ଗୁଣପୁର, (୧୮/୩) : ଆ.ପ୍ର. : ଗୁଣପୁର କୃଷି ବିଜ୍ଞାନ କେନ୍ଦ୍ର ସଭାଗୃହରେ ଜିଲ୍ଲା ସ୍ତରୀୟ କୃଷି ଉତ୍ପାଦକ ସଙ୍ଗଠନକୁ ଶକ୍ତିଶାଳୀ କରିବା ଉଦ୍ଦେଶ୍ୟରେ ଦ୍ଵିତୀୟ ଥର ପାଈଁ ବୈଠକ ଅନୁଷ୍ଠିତ ହୋଇଯାଇଛି ।
ଏହି କାର୍ଯ୍ୟକ୍ରମରେ ମୂଖ୍ୟ ଅତିଥି ଭାବେ ସନ୍ତୋଷ କୁମାର ସାମଲ ଡିଡିଏମ୍ ନାବାର୍ଡ ଯୋଗଦେଇ ତୁଳସୀରେ ଜଳଦାନ ଓ ପ୍ରଦୀପ ପ୍ରଜ୍ଜ୍ୱଳନ କରି ବୈଠକର ଶୁଭାରମ୍ଭ କରିଥିଲେ । ନାବାର୍ଡ କୃଷି ଉତ୍ପାଦକ ସଙ୍ଗଠନକୁ କିପରି ସହାୟତା କରିପାରିବ ଓ ସଙ୍ଗଠନ କିପରି ସହଜରେ ସମସ୍ତଙ୍କ ପାଖରେ ପହଞ୍ଚି ପାରିବେ ସେ ବିଷୟରେ ନିଜ ଅଭିଭାଷଣରେ କହିଥିଲେ । ସମ୍ମାନୀତ ଅତିଥି ଭାବେ ମନୋଜ କୁମାର ପାତ୍ର ଓରମାସ୍ ରାୟଗଡ଼ା ଯୋଗଦେଇ ଉତ୍ପାଦର ବଜାରିକରଣ କିପରି କରାଯିବ ଓ ଚାଷି କିପରି ଭଲ ଦୁଇ ପଇସା ପାଇପାରିବ, ବିଭିନ୍ନ ଉଦାହରଣ ମାଧ୍ୟମରେ ଵୁଝାଇଥିଲେ ଏଵଂ ଵଜାରିକରଣ ବେଳେ ଯଦି କୈାଣସି ସହଯୋଗ ଆବଶ୍ୟକ ପଡେ ତେବେ ଓରମାସ୍ ସହଯୋଗ କରିବ ବୋଲି କହିଥିଲେ ।
ଦୟାନିଧି ରାଉତ ଡିଡିଏଚ୍ ରାୟଗଡ଼ା ବିଭିନ୍ନ କର୍ମଶାଳା ଓ କ୍ଷେତ୍ର ପରିଦର୍ଶନ ମାଧ୍ୟମରେ ଉତ୍ପାଦକ ସଙ୍ଗଠନକୁ ସୁଦୃଢ କରିବାକୁ ଆହ୍ଵାନ ଦେଇଥିଲେ । ବୃନ୍ଦାବନ ବେହେରା ଏଡିଓ ଗୁଣପୁର ମୃତ୍ତିକା ପରିକ୍ଷା , ବିହନ ବିଶୋଧନ, ବିହନ ବଣ୍ଟନ ସହ ବିଭିନ୍ନ ସରକାରୀ ଯୋଜନା ଏହି ସଙ୍ଗଠନ ମାଧ୍ୟମରେ କରିବାକୁ ପ୍ରତିଶ୍ରୁତି ଦେଇଥିଲେ । ଡଃ ଆଲୋକ କୁମାର ଆଚାର୍ଯ୍ୟ ଏସ୍ ଡି ଭି ଓ ଗୁଣପୁର ଗୃହପାଳିତ ପଶୁ ପକ୍ଷୀ ପାଳନ ସହ, କୁକୁଡ଼ା ଚିଆ ଉତ୍ପାଦନ, କୁକୁଡ଼ା ଖାଦ୍ୟ ପ୍ରସ୍ତୁତି ଓ ବିଭିନ୍ନ ସରକାରୀ ଯୋଜନା ବିଷୟରେ ବୁଝାଇଥିଲେ । ସୁସ୍ମିତା ମହାନ୍ତି ବୈଜ୍ଞାନିକା ଓ ମୂଖ୍ୟ କୃଷି ବିଜ୍ଞାନ କେନ୍ଦ୍ର ଗୁଣପୁର ଯୋଗଦେଇ ଚାଷୀ ଉତ୍ପାଦକ ସଙ୍ଗଠନର କାର୍ଯ୍ୟ ଶୈଳୀ, ପରିଚାଳନା, ବ୍ୟାଙ୍କ ଲୋନ୍ ସମ୍ପର୍କରେ ଆଲୋଚନା କରିଥିଲେ । ପରେ ମଞ୍ଚାସିନ ଅତିଥି ମାନେ ଏଫ୍ ପି ଓ ପଞ୍ଜିକରଣ ଠାରୁ ଆରମ୍ଭ କରି ବୋର୍ଡ ମେମ୍ବର ଚୟନ , ବିହନ , ଔଷଧ, ସାର ଚାଷୀଙ୍କୁ ଯୋଗାଇବା ଠାରୁ ଚାଷିର ଉତ୍ପାଦିତ ସାମଗ୍ରୀର ବଜାରିକରଣ ପର୍ଯ୍ୟନ୍ତ ସମସ୍ତ ବିଷୟ ସିଇଓ, ସିଵିଵିଓର ପ୍ରତିନିଧି ଓ କୃଷି ଉତ୍ପାଦକ ସଙ୍ଗଠନର ସହାୟକ ମାନଙ୍କୁ ବୁଝାଇଥିଲେ ।
ଆଜିର ଏହି କାର୍ଯ୍ୟକ୍ରମକୁ ରାୟଗଡ଼ା ଜିଲ୍ଲାର ବିଭିନ୍ନ କୃଷି ଉତ୍ପାଦକ ସଙ୍ଗଠନର ସିଇଓ , ସିବିବିଓ , ସଙ୍ଗଠନର ସହାୟକ ମାନେ ବହୁ ମାତ୍ରାରେ ଯୋଗଦେଇଥିଲେ । ଓରମାସର ଅଧିକାରୀ କୃଷି ଉତ୍ପାଦକ ସଙ୍ଗଠନ ଦ୍ଵାରା ଚାଷି ଟିଏ କିପରି ଘରେ ବସି ରିହାତି ଦରରେ କୃଷି ଉପକରଣ ପାଇପାରିବ ଓ ଉତ୍ପାଦିତ ସାମଗ୍ରୀର ଉଚିତ ମୂଲ୍ୟ ପାଇପାରିବ ସେ ସମ୍ବନ୍ଧରେ ବୁଝାଇଥିଲେ । ସରକାରଙ୍କ ତରଫରୁ କ’ଣ ସବୁ ସହାୟତା ରହିଛି ସେ ସମ୍ପର୍କରେ ମଧ୍ୟ ଅବଗତ କରାଇଥିଲେ ।
କେଉଁ ଉପାୟ କଲେ କୃଷି ଉତ୍ପାଦକ ସଙ୍ଗଠନକୁ ଶକ୍ତିଶାଳୀ କରିହେବ ଓ ବହୁ ବର୍ଷ ଯାଏଁ ସଙ୍ଗଠନ ଚାଲିବ ସେ ଗୁରୁମନ୍ତ୍ର ମଧ୍ୟ ଅତିଥି ମାନେ କହିଥିଲେ । କୃଷି ବିଜ୍ଞାନ କେନ୍ଦ୍ରର ବୈଜ୍ଞାନିକ ରାଜୀବ ଟୁଡୁ ଅତି ସୁନ୍ଦର ଭାବେ ବୈଠକଟିକୁ ପରିଚାଳନା କରିଥିଲେ ତେବେ ଅତିଥି ମାନଙ୍କ ଗୁରୁମନ୍ତ୍ର, କୃଷି ଉତ୍ପାଦକ ସଙ୍ଗଠନକୁ କେତେ ସହାୟକ ହେଉଛି ଦେଖିବାକୁ ବାକି ରହିଲା ।
