ଅନୁଗୁଳ /କଣିଁହା, (୦୬/୦୪) : ଆପ୍ର. : ଅନୁଗୁଳ କଣିଁହା ବ୍ଳକ ଗହମ ଗାଁରେ ଭୟଙ୍କର ରୂପ ନେଉଛି ଝାଡ଼ାବାନ୍ତି । ୧୦୦ ରୁ ଅଧିକ ଆକ୍ରାନ୍ତ ହେଲେଣି ।
୨୦ ଅଧିକ ଲୋକ ବିଭିନ୍ନ ସରକାରୀ ଓ ବେସରକାରୀ ହସ୍ପିଟାଲରେ ଭର୍ତ୍ତି ହୋଇଛନ୍ତି। ଗତ ଗୁରୁବାର ଠାରୁ ଗାଁ’ରେ ଝାଡା ବାନ୍ତି ଆରମ୍ଭ ହୋଇଥିଲା। ଆକ୍ରାନ୍ତଙ୍କ ସଂଖ୍ୟା ବଢିବାରେ ଲାଗିଛି । ଜିଲ୍ଲା ସ୍ଵାସ୍ଥ୍ୟକେନ୍ଦ୍ର ଅନୁଗୁଳରୁ ଏକ ଟିମ୍ ଆସି ଗାଁର ସ୍ଥିତି ଅନୁଧ୍ୟାନ କରିବା ସହ ଆକ୍ରାନ୍ତଙ୍କୁ ORS ଏବଂ ଔଷଧ ବଣ୍ଟନ ବ୍ୟବସ୍ଥା କରିଥିଲେ । ପାଣିର ନମୁନା ସଂଗ୍ରହ କରିଥିଲେ। ଗ୍ରାମବାସୀ ଙ୍କ ଅଭିଯୋଗ ଅନୁଯାୟୀ ନଦୀର ଦୂଷିତ ପାଣିକୁ ପାନୀୟ ଓ ଅନ୍ୟାନ୍ୟ କାର୍ଯ୍ୟରେ ବ୍ୟବହାର କରିବା ଫଳରେ ଗାଁ’ରେ ଝାଡା ବାନ୍ତି ବ୍ୟାପୁଛି ।
ନଦୀ ପାଣିକୁ ପାଇପ ଯୋଗେ ସିଧା ସଳଖ କୌଣସି ପ୍ରକ୍ରିୟାକରଣ ନକରି ପିଇବା ପାଇଁ ଯୋଗାଇବା ଫଳରେ ଏଭଳି ସ୍ଥିତି ଉପୁଜିଥିବା ଗ୍ରାମବାସୀ ଅଭିଯୋଗ କରିଛନ୍ତି। ସ୍ବାସ୍ଥ୍ୟ ବିଭାଗ ମଧ୍ୟ ଦୂଷିତ ପାଣି ଯୋଗୁଁ ଝାଡ଼ାବାନ୍ତି ବ୍ୟାପିଥିବା ସ୍ବୀକାର କରିଛି। ଅନ୍ୟପଟେ ପାନୀୟ ଜଳ ଯୋଗାଣ ଅଧିକାରୀ କହିଛନ୍ତି, ପାଣିର ଟେଷ୍ଟ ରିପୋର୍ଟ ଆସିବା ସଂକ୍ରମଣ ର କାରଣ ସ୍ପଷ୍ଟ ହୋଇଯିବ। ସଂକ୍ରମଣ ରୋକିବା ପାଇଁ ଯାହା ଯାହା ସାବଧାନତା ଅବଲମ୍ବନ କରିବା କଥା, ଆମ ତରଫରୁ କରାଯାଉଛି ।
