ରିପୋର୍ଟ : ଭଗବାନ ମହାନ୍ତି
ମୁରିବାହାଲ, (୦୫/୦୮) : କଣ୍ଟାବାଞ୍ଜି ନିର୍ବାଚନ ମଣ୍ଡଳୀର ବିଧାୟକ ଲକ୍ଷ୍ମଣ ବାଗଙ୍କ ଦ୍ଵାରା ଆଜି ସୋମବାର ମୁରିବାହାଲ ସଦର ମହକୁମାରେ ନବନିର୍ମିତ ଦୁଇଟି ମନ୍ଦିରରେ ଅମୃତ ଧାରା ଉଦଘାଟିତ ହୋଇଥିବା ବେଳେ ସ୍ଥାନୀୟ ଖଜୁରୀ ବନ୍ଧରେ ନିର୍ମିତ ଭଗବାନ ଶିବ ଓ ବୃଷଭଙ୍କ ପ୍ରତିମୂର୍ତ୍ତି ଉନ୍ମୋଚିତ ହୋଇଯାଇଛି ।
ବିଧାୟକ ଶ୍ରୀ ବାଗ ମୁଖ୍ୟ ଅତିଥି ରୂପେ ଯୋଗଦେଇ ପ୍ରଥମେ ଘଣ୍ଟବାହାଲ ହନୁମାନ ମନ୍ଦିରକୁ ପହଞ୍ଚି ନବନିର୍ମିତ ଅମୃତ ଧାରାକୁ ଉଦଘାଟନ କରିଥିଲେ । ଏଠାରୁ ମନ୍ଦିରର ଶ୍ରଦ୍ଧାଳୁ ଓ ଗ୍ରାମବାସୀଙ୍କ ପାଇଁ ସ୍ବଚ୍ଛ ଓ ଥଣ୍ଡା ପିଇବା ପାଣିର ବ୍ୟବସ୍ଥା କରାଯାଇଛି । ଏହାପରେ ବିଧାୟକ ଶ୍ରୀ ବାଗ ସଦର ମହକୁମା ଖଜୁରୀ ବନ୍ଧ ମଝିରେ ନବନିର୍ମିତ ଭଗବାନ ଶିବ ଓ ବୃଷଭଙ୍କ ଭବ୍ୟ ପ୍ରତିମୂର୍ତ୍ତିକୁ ପୂଜାର୍ଚ୍ଚନା ପରେ ଉନ୍ମୋଚିତ କରିଥିଲେ। ଶେଷରେ ବିଧାୟକ ଶ୍ରୀ ବାଗ ସ୍ଥାନୀୟ ରାଧାକୃଷ୍ଣ ଓ ଶିବ ମନ୍ଦିର ସମ୍ମୁଖରେ ମନ୍ଦିରର ଶ୍ରଦ୍ଧାଳୁ ଓ ପଥଚାରୀଙ୍କ ପାଇଁ ନବନିର୍ମିତ ଅମୃତ ଧାରାକୁ ଉଦଘାଟନ କରିଥିଲେ ।
ମୁରିବାହାଲ ସଦର ସରପଞ୍ଚ ତଥା ବ୍ଲକ ସରପଞ୍ଚ ସଂଘ ସଭାପତି ବିଶ୍ବବିହାରୀ ଯୋଶୀଙ୍କ ସଭାପତିତ୍ବରେ ତଥା ପ୍ରତ୍ୟେକ୍ଷ ତତ୍ଵାବଧାନରେ ଅନୁଷ୍ଠିତ ହୋଇଥିବା ଏହି କାର୍ଯ୍ୟକ୍ରମଗୁଡ଼ିକରେ ବ୍ଲକ ଅଧ୍ୟକ୍ଷ ହରିବନ୍ଧୁ ମେହେର, ଉପାଧ୍ୟକ୍ଷା ଯାଜ୍ଞସେନି ହାତୀ,ସଦର ସମିତି ସଭ୍ୟ ଚକ୍ରଧର ହେର୍ଣ୍ଣା ଓ ପଞ୍ଚାୟତ ପିଇଓ ପ୍ରକାଶ ପନିକା ପ୍ରମୁଖ ସମ୍ମାନୀତ ଅତିଥି ରୂପେ ଯୋଗଦେଇଥିଲେ । ଟିକୁ ଥନାପତି ପୂଜାର୍ଚ୍ଚନା କରିଥିଲେ । ଏହି କାର୍ଯ୍ୟକ୍ରମରେ ବ୍ଲକର ବହୁ ସରପଞ୍ଚ, ପଞ୍ଚାୟତର ୱାର୍ଡସଭ୍ୟ, ଶତାଧିକ ଦଳୀୟ କର୍ମୀ,ସ୍ଵାମୀ ବିବେକାନନ୍ଦ ଯୁବକ ସଂଘର ବହୁ କର୍ମକର୍ତ୍ତାଙ୍କ ସମେତ ବହୁ ଗ୍ରାମବାସୀ ଉପସ୍ଥିତ ଥିଲେ ।
