ରିପୋର୍ଟ : ରବି ଶଙ୍କର ମହାପାତ୍ର
କୋରାପୁଟ, (୨୯/୧) : କୋଲାବ ନଗର ସରକାରୀ ଉଚ୍ଚ ବିଦ୍ୟାଳୟରେ ୨୦୦୨ ବ୍ୟାଚର ଛାତ୍ରୀଛାତ୍ରଙ୍କୁ ବିଦ୍ୟାଳୟ ତରଫରୁ ଭବ୍ୟ ସମ୍ବର୍ଦ୍ଧନା ପ୍ରଦାନ କରାଯାଇଛି ।
ଗଣତନ୍ତ୍ର ଦିବସରେ ଏହି ଛାତ୍ର ଛାତ୍ରୀମାନେ ବିଦ୍ୟାଳୟର ପ୍ରଧାନ ଶିକ୍ଷୟିତ୍ରୀ ଶ୍ଵେତା ଲୀନା ପ୍ରଧାନଙ୍କ ହାତରେ ଜାତୀୟ ପତାକା ଉନ୍ମୋଚନ କରାଇ ତାଙ୍କୁ ଏକ ସିଲ୍ଡ୍ ପ୍ରଦାନ କରିଥିଲେ ।ତା’ ପର ଦିନ ବିଦ୍ୟାଳୟର ଶିକ୍ଷକ ଶିକ୍ଷୟିତ୍ରୀ ସେମାନଙ୍କୁ ଦୁବ, ଚାଉଳ, ଚନ୍ଦନ, ସିନ୍ଦୁର ଇତ୍ୟାଦି ଦେଇ ବନ୍ଦାପନା କରି ବିଦ୍ୟାଳୟକୁ ଆହ୍ୱାନ କରିଥିଲେ । ଭଜନ ପରିବେଷଣ କରି ଏକ ଆଧ୍ୟାତ୍ମିକ ପରିବେଶ ସୃଷ୍ଟି କରା ଯାଇଥିଲା ।
ଆଦର୍ଶ ଶିକ୍ଷାର ମାନ ଉପରେ ପ୍ରଧାନ ଶିକ୍ଷୟିତ୍ରୀ ନିଜର ଅଭିଭାଷଣ ରଖିଥିବା ବେଳେ ପୂର୍ବତନ ଛାତ୍ର ତଥା ବର୍ତ୍ତମାନ NMDC ର AGM ଭାବେ କାର୍ଯ୍ୟରତ ଶ୍ରୀ କାଳୀ ପ୍ରସାଦ ଦଳେଇ ତାଙ୍କ ଜୀବନର ସଂଘର୍ଷ ଓ ସଫଳତା ସମ୍ପର୍କରେ ଉଦାହରଣ ଦେଇ ପିଲାଙ୍କୁ ପ୍ରେରଣା ଓ ଉତ୍ସାହ ପ୍ରଦାନ କରିଥିଲେ ତଥା ପ୍ରତ୍ୟେକ ଶ୍ରେଣୀର କୃତୀ ଛାତ୍ରଛାତ୍ରୀଙ୍କୁ ସିଲ୍ଡ୍ ପ୍ରଦାନ କରି ପୁରସ୍କୃତ କରିଥିଲେ । ପୁରାତନ ଛାତ୍ରଙ୍କର ଏହି ଅଭିନବ ପ୍ରୟାସକୁ ବୁଦ୍ଧିଜୀବି ମହଲରେ ପ୍ରଶଂସା କରାଯାଇଛି ।
