ରିପୋର୍ଟ : ବିରଞ୍ଚି ପ୍ରସାଦ ଶତପଥୀ
ଗୁଣପୁର : ୪/୯) : ବିଦ୍ୟୁତ ବିଭାଗର ବେପରୁଆ ମନୋଭାବ ଯୋଗୁଁ ଆଜି ଅକାରଣେ ଏକ ନୀରିହ ମାଇ ହାତୀ ର ମୃତ୍ୟୁ ଘଟିଛି । ଘଟଣାଟି ଘଟିଛି ରାୟଗଡ଼ା ଜିଲ୍ଲା ଗୁଣପୁର ରେଞ୍ଜର ଫୁଲଫୁଟି ଅଞ୍ଚଳରେ ।
ସୂଚନା ମୁତାବକ କାଲି ରାତିରେ ଦୁଇଟିକିଆ ହାତୀପଲ ଫୁଲଫୁଟି ସାନନଦୀ ପୋଲ ନିକଟରେ ଖାଦ୍ୟ ଅନ୍ୱେଷଣ କରୁଥିବା ସମୟରେ ଏକ ମାଇ ହାତୀ ବିଦ୍ୟୁତ ତାର ସଂସ୍ପର୍ଶରେ ଆସିଥିବା ସନ୍ଦେହ କରାଯାଉଛି । ନିକଟରେ ବିଦ୍ୟୁତ ଖୁଣ୍ଟ ନଇଁ ରହିଥିବା ଓ ତା ନିକଟ କପା ବାଡରେ ହାତୀଟି ମରି ପଡିଥିବା, ସ୍ଥିତି ଅନୁଧ୍ୟାନ କଲେ ବିଦ୍ୟୁତ ଆଘାତରେ ହାତୀ ମରିଥିବା ସହଜରେ ଅନୁମାନ କରାଯାଇପାରେ । ସୂଚନା ମୁତାବକ ପୂର୍ବରୁ ଏ ଅଞ୍ଚଳରେ ଛଅ ଟିକିଆ ହାତୀ ପଲ ଦିର୍ଘ ବର୍ଷ ରହି ଉତ୍ପାତ ମଚାଇଥିଲେ । ପରେ ବନବିଭାଗ ହସ୍ତକ୍ଷେପ ଦ୍ଵାରା ଏହି ହାତୀପଲ ଆନ୍ଧ୍ରପ୍ରଦେଶ ଅଞ୍ଚଳକୁ ଚାଲିଯାଇଥିଲେ । ସେଠାରେ ବିଦ୍ୟୁତ ଆଘାତରେ ଗତବର୍ଷ ଚାରି ହାତୀଙ୍କ ମୃତ୍ୟୁ ପରେ ଏହି ଦୁଇଟି ହାତୀ ପୁନର୍ବାର ଏହି ଅଞ୍ଚଳକୁ ଚାଲିଆସିଥିଲେ ।
ସେବେ ଠାରୁ ଏ ଅଞ୍ଚଳରେ ରହି ଫସଲ ନଷ୍ଟ କରିବା ସହ ଘରଦ୍ଵାର ଭାଙ୍ଗୁଥିବା ଗ୍ରାମବାସୀ କହିଛନ୍ତି । ଗତ ତିନି ଦିନ ଧରି ଦୁଇଟି ହାତୀ ନିକଟବର୍ତ୍ତୀ ଗ୍ରାମକୁ ଆସି ବ୍ୟାପକ ଫସଲ ନଷ୍ଟ କରୁଥିଲେ । ରାତିରେ ପୁଣି ଫୁଲଫୁଟି ଅଞ୍ଚଳକୁ ଖାଦ୍ୟ ଅନ୍ୱେଷଣରେ ଆସି ଏଭଳି ଅଘଟଣ ଘଟିଥିବା ଗ୍ରାମବାସୀ କହିଛନ୍ତିି । ଗ୍ରାମବାସୀଙ୍କ ସୂଚନା ପରେ ବର୍ତ୍ତମାନ ଘଟଣାସ୍ଥଳରେ ବନବିଭାଗ କର୍ମଚାରୀ ପହଞ୍ଚି ସ୍ଥିତି ଅନୁଧ୍ୟାନ କରି ତଦନ୍ତ ଜାରି ରଖିଛି । ପାରିପାର୍ଶ୍ବିକ ସ୍ଥିତି ଅନୁଧ୍ୟାନ କରି ବିଦ୍ୟୁତ ସଟସର୍କିଟ ଯୋଗୁଁ ହାତୀ ଟି ମରିଥାଇପାରେ ବୋଲି ବନବିଭାଗ ଅଧିକାରୀ ଗଙ୍ଗାଧର ମିଶ୍ର ସୂଚନା ଦେଇଛନ୍ତି ।
