କାଶୀନଗର, (୦୧/୦୫) : ଆପ୍ର. : ସ୍ଥାନୀୟ ବସ୍ ଷ୍ଟାଣ୍ଡ ନିକଟରେ ଆନ୍ତର୍ଜାତିକ ଶ୍ରମିକ ଦିବସ ପାଳିତ ହୋଇଯାଇଛି ।
ଗଜପତି ଜିଲ୍ଲା ରଇତ କୁଲି ସଙ୍ଘ ସଭାପତି ଆର୍. ଲୋକନାଥମଙ୍କ ଅଧ୍ୟକ୍ଷତାରେ ଏ ଉପଲକ୍ଷେ ଆୟୋଜିତ ସମାବେଶରେ କାଶୀନଗର ନାଗରିକ ମହାସଭା ସଭାପତି ତଥା ବହୁ ଚର୍ଚ୍ଚିତ କବି ଓ ଲେଖକ ପ୍ରଶାନ୍ତ ମିଶ୍ର ମୁଖ୍ୟ ଅତିଥି ଏବଂ ଖଲାସି ସଙ୍ଘ ସଭାପତି ରମାକାନ୍ତ ପାତ୍ର ସମ୍ମାନିତ ଅତିଥି ରୂପେ ଯୋଗ ଦେଇଥିଲେ । ଅଟୋ ଚାଳକ ସଙ୍ଘ ସମେତ ଅନ୍ୟ ଅନେକ ଶ୍ରମିକ ସଂଗଠନର କର୍ମକର୍ତ୍ତା ଓ ସଦସ୍ୟ ଉପସ୍ଥିତ ଥିଲେ । ମୁଖ୍ୟ ଅତିଥି କହିଥିଲେ ଯେ, ୧୮୪୮ରେ ଜର୍ମାନ ଦାର୍ଶନିକ ମାର୍କ୍ସ ଓ ଏଞ୍ଜେଲ୍ସଙ୍କ ଦ୍ୱାରା କମ୍ୟୁନିଷ୍ଟ ମ୍ୟାନିଫେଷ୍ଟୋ ରଚିତ ହୋଇଥିଲା ଓ ସେଥିରେ ଦୁନିଆର ସମସ୍ତ ଶ୍ରମିକ ଏକ ହେବା ପାଇଁ ଆହ୍ୱାନ ଥିଲା ।
ଉକ୍ତ ଆହ୍ୱାନର ପ୍ରଭାବରେ ଆଟଲାଣ୍ଟିକ୍ ମହାସାଗର ଠାରୁ ପ୍ରଶାନ୍ତ ମହାସାଗର ଯାଏଁ ଓ ନିଉ ଇଂଲାଣ୍ଡ ଠାରୁ କାଲିଫର୍ନିଆ ଯାଏଁ ବିଭିନ୍ନ ଦେଶରେ ଶ୍ରମିକମାନେ ଏକାଠି ହୋଇ ଶୋଷଣ ଓ ଅତ୍ୟାଚାରର ପ୍ରତିବାଦ କରିଥିଲେ । ୮ ଘଣ୍ଟା କାର୍ଯ୍ୟ ଦିବସ ଦାବିରୁ ଆମେରିକାର ଚିକାଗୋ ସହରରେ ଆରମ୍ଭ ହୋଇ ଏ ଆନ୍ଦୋଳନ କ୍ରମଶଃ ପୁଞ୍ଜିବାଦ ଓ ସାମ୍ରାଜ୍ୟବାଦ ବିରୋଧରେ ସ୍ଵର ଉଠାଇଥିଲା ।
ଆଜି ବି ପୁଞ୍ଜିବାଦ ଦ୍ୱାରା କବଳିତ ପୃଥିବୀରେ ଶ୍ରମିକମାନେ ନିଜର ଦାବି ହାସଲ ଓ ଅଧିକାର ସାବ୍ୟସ୍ତ ପାଇଁ ଭାରତ ସମେତ ପୃଥିବୀର ଅନ୍ୟ ଅନେକ ଦେଶରେ ଆନ୍ଦୋଳନ କରୁଛନ୍ତି । ତେଣୁ ମେ’ ପହିଲା ଏକ ଛୁଟି ଦିନ ନୁହେ । ଏହା ଶ୍ରମିକମାନଙ୍କ ଦାବି ଅଧିକାର ସପକ୍ଷରେ ଲଢ଼ି ଶହୀଦ ହୋଇଥିବା ସଂଗ୍ରାମୀ ମାନଙ୍କୁ ମନେ ପକାଇବାର ଦିନ । ସେମାନଙ୍କ ତ୍ୟାଗ ତପସ୍ୟାରୁ ପ୍ରେରଣା ନେଇ ଆଗକୁ ବଢିବାର ସମୟ ।ସମାବେଶ ପରେ କାଶୀନଗର ଅଂଚଳର ବିଭିନ୍ନ ଶ୍ରମିକ ସଂଗଠନଗୁଡିକୁ ଏକାଠି କରି କାଶୀନଗର ୱାରକର୍ସ ୟୁନିଅନ୍ ଗଢିବା ପାଇଁ ସର୍ବସମ୍ମତି କ୍ରମେ ନିଷ୍ପତି ନିଆ ଯାଇଥିଲା ।
