ନବରଙ୍ଗପୁର, (୧୬/୦୪) : ଆପ୍ର. : କାଳ ବୈଶାଖୀ ନେଲା ଜଣକ ଜୀବନ । ଅନ୍ୟ ୪ ଜଣଙ୍କୁ ଗୁରୁତର ଅବସ୍ଥାରେ ନବରଙ୍ଗପୁର ବଡ ଡାକ୍ତରଖାନାରେ ଭର୍ତ୍ତି କରାଯାଇଛି ।
ସୂଚନା ଅନୁଯାୟୀ ନବରଙ୍ଗପୁର ଜିଲ୍ଲା ତେନ୍ତୁଳିଖୁଣ୍ଟି ବ୍ଲକ୍ ଅମଳାଭଟ୍ଟା ପଞ୍ଚାୟତ ଅନ୍ତର୍ଗତ ବାରିଗୁଡ଼ା ଗାଁ ପାଖରେ ଇଟା ଭାଟିରେ କାମ କରୁଥିବା ସମୟରେ ଏହି ଅଘଟଣ ଘଟିଛି । ଇଟାଭାଟିରେ କାମ କରୁଥିବା ୫ ଜଣ ଶ୍ରମିକ ଭାଟିରେ ପଲିଥିନ ଘୋଡାଉଥିବା ସମୟରେ ଏଭଳି ଘଟିଥିବା ଜଣାପଡିଛି । ତେବେ ଅପରାହ୍ନରେ ହଠାତ୍ କାଳବୈଶାଖୀ ହେବାରୁ ବଜ୍ରପାତରେ ସୋମନାଥ ଜାନୀ (୫୫) ଟଳି ପଡିଥିଲେ ।
ଅନ୍ୟ ୪ ଜଣ ପ୍ରବିଣ ହରିଜନ (୪୮),କେଶବ ଜାନୀ (୪୦),ସୂକ୍ଷ୍ମନ ଗୌଡ (୪୫) ଓ କମଳୁ ଜାନୀ (୪୫)ଗୁରୁତର ଆହତ ହୋଇଥିଲେ । ତେଣୁ ସେମାନଙ୍କୁ ସଙ୍ଗେ ସଙ୍ଗେ ଆମ୍ବୁଲାନ୍ସ ଯୋଗେ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ଏହି ଘଟଣା ପ୍ରସାରିତ ହେବା ପରେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି । ମୃତକଙ୍କ ପରିବାରକୁ କ୍ଷତି ପୂରଣ ଓ ଗୁରୁତର ପରିବାରକୁ ସରକାରୀ ସୁବିଧା ଯୋଗାଇ ଦେବାକୁ ସାଧାରଣରେ ଦାବି ହେଉଛି।
