ଗୁଣୁପୁର, (୨୫/୦୩) : ଆ.ପ୍ର. : ଗତ ସାତ ଦିନ ଧରି ଚାଲିଥିବା ଜାତୀୟ ସେବା ଯୋଜନାର ଗ୍ରୀଷ୍ମ ସ୍ଵତନ୍ତ୍ର ଶିବିର ଆଜି ଉଦଯାପିତ ହୋଇଯାଇଛି ।
ସ୍ଥାନୀୟ ଜି ଆଇ ଇ ଟି ବିଶ୍ୱବିଦ୍ୟାଳୟର ଜାତୀୟ ସେବା ଯୋଜନାର ପୃଥକ ଭାବେ ଆୟୋଜିତ ହୋଇଥିବା ଦୁଇଟି ଯଥା ୟୁନିଟ୍ ୧ (ପୁରୁଷ) ପୋଷ୍ୟ ଗ୍ରାମ ରେଗଡ଼ା ପଞ୍ଚାୟତ ରେଗଡ଼ା ଗ୍ରାମ ଏବଂ ୟୁନିଟ୍ ୨ (ମହିଳା) ପୋଷ୍ୟ ଗ୍ରାମ ନରସିଂହମୁଣ୍ଡା ଗ୍ରାମରେ ଗ୍ରୀଷ୍ମ ସ୍ୱତନ୍ତ୍ର ସେବା ଶିବିର ଉଦଯାପନୀ ଉତ୍ସଵରେ ମୁଖ୍ୟ ଅତିଥି ଭାବେ ବିଶ୍ଵ ବିଦ୍ୟାଳୟର ମହାନିର୍ଦ୍ଦେଶକ ଡ଼ଃ ଜଗଦୀଶ ପଣ୍ଡା ଯୋଗ ଦେଇ ସ୍ବେଚ୍ଛାସେବୀ ମାନଙ୍କ ଏହିଭଳି ମହତ ଉଦ୍ଦେଶ୍ୟ କାଯ୍ୟକୁ ଭୂୟସୀ ପ୍ରଶଂସା କରିଥିଲେ । ଗତ ସାତ ଦିନ ଧରି ଚାଲିଥିବା ଏହି ଶିବିରର ଅନୁଭୁତି ନିଜ ଭବିଷ୍ୟତ କାର୍ଯ୍ୟପନ୍ଥାକୁ ଆଗେଇ ନେବ ବୋଲି ମତ ବ୍ୟକ୍ତ କରିଥଲେ ।
ସମ୍ମାନୀୟ ଅତିଥି ଭାବେ କୃଷି ମହାବିଦ୍ୟାଳୟର ଡିନ ଭି ଏସ୍ ଦେବଦାସ ଏବଂ ସହକାରୀ ଡିନ ଅଶୋକ କୁମାର ମିଶ୍ର ଯୋଗ ଦେଇ ସେବା ଯୋଜନାର ମୁଖ୍ୟ ଲକ୍ଷ୍ୟ ଓ ଛାତ୍ରଛାତ୍ରୀ ମାନଙ୍କ ଭୂମିକା ବିଷୟରେ କହିଥିଲେ । ୟୁନିଟ ୧ର କାର୍ଯ୍ୟକ୍ରମ ଅଧିକାରୀ ପ୍ରଫେସର ବାଣୀ ପ୍ରସାଦ ନାୟକ ସ୍ଵାଗତ ଭାଷଣ ଦେବା ସହ ସାତ ଦିନରେ ହୋଇଥିବା କାର୍ଯକ୍ରମ ବିଷୟରେ ସୂଚନା ପ୍ରଦାନ କରିଥିଲେ । ପରିଶେଷରେ ୟୁନିଟ୍ ୨(ମହିଳା) ବିଭାଗର କାର୍ଯ୍ୟକ୍ରମ ଅଧିକାରୀ ଘନିଷ୍ଟା ପୃଷ୍ଟି ଧନ୍ୟବାଦ୍ ଅର୍ପଣ କରିଥିଲେ ।
ଏଥିରେ ଅଧ୍ୟାପକ ଡ଼ଃ ପ୍ରେମାନସୁ ଶେଖର ରଥ, ପ୍ରମୋଦ ରଞ୍ଜନ ପଣ୍ଡା, ଗୋପାଳ କୃଷ୍ଣ ମହନ୍ତ, ନିତିଶ କୁମାର, ଧୂମେଶ ମେହେର, କ୍ରୀଡା ଅଧିକାରୀ ରବୀନ୍ଦ୍ର କୁମାର୍ ପଣ୍ଡା, ଅଧ୍ୟାପିକା ପ୍ରିୟଙ୍କା ପାତ୍ର, ସୁଚରିତା କୃପାଳିନି, ନିର୍ମଳା ପଟେଲ, ଜୟନ୍ତୀ ଡାଙ୍ଗ , ନିହାରକା ପଟେଲ, ସିପ୍ରା ମଣ୍ଡଳ, ରେଣୁକା ଶବର ପ୍ରମୁଖ ଉପସ୍ଥିତ ଥିଲେ । ପ୍ରତ୍ୟେକ ଶିବିରରେ ୫୦ ଜଣ ସ୍ବେଚ୍ଛାସେବୀ ଭାଗ ନେଉଥିବା ବେଳେ ସମସ୍ତ ସ୍ବେଚ୍ଛାସେବୀ ମାନଙ୍କୁ ମାନପତ୍ର ଅତିଥିଙ୍କ ଦ୍ଵାରା ପ୍ରଦାନ କରାଯାଇଥିଲା ।
