( ଜିଲ୍ଲା ମଙ୍ଗଳ ଅଧିକାରୀଙ୍କୁ ଘେରିଲେ ଅଭିଭାବକ, କଠୋର କାର୍ଯ୍ୟାନୁଷ୍ଠାନ ଦାବି)
ଗୁଣପୁର : ୧୦/୩/୨୫(ଆପ୍ର): ରାୟଗଡ଼ା ଜିଲ୍ଲା ଗୁଣପୁର ତହସିଲ ଅଫିସ ନିକଟରେ ଥିବା ୧୦୦ ଶଯ୍ୟା ବିଶିଷ୍ଟ ଅନ୍ଵେଷା ଛାତ୍ରାବାସରେ ସହପାଠୀ ଛାତ୍ର ମାନେ ତିନିଜଣ ଛାତ୍ରଙ୍କୁ ମରଣାତ୍ମକ ଆକ୍ରମଣ ଘଟଣା ଏବେ ମୋବାଇଲ ରୁ ମୋବାଇଲ ଘୁରିଵା ପରେ ମଙ୍ଗଳ ବିଭାଗର ଚେତା ଫେରିଛି ।
ପୂର୍ବରୁ ଏହି ହଷ୍ଟେଲର ଛାତ୍ର ମାନେ ମୋବାଇଲ ଚୋରି ଉଦ୍ୟମ , ମଦ୍ୟପାନ କରିବା , ହଷ୍ଟେଲରେ ଗଣ୍ଡା ଗଣ୍ଡା ମୋବାଇଲ ରଖିବା , ପାନ ପୁଡିଆ ଖାଇବା ଭଳି କାର୍ଯ୍ୟରେ ଲିପ୍ତ ଥିଲେ ମଧ୍ୟ ୱ।ଡେନ , ହଷ୍ଟେଲ କର୍ତ୍ତୃପକ୍ଷ ଓ ବ୍ଲକ ମଙ୍ଗଳ ଅଧିକାରୀଙ୍କ ସଲାସୁତୁରାରେ ଏସବୁ ଚପାଇ ଦିଆଯାଉଥିଲା । ଏଭଳି ଅମାନୁଷିକ କାଣ୍ଡ ୪/୩/୨୫ ତାରିଖରେ ରାତିରେ ଘଟିଥିଵା ସତ୍ତ୍ଵେ ୮ ତାରିଖରେ ଭିଡିଓ ଭାଇରାଲ ହେବାପରେ ମଙ୍ଗଳ ବିଭାଗର ଅମଙ୍ଗଳ କାର୍ଯ୍ୟ ପଦାକୁ ଆସିଥିଲା । ଘଟଣାକୁ ଚପାଇ ରଖିବାକୁ ଚେଷ୍ଟା କରି ଆହତ ଛାତ୍ର ଅଭିଜିତ ଶଵର ,ଉଥାପା ଶଵର ଓ ପବିତ୍ର ଶଵରକୁ ଗୁଣପୁର ହସ୍ପିଟାଲରେ ପ୍ରାଥମିକ ଚିକିତ୍ସା କରି ଅଭିଭାବକ ଙ୍କୁ ଡାକି ଛାତ୍ରଙ୍କୁ ହସ୍ତାନ୍ତର କରି ଦିଆଯାଇଥିଲା । ତେବେ ମଙ୍ଗଳ ବିଭାଗର ଏପରି ଲୁଚକାଳି ଖେଳ ଭିଡିଓ ଭାଇରାଲ ହେବାପରେ ପଦାରେ ପଡ଼ିଥିଲା । ଚଳଚଞ୍ଚଳ ହୋଇଉଠିଥିଲା ମଙ୍ଗଳ ବିଭାଗ ।
ଜିଲ୍ଲା ମଙ୍ଗଳ ଅଧିକାରୀ ଅସୀମା ରାଓ ଓ ଗୁଣପୁର ଥାନା ଅଧିକାରୀ ଉତ୍ତମ କୁମାର ସାହୁ ହଷ୍ଟେଲ ଆସି ଛାତ୍ର ମାନଙ୍କୁ ପଚରାଉଚରା କରିଥିଲେ । ଭିଡିଓ ଦେଖି ଅଭିଭାବକ ମାନେ ପହଞ୍ଚି ପାଟିତୁଣ୍ଡ କରିବା ସହ ଘଟଣାରେ ସମ୍ପୃକ୍ତ ଛାତ୍ର , ୱ।ଡେନ , ସୁପରିଟେଣ୍ଟଙ୍କୁ ତୁରନ୍ତ କାର୍ଯ୍ୟରୁ ହଟାଇଵା, ହଷ୍ଟେଲରେ ସିସି କ୍ୟାମେରା ଲଗାଇବା ଓ ମାସରେ ଦୁଇଥର ମିଟିଙ୍ଗ କରିବାକୁ ଦାବୀ କରିଥିଲେ । ସମସ୍ୟାର ସମାଧାନ ନ ହେବା ପର୍ଯ୍ୟନ୍ତ ଛାତ୍ର ମାନଙ୍କୁ ହଷ୍ଟେଲକୁ ଛାଡିବେ ନାହିଁ ବୋଲି ଅଭିଭାବକମାନେ କହିଥିଲେ । ହଷ୍ଟେଲ କର୍ତ୍ତୃପକ୍ଷ ଓ ମଙ୍ଗଳ ବିଭାଗ ଦୁର୍ନୀତିରେ ଲିପ୍ତ ରହି ଏପରି ଏକ ସମ୍ବେଦନଶୀଳ ଘଟଣାକୁ ଚପାଇ ଦେବାକୁ ଚେଷ୍ଟା କରୁଥିବା ବେଳେ, ଛାତ୍ରାବାସରେ ଛାତ୍ରମାନେ କେତେ ସୁରକ୍ଷିତ ତାକୁ ନେଇ ଏବେ ପ୍ରଶ୍ନବାଚୀ ସୃଷ୍ଟି ହୋଇଛି ।
