କାକଟପୁର, (୧୪/୦୪) : ଆପ୍ର. : ଅସ୍ତରଙ୍ଗ ସାମୁଦ୍ରିକ ଥାନାରେ କାର୍ଯ୍ୟରତ କନେଷ୍ଟବଳ ସନ୍ତୋଷ କୁମାର ସେଠୀଙ୍କ ଆତ୍ମହତ୍ୟା ।
ଗତକାଲି ରାତିରେ ନିଜ ପୈତୃକ ଘରେ ଆତ୍ମହତ୍ୟା କରିଥିବା ଅଭିଯୋଗ ହୋଇଛି । ଘର ଭିତରୁ ତାଙ୍କ ଝୁଲନ୍ତା ମୃତଦେହ ଉଦ୍ଧାର ହୋଇଛି । ବେକରେ ଶାଢ଼ୀ ବାନ୍ଧି ଫ୍ୟାନରେ ଝୁଲି ପଡ଼ିଥିଲେ । ସୂଚନା ମୁତାବକ, ଗତକାଲି ରାତିରେ ଗାଁ ନିକଟରେ ଯାତ୍ରା ଦେଖିବାକୁ ପରିବାର ସହ ଯାଇଥିଲେ ସନ୍ତୋଷ । ଯାତ୍ରା ଅଧାରୁ ଘରକୁ ଫେରି ଆସିଥିଲେ ।
ସକାଳେ ପରିବାର ଲୋକ ଫେରି ଘର ଭିତର ପଟୁ ବନ୍ଦ ଥିବା ଦେଖିବାକୁ ପାଇଥିଲେ । କବାଟ ଭାଙ୍ଗି ଘରେ ପଶିବା ପରେ ସନ୍ତୋଷଙ୍କ ମୃତଦେହ ଫ୍ୟାନରେ ଝୁଲିଥିବା ଦେଖିବାକୁ ପାଇଥିଲେ । ଅସ୍ତରଙ୍ଗ ଥାନା ପୋଲିସ ଏକ ଅପମୃତ୍ୟୁ ମାମଲା ରୁଜୁ କରି ତଦନ୍ତ ଆରମ୍ଭ କରିଛି । ତେବେ ଆତ୍ମହତ୍ୟା କାହିଁକି କଲେ ସେ ନେଇ କିଛି ସ୍ପଷ୍ଟ ହୋଇ ନାହିଁ ।
