ରିପୋର୍ଟ : ଭଗବାନ ମହାନ୍ତି
ମୁରିବାହାଲ, (୦୬/୦୮) : ମୁରିବାହାଲ ଥାନା ଗୋଇମୁଣ୍ଡ ଗ୍ରାମର ଜଣେ ଜେଲ ଫେରନ୍ତା ଅଭିଯୁକ୍ତଙ୍କ ଅନୁପସ୍ଥିତିରେ ତାଙ୍କ ଘର ଭଙ୍ଗାରୁଜା ସହ ଲୁଟପାଟ ଅଭିଯୋଗରେ ଗ୍ରାମର ୩ ଜଣ ବିଦେଶୀ ବାଗ(୫୮), ଢ଼କର ବାଗ(୨୮) ଓ ଜୟସିଂହ ବାଗ (୨୬)ଙ୍କୁ ପୁଲିସ ଗିରଫ କରି କୋର୍ଟ ଚାଲାଣ କରିଥିବା ଜଣାପଡିଛି ।
ଗୋଇମୁଣ୍ଡ ଗ୍ରାମର ଜେଲଫେରନ୍ତା ରାଜୁ ବାଗ(୪୫) ଓ ତାଙ୍କ ପତ୍ନୀ ଶଙ୍ଖା ବାଗ(୪୦)ଗ୍ରାମର ଗୌରୀ ବାଗ(୪୩)ନାମକ ଜଣେ ବିଧବା ମହିଳାଙ୍କୁ ଅସଦାଚରଣ ପରେ ଧାରୁଆ ଅସ୍ତ୍ରରେ ମରଣାନ୍ତକ ଆକ୍ରମଣ କରିଥିବା ଅଭିଯୋଗରେ ଥାନା କେଶ ନ ୨୪୧/୨୩ରେ ଉଭୟ ଗତ ୦୪/୧୦/୨୩ରେ ଜେଲ ଯାଇଥିଲେ। ସ୍ୱାମୀସ୍ତ୍ରୀ ଦୀର୍ଘ ୯ମାସରୁ ଅଧିକ ସମୟ ଜେଲରେ ରହିବା ପରେ ଜେଲରୁ ବାହାରିଥିଲେ।ସେମାନେ ଘରକୁ ଫେରିବା ପରେ ତାଙ୍କ ଘର ସବୁ ଭଙ୍ଗାରୁଜା ସହ ଲୁଟପାଟ କରାଯାଇ ବହୁ ଜିନିଷପତ୍ର ଚୋରୀ ହୋଇଥିବା ଦେଖିବାକୁ ପାଇଥିଲେ । ଜେଲ ଫେରନ୍ତା ରାଜୁ ଏ ସମ୍ପର୍କରେ ଗ୍ରାମର ୧୫ରୁ ଉର୍ଦ୍ଧ୍ବ ବ୍ୟକ୍ତିଙ୍କ ବିରୁଦ୍ଧରେ ଥାନାରେ ଲିଖିତ ଅଭିଯୋଗ କରିଥିଲେ ।
ପୁଲିସ ଥାନା କେସ ନ ୨୩୧/୨୪ ରୁଜ୍ଜୁ କରି ସବଇନସ୍ପେକ୍ଟର ପ୍ରମୋଦ କୁମାର ପଧାନ ଘଟଣାର ଅଧିକ ତଦନ୍ତ ଜାରି ରଖିଥିଲେ। ପୂର୍ବ ଶତ୍ରୁତାରୁ ଜେଲ ଫେରନ୍ତାଙ୍କ ଘର ଭଙ୍ଗାରୁଜା ସହ ଲୁଟପାଟ ଅଭିଯୋଗରେ ଗୋଇମୁଣ୍ଡ ଗ୍ରାମର ୩ଜଣଙ୍କୁ ଗିରଫ କରି କୋର୍ଟ ଚାଲାଣ କରାଯାଇଥିବା ବେଳେ ଜାମିନ ଆବେଦନ ଖାରଜ ହେବାରୁ ସମସ୍ତଙ୍କୁ ଜେଲ ହାଜତକୁ ପଠାଇ ଦିଆଯାଇଛି ଓ ଫେରାର ଅନ୍ୟମାନଙ୍କ ବିରୁଦ୍ଧରେ ତଦନ୍ତ ଜାରି ରହିଛି ବୋଲି ଥାନା ଆଇଆଇସି ସିପୋରା ସରାୟ ଲୁଗୁନ ପ୍ରକାଶ କରିଛନ୍ତି ।
