ରିପୋର୍ଟ : ଓଡିଶା ନ୍ୟୁଜ ୨୪ ବ୍ୟୁରୋ //
ବୌଦ୍ଧ , (୦୫/୦୩) : ଯୁଆଡେ ଦେଖୁଲେ ଲାଲ ରଙ୍ଗରେ ରଙ୍ଗିନ୍ ହୋଇଛି ପଳାଶ ଫୁଲ । ଗାଁ ହିଡ ଅବା ଗାଁ ମୁଣ୍ଡ ଜଙ୍ଗଲ ଅବା ପୋଖରି ତୁଠ ସବୁଠି ଏବେ ପଳାଶ ଫୁଲର ଗାଲିଚା ।
ଋତୁରାଜ୍ ବସନ୍ତର ଆଗମନରେ ଚାରିଆଡେ ବେଶ୍ ଶୋଭା ପାଉଛି ପଳାଶ ଫୁଲ । ପଳାଶ ଫୁଲ ରଂଙ୍ଗିନ୍ ରଂଙ୍ଗରେ ଧରାପୃଷ୍ଠରେ ଭରିଦେଇଛି ସୌନ୍ଦର୍ଯ୍ୟ । ଥିରିଥିରି ପବନର ସ୍ପର୍ଶରେ ଉତଫୁଲିତ ହୋଇ ଉଠୁଛି ପଳାଶ ଫୁଲ । ଚାରିଆଡେ କୋଇଲିର କୁହୁ କୁହୁ ଶବ୍ଦ ସାଙ୍ଗକୁ ମନ ମତାଣିଆ ସ୍ବର ସୃଷ୍ଟି କରୁଛି ଅପୂର୍ବ ମୁଛାନାଁ । କ୍ଲାନ୍ତ କୃଷକଟିଏ ହେଉ ଅବା ତୃଷାର୍ଥ ପଥକଟିଏ ହେଉ ପଳାଶ ଫୁଲକୁ ଦେଖୁ ଦେଖୁ କ୍ଷଣିକ ପାଇଁ ଭୁଲିଯାଏ ସବୁ ଦୁଃଖ ଓ କଷ୍ଟ । ଭରିଦିଏ ମନରେ ଅସୁମାରି ଆନନ୍ଦ ।
ଲାଲ ବର୍ଣ୍ଣର ଏହି ପଳାଶ ଫୁଲ ବୌଦ୍ଧ ଜିଲ୍ଲାର ବିଭନ୍ନ ଗାଁର, ନଦୀ ନାଳ, ରାସ୍ତା କଡ଼ରେ ଗୁଡିକରେ ଦେଖବାକୁ ମିଳୁଛି ଅପୂର୍ବ ସୌନ୍ଦର୍ଯ୍ୟ ର ମନରୋମ ଦୃଶ୍ୟ । ଖାଲି ସେତିକି ନୁହେଁ ପ୍ରକୃତି ସହିତ ପରିବେଶର ଏହି ପରିପୂରକ ପଳାଶ ଫୁଲର ଅପୂର୍ବ ମନୋରମ ଦୃଶ୍ୟକୁ ଦେଖି କବି ଓ ଭାବୁକ ହେଉଛନ୍ତି ଆନମନା । ବେଳେ ବେଳେ ସାଧାରଣ ମଣିଷଟିଏ ପ୍ରକୃତିର ଏପରି ଅପରୂପ ସୌନ୍ଦର୍ଯ୍ୟକୁ ଦେଖି କବି ହୋଇଯାଏ । ବସନ୍ତରୁତୁର ଶୋଭାମୟ ପରିବେଶକୁ ବିମୋହିତ କରିଦେଇଛି ପଳାଶ ଫୁଲ । ସୁପ୍ରଭାତର ସୁନେଲି କିରଣରେ ଆଲୋକିତ ହୋଇଯାଏ ପଳାଶ ଫୁଲ ।
ଦୁରରୁ ଦେଖାଯାଏ ଲାଲର ଚାଦର ଭଳି । ଆକାଶର ଖଣ୍ଡଖଣ୍ଡ ଭସା ବାଦଲ ଓ ପୃଥିବୀର ଲାଲ ଚିକ୍ ମିକ୍ କରୁଥିବା ପଳାଶ ଫୁଲ ସତେ ଯେମିତି ପରସ୍ପରକୁ ଚାହିଁ ରହିଛନ୍ତି ଚାତକ ପରି । ଚାରିଆଡ଼େ ଏବେ ଖୁସିର ଆସର । ଆଉ ଚୈତ୍ର ମାସର ମା’ ମଙ୍ଗଳାଙ୍କ ପୂଜାରେ ଓ ଦାଣ୍ଡ ଯାତ୍ରାରେ ପଳାଶ ଫୁଲର ବ୍ୟବହାର କରାଯାଇଥାଏ । ସେହିପରି ପଳାଶ ଫୁଲର ରହିଛି ଅନେକ ଔଷଧୀୟ ଗୁଣ । ପ୍ରକୃତିର ଏହି ମନୋରମ ଅପୂର୍ବ ଦୃଶ୍ୟ ସବୁଜିମା କୋଳରେ ବେଶ୍ ଶୋଭା ପାଉଛି । ପ୍ରକୃତି ଓ ପରିବେଶ ଓ ସାହିତ୍ୟ ସହିତ ପଲାଶ ଫୁଲ ଅଙ୍ଗାଙ୍ଗୀ ଭାବେ ଜଡ଼ିତ ହୋଇ ରହିଛି । ପଲାଶ ଫୁଲର ବାସ୍ନା ନ ଥିଲେ ବି ଏହାର ସୌନ୍ଦର୍ଯ୍ୟ ସମସ୍ତଙ୍କୁ କରିଥାଏ ଆନମନା ।
