ରାୟଗଡ଼ା, (୨୯/୪) : ଆପ୍ର. : ଅଲ୍ ଓଡିଶା ଈପିଏଫ୍ ପେନସନର୍ ଆସୋସିଏସନର ଡାକରାରେ ରାୟଗଡ଼ ଜିଲ୍ଲା ଶାଖା ତରଫରୁ ଈପିଏଫ୍ ପେନସନରସ୍ ତଥା ବରିଷ୍ଠ ନାଗରିକ ମାନେ ସ୍ଥାନୀୟ ଜିଲ୍ଲାପାଳଙ୍କ ଜରିଆରେ ପ୍ରଧାନମନ୍ତ୍ରୀଙ୍କ ଉଦ୍ଦେଶ୍ୟରେ ନିମ୍ନ ଦାବୀ ଗୁଡ଼ିକର ପୂରଣ ଲାଗି ସ୍ମାରକ ପତ୍ର ପ୍ରଦାନ କରିଛନ୍ତି।
ଦୀର୍ଘ ବର୍ଷ ଧରି ଦାବୀ ପୁରଣ ଲାଗି ଦେଶ ସାରା ବିଭିନ୍ନ ପର୍ଯ୍ୟାୟରେ ଆନ୍ଦୋଳନ କରି ଆସୁଥିଲେ ମଧ୍ୟ କେନ୍ଦ୍ର ସରକାର କୈାଣସି ଆନ୍ତରିକତା ଦେଖାଉ ନାହାନ୍ତି। ସର୍ବ ନିମ୍ନ ପେନସନ ୯୦୦୦ ଟଙ୍କାକୁ ବୃଦ୍ଧି କରିବା ସହ ମହଙ୍ଗା ଭତ୍ତା ପ୍ରଦାନ କରିବା, ମାନ୍ୟବର ସର୍ବୋଚ୍ଚ ଅଦାଲତ ନିର୍ଦ୍ଦେଶ ଆଧାରରେ ବିଭାଗୀୟ କର୍ତ୍ତୃପକ୍ଷ ବର୍ଦ୍ଧିତ ପେନସନ ପ୍ରଦାନରେ ଅହେତୁକ ବିଳମ୍ବ ପ୍ରଦର୍ଶନ କରୁଛନ୍ତି । ଦେଶରେ ୮୦ ଲକ୍ଷରୁ ଉର୍ଦ୍ଧ୍ଵ ଈପିଏଫ୍ ପେନସନର୍ ତଥା ବରିଷ୍ଠ ନାଗରିକ ମାନଙ୍କ ପ୍ରତି କେନ୍ଦ୍ର ସରକାର କ୍ରମାଗତ ଅବିଚାର-ଅବହେଳା କରି ଚାଲିଛନ୍ତି । ୨୦୧୩ ରେ ଭଗତସିଂ କୋସିଆରିଙ୍କଅଧ୍ୟକ୍ଷତାରେ ପାର୍ଲିଆମେଣ୍ଟ କମିଟି ଗଠନ କରାଯାଇଥିଲା ।
ଉକ୍ତ କମିଟି ପେନସନର ମାନଙ୍କୁ ସର୍ବ ନିମ୍ନ ମାସିକ ପେନସନ ୩୦୦୦ ଟଙ୍କାକୁ ବୃଦ୍ଧି କରିବା ପାଇଁ ସୁପାରିଶ କରିଥିଲେ। ଏପରିକି, ୨୦୧୪ ସାଧାରଣ ନିର୍ବାଚନ ପୂର୍ବରୁ ବିଜେପି ମୁଖପାତ୍ର ଶ୍ରୀ ପ୍ରକାଶ ଜାଭେଦକର୍, ବିଜେପି ସରକାର ଆସିଲେ ସର୍ବ ନିମ୍ନ ପେନସନ ୩୦୦୦ ଟଙ୍କାକୁ ବୃଦ୍ଧି କରାଯିବ ବୋଲି ଘୋଷଣା କରିଥଲେ । ପୁନଶ୍ଚ,୨୦୧୮ରେ ଭର୍ତ୍ତୃହରି ମହତାବଙ୍କ ଅଧ୍ୟକ୍ଷତାରେ ଗଠିତ କମିଟି ମଧ୍ୟ ୩୦୦୦ ଟଙ୍କାକୁ ବୃଦ୍ଧି କରିବା ପାଇଁ ସୁପାରିଶ କରିଥିଲେ ।
ତେବେ, ପରିତାପର ବିଷୟ, କେନ୍ଦ୍ର ସରକାର, ବୟସର ଅପରାହ୍ନରେ ଥିବାଈପିଏଫ୍ ପେନସନରଧାରୀଙ୍କ ପ୍ରତି ବୈମାତୃକ ମନୋଭାବ ପୋଷଣ କରିଆସୁଛନ୍ତି। ତେଣୁ, ଆମ୍ଭମାନଙ୍କ ଯୁକ୍ତି-ଯୁକ୍ତ-ନ୍ୟାୟ ସଙ୍ଗତ ଦାବୀ ପୂରଣ କରିବା ଦିଗରେ ଖିଲାପ କଲେ, ଇପିଏଫ୍ ପେନସନରସ୍ ତଥା ଅବହେଳିତ ବରିଷ୍ଠ ନାଗରିକ ମାନେ ଆଗାମୀ ଦିନରେ ଦୃଢରୁ ଦୃଢ଼ ଆନ୍ଦୋଳନ କରିବାକୁ ବାଧ୍ୟ ହେବେ ବୋଲି ଚେତାବନୀ ଦେଇଛନ୍ତି। ଆଜିର ଏହି କାର୍ଯ୍ୟକ୍ରମର, ଜିଲ୍ଲା ସଂଘର ଉପଦେଷ୍ଟା ତଥା ରାଜ୍ୟ କାର୍ଯ୍ୟକାରିଣୀ ସଭ୍ୟ ଶ୍ରୀ ଅନନ୍ତ ଚରଣ ପଣ୍ଡା, ଜିଲ୍ଲା ସଭାପତି ଶ୍ରୀ ପ୍ରଶାନ୍ତ କୁମାର ପଟ୍ଟନାୟକ ଓ ସମ୍ପାଦକ ଶ୍ରୀ ଫକୀରମୋହନ ନାୟକ ନେତୃତ୍ବ ନେଇଥିଲେ।
