା ସହ ଦେଶ ର ବିଭିନ୍ନ ରାଜ୍ୟ ରେ ବହୁ ମ୍ୟାଚ ଖେଳି ଓଡିଶା ର ନାଁ ରଖିଥିଲେ | ଅବସର ଗ୍ରହଣ ପରେ ମଧ୍ୟ ଫୁଟବଲ ଖେଳାଳି ଙ୍କୁ କୋଚିଂ ଦେବାସହ ଖେଳ ପ୍ରତି ଆଗ୍ରହ ବଢାଇବା ପାଇଁ ଅବିରତ ଚେଷ୍ଟା କରି ଆସୁଥିଲେ | ପୁରୁଣାକଟକ ଫୁଟବଲ ଆସୋସିଏସନ ର ଉପଦେଷ୍ଟା ଭାବେ ପ୍ରତିବର୍ଷ ଜାତୀୟ ଓ ରାଜ୍ୟ ସ୍ତରୀୟ ଟୁର୍ନାମେଣ୍ଟ ର ଆୟୋଜନ କରିଆସୁଥିଲେ | ତାଙ୍କର ବିୟୋଗରେ ଏହି ଅଞ୍ଚଳର ଜଣେ ଫୁଟବଲ କିମ୍ବଦନ୍ତୀ ପୁରୁଷକୁ ହରାଇଲା ବୋଲି ଆସୋସିଏସନ ର କର୍ମକର୍ତ୍ତା କହିଛନ୍ତି |
