ଆନନ୍ଦପୁର, (୦୯/୦୬) : ଆପ୍ର. : ଆନନ୍ଦପୁର ଉପଖଣ୍ଡ ଘସିପୁରା ଥାନା ଧକୋଠା ବଜାରରେ ଜଣେ ହୋଟେଲ ମାଲିକଙ୍କୁ ସଂଘବଦ୍ଧ ଆକ୍ରମଣ ହୋଇଥିବା ଅଭିଯୋଗ ହୋଇଛି ।
ଆକ୍ରମଣରେ ମାଲିକ ଦେବାଶିଷ ସାହାଣୀ ଆହତ ହୋଇଛନ୍ତି । ଦେବାଶିଷ ୨୦ ନମ୍ବର ଜାତୀୟ ରାଜପଥର ଧକୋଠାରେ ମଟନ ପଏଣ୍ଟ ନାମରେ ଏକ ହୋଟେଲ କରିଛନ୍ତି । ସୂଚନା ଅନୂସାରେ ଗତ ୨ ତାରିଖ ଦିନ ଧକୋଠା ନାହାଗୁଣା ଗାଁର କିଛି ଯୁବକ ହୋଟେଲରେ ଖାଇସାରିବା ପରେ ଟଙ୍କା ନଦେବାରୁ ବିବାଦ ଆରମ୍ଭ ହୋଇଥିଲା । ସମ୍ପୃକ୍ତ ଯୁବକମାନେ ହୋଟେଲରେ ହଙ୍ଗାମା କରିବାରୁ ଦେବାଶିଷ ୧୧୨କୁ ଫୋନ କରିଥିଲେ । ଘସିପୁରା ପୁଲିସ ପହଞ୍ଚି ସମ୍ପୃକ୍ତ ଯୁବକମାନଙ୍କୁ ବୁଝାସୁଝା କରି ବିଦା କରିଦେଇଥିଲା ।
ଦେବାଶିଷ ଗତକାଲି ସଂଧ୍ୟା ୭ଟା ବେଳେ ଧକୋଠା ବଜାରକୁ କିଛି ଜିନିଷ ଆଣିବାକୁ ଯାଇଥିଲେ । ଏହି ସମୟରେ ଧକୋଠାର ମୁନାପାତ୍ର, ନାହାଗୁଣାର ଲିଟୁ ପାତ୍ର, କାହ୍ନା ପାତ୍ରଙ୍କ ସମେତ ୭/୮ଜଣ ତାଙ୍କୁ ସଂଘବଦ୍ଧ ଆକ୍ରମଣ କରିଥିଲେ । ଦେବାଶିଷ ଏସମ୍ପର୍କରେ ଘସିପୁରା ଥାନାରେ ଏତଲା ଦେବାପରେ ପୋଲିସ ତଦନ୍ତ ଆରମ୍ଭ କରିଛି ।
