ଗୁଣପୁର, (୨୨/୩) : ଆ.ପ୍ର. : ଆଜି ସହକାରୀ ଉଦ୍ୟାନ କୃଷି ନିର୍ଦ୍ଦେଶକ ଙ୍କ ସୈାଜନ୍ୟରେ ଗୁଣପୁର ବ୍ଲକ ଅନ୍ତର୍ଗତ ଚାଲକମ୍ବା ଗ୍ରାମଠାରେ ଦକ୍ଷତା ବିକାଶ ଓ ପ୍ରଶିକ୍ଷଣ ଯୋଜନା ମାଧ୍ୟମରେ ବ୍ଲକ ସ୍ତରୀୟ ଉଦ୍ୟାନ କୃଷି କର୍ମଶାଳା ଅନୁଷ୍ଠିତ ହୋଇଯାଇଛି ।
ଚାଲକମ୍ବା ଓ ଏହାର ଆଖପାଖ ଅଞ୍ଚଳର ପ୍ରାୟ ୬୦ ଜଣ ଚାଷି ଏହି କର୍ମଶାଳାରେ ଭାଗ ନେଇଥିଲେ । ଏହି କାର୍ଯ୍ୟକ୍ରମରେ ମୂଖ୍ୟ ଅତିଥି ଭାବେ ସତ୍ୟବ୍ରତ ସାହୁ ସହକାରୀ ଉଦ୍ୟାନ କୃଷି ଅଧିକାରୀ , ଗୁଣପୁର ଯୋଗଦେଇ ଫଳଚାଷ, ଫୁଲ ଚାଷ ଓ ପନିପରିବା ଚାଷ ବିଷୟରେ ଆଲୋଚନା କରିଥିଲେ । ବର୍ତ୍ତମାନର ପରିବର୍ତ୍ତିତ ଜଳବାୟୁ ରେ କିପରି ଚାଷ କଲେ ଚାଷୀ ଦୁଇ ପଇସା ଲାଭ କରିପାରିବ ସେ ସମ୍ବନ୍ଧରେ ଚାଷିମାନଙ୍କୁ ବୁଝାଇଥିଲେ । ଫଳ ଓ ପନିପରିବାରେ ଲାଗୁଥିବା ବିଭିନ୍ନ ରୋଗ ପୋକ ଓ ତାର ନିରାକରଣ ବିଷୟରେ ବିସ୍ମୃତ ଭାବରେ ଆଲୋଚନା କରିଥିଲେ । ରୋଗ ଓ ପୋକ ଲାଗିବା ପୂର୍ବରୁ କିଭଳି ଫସଲକୁ ରକ୍ଷା କରାଯାଇପାରିବ ସେ ବିଷୟରେ ଚାଷିଙ୍କୁ ବୁଝାଇଥିଲେ ।
ନିରୋଗି ବିହନ ଚୟନ ଓ ସନ୍ତୁଳିତ ଖତସାର ପ୍ରୟୋଗ କରିବାକୁ ପରାମର୍ଶ ଦେଇଥିଲେ । ଜମିର ଉର୍ବରତା ରକ୍ଷା କରିବାକୁ ହେଲେ ଜୈବିକ ଖତସାର ନିହାତି ଜରୁରୀ ବୋଲି କହିଥିଲେ । ବର୍ତ୍ତମାନର ବଜାର ଚାହିଦା ଦେଖି ନୂତନ ପ୍ରଜାତିର ଫଳ ଓ ପନିପରିବା ଚାଷ ପ୍ରତି ଗୁରୁତ୍ବ ଦେବାକୁ ଚାଷୀ ଙ୍କୁ ବୁଝାଇଥିଲେ । ସମ୍ମାନୀତ ଅତିଥି ଭାବେ ଏମ୍ ସୁଚିତ୍ରା ସହକାରୀ ଉଦ୍ୟାନ କୃଷି ଅଧିକାରୀ, ରାମନାଗୁଡା ଯୋଗଦେଇ ଉଦ୍ୟାନ କୃଷି କ୍ଷେତ୍ରରେ ସରକାରଙ୍କ ବିଭିନ୍ନ ଯୋଜନା ସମ୍ପର୍କରେ ଆଲୋକପାତ କରିଥିଲେ । ପରିଶେଷରେ ଚାଷିମାନେ ଉଦ୍ୟାନ କୃଷି ସମ୍ପର୍କରେ ବିଭିନ୍ନ ପ୍ରଶ୍ନ ପଚାରିଥିଲେ ଓ ଉପସ୍ଥିତ ଅତିଥିମାନେ ତାର ଉତ୍ତର ଦେଇଥିଲେ । ଆଜିର ଏହି କାର୍ଯ୍ୟକ୍ରମକୁ ଉଦ୍ୟାନ କୃଷି କର୍ମଚାରୀ ଵି . ଶ୍ରୀନିବାସ ରାଓ ସଫଳତାର ସହିତ ପରିଚାଳନା କରିଥିଲେ ।
