ରିପୋର୍ଟ : ଓଡିଶା ନ୍ୟୁଜ ୨୪ ବ୍ୟୁରୋ //
କଟକ, (୧୫/୦୨) : ଆଉ ସପ୍ତାହ ପରେ ଦେଇଥାନ୍ତେ ମାଟ୍ରିକ ପରୀକ୍ଷା । ହେଲେ ତା’ ଆଗରୁ ଜୀବନ ହାରିଲେ ଛାତ୍ରୀ । କଟକରେ ଜୀବନ ହାରିଛନ୍ତି ଦଶମ ଶ୍ରେଣୀ ସରକାରୀ ସ୍କୁଲ୍ ଛାତ୍ରୀ ।
ମୃତ୍ୟୁର କାରଣ ଏବେ ବି ଅସ୍ପଷ୍ଟ ରହିଛି । ଢେଙ୍କାନାଳ ଜିଲ୍ଲା ଆମ୍ବପଡ଼ା କରମୂଳ ପଞ୍ଚାୟତର ଜୈନିକ ଦଶମ ଶ୍ରେଣୀ ଛାତ୍ରୀ କଟକର ଏକ ସରକାରୀ ହଷ୍ଟେଲରେ ଆତ୍ମହତ୍ୟା କରିଛନ୍ତି । ସୂଚନା ଅନୁଯାୟୀ ଛାତ୍ରୀ ଜଣକ ଦୀର୍ଘ ଦୁଇ ବର୍ଷ ହେବ ଉକ୍ତ ସରକାରୀ ସ୍କୁଲ୍ ରେ ଅଧ୍ୟୟନ କରିବା ସହ ସରକାରୀ ହଷ୍ଟେଲରେ ରହି ମାଟ୍ରିକ ପରୀକ୍ଷା ପାଇଁ ପଢ଼ୁଥିଲେ ପାଠ । ଛାତ୍ରୀ ଜଣକ ମଧ୍ୟ ନିଜ ମା’ ଙ୍କ ସହ ଫୋନ୍ କଲ୍ ରେ କଥା ହୋଇଥିଲେ । ହେଲେ ସକାଳୁ ପରିବାର ଖବର ପାଇଲେ ଝିଅ ଆଉ ନାହିଁ ।
ଏନେଇ ଲାଲବାଗ ଥାନାରେ ଏତଲା ଦେବାପରେ କଟକ ବଡ଼ ଡ଼ାକ୍ତରଖାନାରେ ଶବ ବ୍ୟବଚ୍ଛେଦ ହୋଇଛି । ତେବେ ପରିବାର ଲୋକେ ଝିଅର ମୃତ୍ୟୁ ପାଇଁ ୱାର୍ଡେନ୍ ଦାୟୀ ବୋଲି ଅଭିଯୋଗ କରିଛନ୍ତି । ପୂର୍ବରୁ ମଧ୍ୟ ଏହି ୱାର୍ଡେନ୍ ଜଣଙ୍କ ଛାତ୍ରୀଙ୍କୁ ମାନସିକ ଯନ୍ତ୍ରଣା ଦେଉଥିଲେ ବୋଲି ଛାତ୍ରୀଙ୍କ ଦାଦା ଅଭିଯୋଗ କରିଛନ୍ତି ।
