ବଲାଙ୍ଗୀର, (୧୭/୦୩) : ଆ.ପ୍ର. : ବଲାଙ୍ଗିର ଜିଲ୍ଲା ଯାଦବ ଭବନ ଠାରେ କୋଶଳବାଦି ନେତା ପ୍ରମୋଦ ମିଶ୍ର ଏକ ସାମ୍ବାଦିକ ସମ୍ମିଳନୀର ଆୟୋଜନ କରିଥିଲେ ।
ସମ୍ବଲପୁର ବିଧାୟକ ଜୟନାରାୟଣ ମିଶ୍ରଙ୍କ ବୟାନକୁ ନେଇ ଓଡ଼ିଶାରେ ରାଜନୈତିକ ହଟଚମଟ ସୃଷ୍ଟି ହୋଇଥିବାବେଳେ ଜୟନାରାୟଣଙ୍କ ବୟାନକୁ ସାମ୍ବାଦିକ ସମ୍ମିଳନୀରେ ସମର୍ଥନ ଜଣାଇଥିଲେ ପ୍ରମୋଦ ମିଶ୍ର । ସେ କହିଥିଲେ ଯେ ପଶ୍ଚିମ ଓଡ଼ିଶାର ଅନେକ ନେତା କୋଶଳ ଡଙ୍ଗାରେ ବସାଇ ନିର୍ବାଚନ ବୈତରଣୀ ପାର କରୁଛନ୍ତି । କିନ୍ତୁ ନିର୍ବାଚନ ସରିବା ପରେ ସେମାନେ କୋଶଳ ରାଜ୍ୟ କିମ୍ବା ଏହାର ଆନ୍ଦୋଳନ ସମ୍ପର୍କରେ ପଦେ ବି କହୁନାହାନ୍ତି । ଏହା ସେମାନଙ୍କର ଭୟ ନା ସ୍ୱାର୍ଥପରତା ତାହା ଜଣାପଡୁନାହିଁ ବୋଲି କହିଥିଲେ । କୋଶଳ ରାଜ୍ୟ ଆନ୍ଦୋଳନରୁ ଅନେକ ନେତା ତାଙ୍କର ଭବିଷ୍ୟତ ଗଠନ କରିଥିବା ବେଳେ ଏହାକୁ ଆଗକୁ ନେବାର ଆବଶ୍ୟକତା ରହିଛି ।
ତେଣୁକରି ଜୟନାରାୟଣ ମିଶ୍ର ମଧ୍ୟ ଆଗାମୀ ଦିନରେ ବିଧାନସଭା ରେ ଏହି ପ୍ରସଙ୍ଗ ଉତ୍ଥାପନ କରନ୍ତୁ ଏବଂ ପଶ୍ଚିମାଞ୍ଚଳ ର ନେତା ମାନେ ଜୟ ନାରାୟଣ ମିଶ୍ରଙ୍କ ସମର୍ଥନ ରେ ବାହାରନ୍ତୁ ବୋଲି ଦାବି କରିଥିଲେ । ଏହା ସହିତ ବନ୍ଦେ ଉତ୍କଳ ଜନନୀ କୁ ରାଷ୍ଟ୍ରୀୟ ସଙ୍ଗୀତ ର ମର୍ଯ୍ୟାଦା ଦିଆନଯାଉ ବୋଲି କହିଥିଲେ । ସାମ୍ବାଦିକ ସମ୍ମିଳନୀ ମାଧ୍ୟମରେ କୋଶଳବାଦି ନେତା ପ୍ରମୋଦ ମିଶ୍ର ଅନ୍ୟ ସମସ୍ତ ଦଳର ନେତା ମାନଙ୍କୁ ଚେତାଇ ଦେବା ସହିତ କୋଶଳ ଆନ୍ଦୋଳନରେ ସାମିଲ ହେବାକୁ ଆହ୍ବାନ କରିଥିଲେ ।
