ରିପୋର୍ଟ – ବିରଞ୍ଚି ପ୍ରସାଦ ଶତପଥୀ
ଗୁଣପୁର, (୧୭/୮/୨୪ ): ପୁରୁଷ ସହ କାନ୍ଧରେ କାନ୍ଧ ମିଳାଇ ମହିଳା ମାନେ ମଧ୍ୟ ଚୋରି କରୁଥିଵା ସମସ୍ତଙ୍କୁ ଚକିତ କରି ଦେଇଛି । ଦୀର୍ଘ ଦିନହେଲା ଗୁଡ଼ାରୀ ଓ ଗୁଣପୁର ଅଞ୍ଚଳରେ କାନ କାଟି କାନଫୁଲ ଚୋରି କରୁଥିବା ଚୋର ଦଳକୁ କାବୁ କରିବାରେ ସକ୍ଷମ ହୋଇଛି ଗୁଡ଼ାରୀ ପୋଲିସ ।
କାନ କାଟି ଅଳଙ୍କାର ଚୋରି ଘଟଣାର ପର୍ଦ୍ଦାଫାଶ, ଦୁଇ ଗିରଫ । ସେମାନେ ହେଲେ ଗୁଣପୁର ଥାନା ଅନ୍ତର୍ଗତ ଉକୁମ୍ବା ଗ୍ରାମର କ୍ରିଷ୍ଣା ସାହୁ (୨୫) ଓ ଯୁବତୀ ଜଣକ ହେଲେ ପଦ୍ମପୁର ଥାନା ଅନ୍ତର୍ଗତ ଖମ୍ବାରିଗୁଡା ଗ୍ରାମର ଲିଲି ଦୂର୍ଗା (୨୪) । ଏମାନେ ବିଭିନ୍ନ ସମୟରେ ମହିଳା ମାନଙ୍କୁ ଟାର୍ଗେଟ କରି ଜୋରଜବରଦସ୍ତ କାନଫୁଲ ସହ ଅନ୍ୟାନ୍ୟ ଗହଣା ଝାମ୍ପି ନେଉଥିଲେ । ଗତ ଜୁଲାଇ ୨୮ ତାରିଖରେ ଦୁଇ ଅଭିଯୁକ୍ତ ଗୁଣପୁର ଥାନା ଅର୍ନ୍ତଗତ ଗଇଗୁଡା ଗ୍ରାମରେ ଜଣେ ବୃଦ୍ଧା ଚାଷ ଜମିରେ କାମ କରୁଥିବା ସମୟରେ ତାଙ୍କର କାନଫୁଲ ଝାମ୍ପି ନେଇଥିଲେ । ପୁଣି ଅଗଷ୍ଟ ୧୨ ତାରିଖରେ ଡେରିଙ୍ଗାଗୁଡା ଛକ ଠାରେ ଜଣେ ବୃଦ୍ଧା ଥଣ୍ଡା ପିଉଥିବା ସମୟରେ ତାର କାନଫୁଲ ଟାଣି ନେଇଥିଲେ । ସେହିପରି ଜୁଲାଇ ୨୨ ତାରିଖରେ ଗୁଣପୁର ସହରର ଵିକ୍ରମପୁର ଛକ ଠାରେ ଜଣେ ମହିଳା କ୍ଷୀର ଧରି ଆସୁଥିବା ସମୟରେ ତାକୁ ଅଟକାଇ ତାର କାନକାଟି କାନଫୁଲ ଲୁଟି ନେଇଥିଲେ । ଏପରି ତିନୋଟି ଘଟଣାରେ ପୋଲିସ ସେମାନଙ୍କୁ ଗିରଫ କରିଥିବା ଗୁଣପୁର ଥାନା ଅଧିକାରୀ ଉତ୍ତମ କୁମାର ସାହୁ ଏକ ପ୍ରେସ ବିଜ୍ଞପ୍ତି ଜରିଆରେ ସୂଚନା ଦେଇଛନ୍ତି । ଅଭିଯୁକ୍ତ ଦ୍ଵୟଙ୍କୁ ଗିରଫ ପରେ କୋର୍ଟ ଚାଲାଣ କରାଯାଇଛି । ଅଭିଯୁକ୍ତଙ୍କ ନିକଟରୁ ୫ ଗ୍ରାମ ଓ ୨ ଗ୍ରାମ ଓଜନର ଦୁଇଟି କାନଫୁଲ , ଏକ ହଜାର ଟଙ୍କା , ଗୋଟିଏ ମୋବାଇଲ ଫୋନ ସହ ଏକ ଵାଇକ ଜବତ କରାଯାଇଛି । ଏପରି କାନ କାଟି ଚୋରି କରୁଥିବା ଚୋର ଦଳକୁ କାବୁ କରିବାରେ ସକ୍ଷମ ହୋଇଥିବା ଗୁଣପୁର ଓ ଗୁଡ଼ାରୀ ପୋଲିସର କାର୍ଯ୍ୟକୁ ଜନସାଧାରଣ ପ୍ରଶଂସା କରିଛନ୍ତି ।
