କାଶୀନଗର ୨୧ / ୦୬ / ୨୫): ବିଦ୍ୟାଳୟ ମିଶ୍ରଣ ପରେ କାଶୀନଗର ଏନ୍ ଏ ସିର କେତେକ ପ୍ରାଥମିକ ଓ ଉଚ୍ଚ ପ୍ରାଥମିକ ବିଦ୍ୟାଳୟ ବଂଦ୍ ହୋଇ ଯାଇଥିଲା | ବର୍ତ୍ତମାନ ସେଗୁଡିକ କୌଣସି କାର୍ଯ୍ୟରେ ବ୍ୟବହୃତ ନ ହୋଇ ପରିତ୍ୟକ୍ତ ଅବସ୍ଥାରେ ପଡି ରହିଛି | ୧୯୬୬ ମସିହାରେ ସ୍ଥାପିତ ବ୍ଲକ୍ କଲୋନୀ ଉଚ୍ଚ ପ୍ରାଥମିକ ବିଦ୍ୟାଳୟ ରକ୍ଷଣାବେକ୍ଷଣ ଅଭାବରୁ କ୍ରମଶଃ ସୌନ୍ଦର୍ଯ୍ୟ ହରାଇ ନଷ୍ଟ ହୋଇ ଯାଉଥିବା ବେଳେ ସଚେତନ ନାଗରିକ ଏହାକୁ ନେଇ ଉଦ୍ବେଗ ପ୍ରକାଶ କରିଛନ୍ତି |
ସୂଚନା ଯୋଗ୍ୟ ଯେ , ହାରାମଣି ରାଜଗୁରୁ ପ୍ରଧାନ ଶିକ୍ଷୟିତ୍ରୀ ଥିବା ବେଳେ ଡି ପି ଇ ପି , ଏସ୍ ଏସ୍ ଏ ସହାୟତାରେ ଉକ୍ତ ବିଦ୍ୟାଳୟର ବିକାଶ ଓ ସୌନ୍ଦର୍ଯ୍ୟକରଣ ପାଇଁ ବହୁ କାର୍ଯ୍ୟ କରିଥିଲେ | ଭଲ ପାଠ ପଢ଼ା ଯାଉଥିବା ଏକ ଶିକ୍ଷାନୁଷ୍ଠାନ ରୂପେ ସେତେବେଳେ ଉକ୍ତ ବିଦ୍ୟାଳୟର ସୁଖ୍ୟାତି ବି ରହିଥିଲା | ତେଣୁ ସ୍ଥାନୀୟ ବାରାଣସୀ ସରକାରୀ ଉଚ୍ଚ ବିଦ୍ୟାଳୟ ସହ ଏହାର ମିଶ୍ରଣକୁ ସମ୍ପୃକ୍ତ ପିତା ମାତା , ଅଭିଭାବକ , ପରିଚାଳନା କମିଟି ବିରୋଧ କରିଥିଲେ | ତେବେ ପ୍ରଶାସନ ତା ଉପରେ ଗୁରୁତ୍ୱ ଦେଇ ନଥିଲା | ବର୍ତ୍ତମାନ ବ୍ଲକ୍ କଲୋନୀ ପରିସରରେ ଥିବା ଉକ୍ତ ବିଦ୍ୟାଳୟର ୩ ଦୁଇ ମହଲା ଓ ଏକାଧିକ ଏକ ମହଲା ଶ୍ରେଣୀଗୃହ କୌଣସି କାର୍ଯ୍ୟରେ ଲାଗୁନାହିଁ | ଶ୍ରେଣୀଗୃହଗୁଡିକର ବାରଣ୍ଡା ଓ ଆଖପାଖ ସ୍ଥାନରୁ ବହୁ ଖାଲି ମଦ ବୋତଲ ଉଠାଇ ଏନ୍ ଏ ସି ସଫେଇ ଦାୟିତ୍ୱରେ ଥିବା ମେନପୁଲ୍ କମ୍ପାନୀର କର୍ମଚାରୀମାନେ ଅସ୍ଥାୟୀ ଡମ୍ପିଂଗ ୟାର୍ଡ଼ରେ ଫିଙ୍ଗିଛନ୍ତି | ଗୋଟିଏ ଶ୍ରେଣୀଗୃହରେ ମିଶନ ଶକ୍ତି ପକ୍ଷରୁ ମାତ୍ର କିଛି ଦିନ ପାଇଁ ଏକ ସିଲେଇ ତାଲିମ କେନ୍ଦ୍ର ଖୋଲିଥିଲା |
ଜଣେ ରାତ୍ରି ଜଗୁଆଳ ବି ସେଥିପାଇଁ ନିଯୁକ୍ତି ପାଇଥିଲେ | କିନ୍ତୁ ହଠାତ ତାହା ବଂଦ ହୋଇଗଲା | ମିଶ୍ରଣ ପରେ ଅବ୍ୟବହୃତ ହୋଇ ପଡିଥିବା ଅନ୍ୟ ପ୍ରାଥମିକ ଓ ଉଚ୍ଚ ପ୍ରାଥମିକ ବିଦ୍ୟାଳୟଗୁଡିକର ଅବସ୍ଥା ବି ଶୋଚନୀୟ | ବୁଦ୍ଧିଜୀବୀ କରଦାତାଙ୍କ ଅର୍ଥର ଏହା ଖୋଲାଖୋଲି ଅସମ୍ମାନ ବୋଲି କହିଥିବା ବେଳେ ଏନ୍ ଏ ସି ଉଲ୍ଲେଖିତ ପରିତ୍ୟକ୍ତ ଶିକ୍ଷାନୁଷ୍ଠାନଗୁଡିକର ସଦୁପଯୋଗ ନିମନ୍ତେ ତୁରନ୍ତ ପଦକ୍ଷେପ ନେବା ଉଚିତ ବୋଲି ମତ ଦେଇଛନ୍ତି |
