ଉଦଳା, (୦୯/୦୫) : ଆପ୍ର. : ମୟୂରଭଞ୍ଜ ଜିଲ୍ଲାରେ ଏକ ଦୁଃଖଦ ଘଟଣା ଘଟିଛି । କେନାଲ କାମ କରୁଥିବା ସମୟରେ ଜଣେ ବୃଦ୍ଧଙ୍କୁ ଟ୍ରାକ୍ଟର ଧକ୍କା ଦେଇଛି ଯାହାଫଳରେ ବୃଦ୍ଧଙ୍କ ଜୀବନ ଚାଲିଯାଇଛି ।
ଏହି ଘଟଣାଟି ଉଦଳା ଥାନା ସୀମା ଅନ୍ତର୍ଗତ ଘାଗରାଗଡ଼ି ଗାଁ’ରେ ଘଟିଛି । ମୃତକଙ୍କ ନାମ ଘାଗରାଗଡି ଗାଁର ଲାଦ୍ରା ସିଂହ ବୋଲି ଚିହ୍ନଟ କରାଯାଇଛି । ସୂଚନା ଅନୁସାରେ ଆଜି ଘାଗରାଗଡ଼ି ଗାଁରେ ଜଳସେଚନ ବିଭାଗ ଦ୍ୱାରା କେନାଲ କାମ କରାଯାଉଥିଲା । ଗାଁର ଲାଦ୍ରା ସିଂହ କିଛି ମାପ କରୁଥିଲେ, ଠିକ୍ ସେହି ସମୟରେ ପଥର ବୋଝେଇ ଟ୍ରାକ୍ଟର ପଥରଗୁଡ଼ିକୁ ଅନଲୋଡ୍ କରିବା ପାଇଁ ଘଟଣାସ୍ଥଳକୁ ଆସିଥିଲା ।
ଏହି ସମୟରେ, ଟ୍ରାକ୍ଟରଟି ଓଲଟା ଯାଉଥିବା ସମୟରେ ପ୍ରଥମେ ବୃଦ୍ଧଙ୍କୁ ଧକ୍କା ଦେଇଥିଲା ଏବଂ ପରେ ତାଙ୍କ ଉପରେ ଚଢ଼ି ଯାଇଥିଲା । ଦୁର୍ଘଟଣା ଫଳରେ, ଲାଦ୍ରାଙ୍କର ଘଟଣା ସ୍ଥଳରେ ମୃତ୍ୟୁ ହୋଇଥିଲା । ସୂଚନା ପାଇ ଉଦଳା ପୋଲିସ ଘଟଣାସ୍ଥଳରେ ପହଞ୍ଚି ମୃତକଙ୍କ ମୃତଦେହ ଜବତ କରି ତଦନ୍ତ ଆରମ୍ଭ କରିଛି । ଦୁର୍ଘଟଣା ପରେ ଟ୍ରାକ୍ଟର ଡ୍ରାଇଭର ଫେରାର୍ ହୋଇଯାଇଥିବା ବେଳେ ପୋଲିସ ଟ୍ରାକ୍ଟର କୁ ଜବତ କରିଛି । ଏହି ଘଟଣାର ଅଧିକ ତଦନ୍ତ ଜାରି ରହିଛି ।
