ଗୋପାଳପୁର, (୦୫/୦୫) : ଆପ୍ର. : ଗୋଳନ୍ଥରା ଥାନା ଅନ୍ତର୍ଗତ ଭାଳିଆଗଡ଼ ୧୬ ନଂ ଜାତୀୟ ରାଜପଥରେ ଶନିବାର ବିଳମ୍ବିତ ରାତିରେ ରାସ୍ତା ପାର ହେଉଥିବା ବେଳେ ଜଣେ ଯୁବକଙ୍କୁ କାର ଧକ୍କା ଦେବା ଫଳରେ ଯୁବକଙ୍କ ମୃତ୍ୟୁ ଘଟିଥିବା ନେଇ ପୁଲିସ ପକ୍ଷରୁ ସୂଚନା ମିଳିଛି ।
ମୃତକ ଜଣଙ୍କ ହେଲେ ଭାଳିଆଗଡ ଗାଁର ଟୁକୁନା ସେଠୀ (୪୦) ବୋଲି ଜଣା ପଡିଛି। ଶନିବାର ବିଳମ୍ବିତ ରାତିରେ ଟୁକୁନା ଚାଲି ଚାଲି ନିଜ ଗ୍ରାମ ଭାଲିଆଗଡ଼କୁ ଯାଉଥିବା ବେଳେ ଜାତୀୟ ରାଜପଥରେ ଇଚ୍ଛାପୁର ପଟୁ ଏକ କାର( ଓଡି୧୦ୱାୟୀ -୦୦୨୫) ଦ୍ରୁତ ଗତିରେ ଆସି ତାଙ୍କୁ ଧକ୍କା ଦେଇଥିଲା। ଫଳରେ ଟୁକୁନା ଗୁରୁତର ଆହତ ହୋଇଥିଲେ । ସ୍ଥାନୀୟ ଲୋକେ ତାଙ୍କୁ ଉଦ୍ଧାର ପରେ ବ୍ରହ୍ମପୁର ବଡ଼ ଡାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି କରିଥିଲେ । ରବିବାର ଭୋର ସମୟରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଥିଲା । ଏ ନେଇ ମୃତ ଟୁକୁନାଙ୍କ ପତ୍ନୀ ହୀରା ସେଠୀ ଗୋଳନ୍ଥରା ଥାନାରେ ଲିଖିତ ଅଭିଯୋଗ କରିବା ପରେ ଥାନା କେସ ନଂ ୧୮୭/୨୫ରେ ଏକ ଦୁର୍ଘଟଣା ମାମଲା ରୁଜୁ ହୋଇଛି । ଦୁର୍ଘଟଣା ଘଟାଇଥିବା କାରକୁ ଜବତ ସହ ତଦନ୍ତ ଜାରି ରହିଥିବା ପୁଲିସ ସୂଚନା ଦେଇଛି ।
