ରିପୋର୍ଟ : ଓଡିଶା ନ୍ୟୁଜ ୨୪ ବ୍ୟୁରୋ //
କେନ୍ଦୁଝର, (୩୧/୦୫) : ଟ୍ରକ୍ ଭିତରୁ ଡ୍ରାଇଭରଙ୍କ ମୃତଦେହ ଉଦ୍ଧାର । ଘଟଣାଟି ଘଟିଛି କେନ୍ଦୁଝର ଜିଲ୍ଲା ରୁଗୁଡ଼ି ଥାନା ବାରବାଙ୍କ ଘାଟି ରାସ୍ତାରୁ । ମୃତକ ହେଲେ ସୁରେନ୍ଦ୍ର ଚୌଧୁରୀ ।
ତାଙ୍କ ଘର ହେଉଛି ଝାଡ଼ଖଣ୍ଡ ଚତ୍ରା ଅଞ୍ଚଳରରେ । ଡ୍ରାଇଭର ସୁରେନ୍ଦ୍ର ଚୌଧୁରୀ ଯୋଡ଼ା ଅଞ୍ଚଳର ସୁନୀତା ଦେବୀଙ୍କ ଟ୍ରକରେ ଡ୍ରାଇଭର ଭାବରେ କାମ କରୁଥିଲେ । ଗୁରୁବାର (ଗତକାଲି) ସେ ଜିଲିଂ ଖଣିରୁ ଲୁହାପଥର ବୋଝେଇ କରି ରାଉରକେଲା ଅଭିମୁଖେ ଯାଉଥିଲେ । ତେବେ ଗନ୍ତବ୍ୟ ସ୍ଥଳକୁ ଯିବା ବେଳେ ବାରବାଙ୍କ ଘାଟିରେ ଡ୍ରାଇଭର ସୁରେନ୍ଦ୍ରରଙ୍କ ଆକସ୍ମିକ ମୃତ୍ୟୁ ଘଟିଥିବା ସନ୍ଦେହ କରାଯାଉଛି । ଟ୍ରକଟି ରାସ୍ତା କଡ଼ରେ ଛିଡ଼ା ହୋଇଥିବା ବେଳେ ଷ୍ଟିୟରିଂ ଉପରେ ସେ ପଡ଼ିଥିବା ଦେଖିଥିଲେ ସ୍ଥାନୀୟ ଲୋକେ ।
ଏନେଇ ରୁଗୁଡ଼ି ଥାନା ପୁଲିସକୁ ଖବର ଦେଇଥିଲେ । ପୁଲିସ ଖବର ପାଇ ଘଟଣା ସ୍ଥଳରେ ପହଞ୍ଚି ଟ୍ରକରୁ ମୃତଦେହକୁ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇଛି । କେମିତି ଓ କେଉଁ ପରିସ୍ଥିତିରେ ସୁରେନ୍ଦ୍ରଙ୍କର ମୃତ୍ୟୁ ହେଲା ? ତାହା ବ୍ୟବଚ୍ଛେଦ ରିପୋର୍ଟ ଆସିଲା ପରେ ଜଣାପଡ଼ିବ ବୋଲି ପୁଲିସ ସୂଚନା ଦେଇଛି ।
