ରିପୋର୍ଟ : ବିରଞ୍ଚି ପ୍ରସାଦ ଶତପଥୀ
ଗୁଣପୁର, (୨୭/୫) : କଥାରେ ଅଛି ରକ୍ତଦାନ ଏକ ମହତ୍ ଦାନ । ରକ୍ତ ଅଭାବରୁ କାହାର ଯେପରି ମୃତ୍ୟୁ ନ ଘଟୁ, ତାକୁ ଦୃଷ୍ଟିରେ ରଖି ଏକ ଅଭିନବ ପ୍ରୟାସ ଆରମ୍ଭ କରିଛି ଗୁଣପୁର ଆଦର୍ଶ ଥାନା ପୋଲିସ୍ ।
ଗୁଣପୁର ଉପଖଣ୍ଡ ଚିକିତ୍ସାଳୟରେ ରହିଛି ଏକ ରକ୍ତ ଭଣ୍ଡାର, କିନ୍ତୁ ସବୁବେଳେ ଏଠାରେ ରକ୍ତର ଅଭାବ ରହୁଥିବା ଦେଖିବାକୁ ମିଳୁଛି । ଫଳରେ ଗୁଣପୁର ଏହି ରକ୍ତ ଭଣ୍ଡାର ଉପରେ ନିର୍ଭର କରୁଥିବା ରୋଗୀ ଓ ସେମନଙ୍କର ସମ୍ପର୍କୀୟ ରକ୍ତ ଅଭାବରୁ ନାନା ଅସୁବିଧାର ସମ୍ମୁଖୀନ ହେଉଛନ୍ତି । ରକ୍ତ ଅଭାବରୁ ଯେପରି କାହାର ମୃତ୍ୟୁ ନ ଘଟୁ, ଏହି ମହତ୍ତ ଉଦେଶ୍ୟ ନେଇ ଗୁଣପୁର ପୋଲିସ ପ୍ରଥମ ଥର ପାଇଁଁ ଗୁଣପୁର ଟାଉନ ହଲ୍ ଠାରେ ଆରମ୍ଭ କରିଛି ସ୍ବେଚ୍ଛାକୃତ ରକ୍ତଦାନ ଶିବିର । ଏହି ରକ୍ତଦାନ ଶିବିରକୁ ଗୁଣପୁର ଏସଡିପିଓ ଵାବୁଲି ନାୟକ ଆନୁଷ୍ଠାନିକ ଭାବେ ଉଦଘାଟନ କରିଥିଲେ ।
ଏହି ରକ୍ତଦାନ ଶିବିରରେ ଗୁଣପୁର ଉପଖଣ୍ଡ ଚିକିତ୍ସାଳୟ ରକ୍ତଭଣ୍ଡାର କର୍ମଚାରୀ ମାନେ ଉପସ୍ଥିତ ରହି ରକ୍ତ ସଂଗ୍ରହ କରିଥିଲେ । ଆଦର୍ଶ ଥାନା ଅଧିକାରୀ ଉତ୍ତମ କୁମାର ସାହୁ , ପୋଲିସ କର୍ମଚାରୀ , ସାମ୍ବାଦିକ , ସହରର ଯୁବପିଢି, ବିଭିନ୍ନ ଶିକ୍ଷାନୁଷ୍ଠାନର ଛାତ୍ର ଛାତ୍ରୀ ଏହି ସ୍ବେଚ୍ଛାକୃତ ରକ୍ତଦାନ ଶିବିରରେ ଯୋଗଦେଇ ରକ୍ତଦାନ କରିଥିଲେ । ମୋଟ ୫୦ ୟୁନିଟ ରକ୍ତ ସଂଗ୍ରହ ହୋଇଥିବା ସୂଚନା ମିଳିଛି । ଆଗାମୀ ଦିନରେ ଗୁଣପୁର ଉପଖଣ୍ଡର ବିଭିନ୍ନ ଥାନା ପକ୍ଷରୁ ଏଭଳି ସ୍ବେଚ୍ଛାକୃତ ରକ୍ତଦାନ ଶିବିରର ଆୟୋଜନ କରାଯିବ ବୋଲି ଏସଡିପିଓ ବାବୁଲି ନାୟକ ସୂଚନା ଦେଇଛନ୍ତି ।
