ରିପୋର୍ଟ : ରବି ଶଙ୍କର ମହାପାତ୍ର
ବୋରିଗୁମ୍ମା, (୦୧/୧୨) : କୋରାପୁଟ ଜିଲ୍ଲା ଗ୍ରାମ୍ୟ ଜଳ ଯୋଗାଣ ଓ ପରିମଳ ବିଭାଗରୁ ଟେଣ୍ଡର ପାଇ ଗତ ୪/୫ ବର୍ଷ ତଳୁ ଟେଣ୍ଡର ଚୁକ୍ତିନାମା କରି JMC ନାମକ କମ୍ପାନୀ ମୁରାନ୍ ଡ୍ୟାମରୁ ଜଳ ଯୋଗାଣ ପାଇଁ କାର୍ଯ୍ୟ ଆରମ୍ଭ କରିଥିଲା ।
କିନ୍ତୁ ସମୟ ଅତିକ୍ରାନ୍ତ ହୋଇ ସାରିଥିଲେ ମଧ୍ୟ ପ୍ରକଳ୍ପ କାର୍ଯ୍ୟ ଆଜି ସୁଦ୍ଧା ଶେଷ ନ କରିବା ସାଧାରଣରେ ଉଦବେଗ ପ୍ରକାଶ ପାଇଛି ।ବୋରିଗୁମ୍ମା ସହର ସମେତ ଅନେକ ଗାଆଁ ଗଣ୍ଡାରେ ପାଇପ୍ ବିଛାଇବା ପାଇଁ ରାସ୍ତା ଖୋଳି ରାସ୍ତାକୁ ପୂର୍ବ ସ୍ଥିତିକୁ ଆଣିପାରୁ ନାହାନ୍ତି JMC ର ଯନ୍ତ୍ରୀ ।JMC ଯେଉଁ ସରକାରୀ ବିଭାଗ ସହ ଚୁକ୍ତି କରି ଏହି ପ୍ରକଳ୍ପ କାର୍ଯ୍ୟ କରୁଛି, ସେହି ବିଭାଗ ଅର୍ଥାତ୍ ଗ୍ରାମ୍ୟ ଜଳ ଯୋଗାଣ ଓ ପରିମଳ ବିଭାଗ ତଥା ରାସ୍ତାର ରକ୍ଷଣା ବେକ୍ଷଣ ଦାୟିତ୍ଵରେ ଥିବା ପଞ୍ଚାୟତିରାଜ ବିଭାଗ ମଧ୍ୟ ସବୁ ଦେଖି ନିରବଦ୍ରଷ୍ଟା ସାଜିଥିବା ଅଭିଯୋଗ ହେଉଛି । ରାସ୍ତା ଖୋଳି ପାଇପ୍ ବିଛାଇବା ପରେ ରାସ୍ତାକୁ ସଂପୃକ୍ତ ଯନ୍ତ୍ରୀ ପୂର୍ବ ସ୍ଥିତିକୁ ଆଣି ପାରୁନାହାନ୍ତି ।
ଫଳରେ ୧୨ ଫୁଟ ଓ ସାରର ରାସ୍ତା ସଙ୍କୁଚିତ ହୋଇ ମାତ୍ର ୮ ଫୁଟ ଓସାରରେ ସୀମିତ ରହୁ ଥିବାରୁ ଚାରି ଚକିଆ ଯାନ ଚଳାଚଳରେ ବାଧା ସୃଷ୍ଟି ହେବା ସହ ବୋରିଗୁମ୍ମା ମହାନ୍ତି ସାହି ନିକଟସ୍ଥ ରାସ୍ତାରେ କେତେକ ବାଇକ୍ ଆରୋହୀ ଦୂର୍ଘଟଣା ଗ୍ରସ୍ତ ହୋଇ ଆଣ୍ଠୁ ଗଣ୍ଠି ଖଣ୍ଡିଆ ହୋଇଥିବା ଜଣାପଡ଼ିଛି । JMC କର୍ତ୍ତୃପକ୍ଷ ଏ ନେଇ ଗଣମାଧ୍ୟମର କୌଣସି ପ୍ରଶ୍ନର ସନ୍ତୋଷ ଜନକ ଉତ୍ତର ଦେଇ ପାରୁ ନଥିବା ବେଳେ ବୋରିଗୁମ୍ମା ସ୍ଥିତ JMC କମ୍ପାନୀ କାର୍ଯ୍ୟାଳୟର କିଛି କର୍ମଚାରୀ ” ଆମେ ଲୋକାଲ ଲୋକ” ବୋଲି କହୁଛନ୍ତି,କିନ୍ତୁ ନିଜ ନାମ ତଥା କମ୍ପାନୀରେ ତାଙ୍କର ପଦବୀର ନାମ ଗଣମାଧ୍ୟମକୁ କହିବାକୁ ଭୟ କରୁଥିବା ପରିଲକ୍ଷିତ ହେଉଛି ।ଏ ସଂକ୍ରାନ୍ତରେ ବିଧାନ ସଭାରେ ପ୍ରଶ୍ନ ହେବା ପରେ ମଧ୍ୟ କୌଣସି ପରିଣାମ ଆସି ନ ଥିବାରୁ ଜନ ସାଧାରଣ କେବଳ ନୀରବ ଦ୍ରଷ୍ଟା ସାଜିବା ଛଡା କୌଣସି ଉପାୟ ନାହିଁ ବୋଲି କେତେକ ଚର୍ଚ୍ଚା କରୁଥିବା ବେଳେ ନୂଆ ବିଜେପି ସରକାର କିଛି ପଦକ୍ଷେପ ନେବେ ବୋଲି ଆଉ କିଛି ବୁଦ୍ଧିଜୀବି ଆଶା ପୋଷଣ କରିଛନ୍ତି ।
କୋରାପୁଟ ଜିଲ୍ଲାପାଳ ଏଥିପ୍ରତି ସତର୍କ ପଦକ୍ଷେପ ନେଇ ଅନ୍ତତଃ ଜଳଯୋଗାଣ ନାମରେ ମାସ ମାସ ଧରି ଖରାପ ହୋଇ ପଡ଼ିଥିବା ରାସ୍ତାକୁ ଗମନାଗମନ ଉପଯୋଗୀ କରିବା ପାଇଁ ସଂପୃକ୍ତ ଠିକା ସଂସ୍ଥାକୁ କଡ଼ା ନିର୍ଦ୍ଦେଶ ଦେଇ ଆବଶ୍ୟକ ସ୍ଥଳେ ଦୃଢ଼ ଶୁଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସାଧାରଣରେ ଦାବୀ ହେଉଛି । କୋରାପୁଟ ଜିଲ୍ଲାପାଳ ଏଥିପ୍ରତି ଦୃଷ୍ଟି ଦିଅନ୍ତୁ ବୋଲି ସାଧାରଣରେ ଦାବୀ ଜୋର ଧରିଛି ।
