ରିପୋର୍ଟ : ପ୍ରଣତି ସାବତ
କାଶୀନଗର, (୨୦/୦୨) : ଅଭାବୀ ଧାନ ବିକ୍ରିର ସମ୍ମୁଖୀନ ହୋଇଥିବା କାଶୀନଗର ଅଂଚଳର ଚାଷୀମାନେ ଗୁରୁବାର ଦିନ ସ୍ଥାନୀୟ ତହସିଲଦାରଙ୍କ ଜରିଆରେ ଗଜପତି ଜିଲ୍ଲାପାଳଙ୍କୁ ଏକ ଦାବିପତ୍ର ଦେଇଛନ୍ତି ।
୧୨ ଦଫା ସମ୍ବଳିତ ଉକ୍ତ ଦାବିପତ୍ରରେ ରବିବାର ଭିତରେ ଚାଷୀଙ୍କ ଧାନ କିଣିବା ପାଇଁ ଜରୁରୀ ପଦକ୍ଷେପ ନେବା, ମିଲରମାନେ ଗନି ବ୍ୟାଗ ଓ ମଣ୍ଡିରୁ ମିଲକୁ ଧାନ ନେବା ସକାଶେ ପରିବହନ ଖର୍ଚ୍ଚ ଯୋଗାଇବା , କାଶୀନଗର ଅଂଚଳରେ ଥିବା ମିଲ୍ ଗୁଡିକ ପ୍ରଥମେ ସ୍ଥାନୀୟ ଚାଷୀଙ୍କ ଧାନ କିଣିବା, ଶୋଷଣ ଓ ଠକେଇର ପ୍ରତୀକ କଟନି ଛଟନି ରୋକିବା ପାଇଁ ଦୃଢ ପଦକ୍ଷେପ ନେବା , ଆବଶ୍ୟକୀୟ ପରିମାଣର ଧାନ ବିକ୍ରି ପାଇଁ ଚାଷୀଙ୍କୁ ଟୋକେନ ଦେବାର ବ୍ୟବସ୍ଥା କରିବା ଓ ତଦନୁଯାୟୀ ଧାନ କିଣିବା, କାଶୀନଗର ଏନ୍ ଏ ସି ଓ କାଶୀନଗର ବ୍ଲକ୍ ର ବିଭିନ୍ନ ପଂଚାୟତରେ ଉତ୍ପାଦିତ ଧାନ ଓ ଅନ୍ୟାନ୍ୟ ଶସ୍ୟ ରଖିବା ପାଇଁ ଗୋଦାମ ବ୍ୟବସ୍ଥା କରିବା, ଚାଷୀମାନେ ନିରୁପାୟ ହୋଇ ଆତ୍ମଘାତୀ ପଦକ୍ଷେପ ନେବାର ସମ୍ଭାବନା ଥିବାରୁ ଶୀଘ୍ର ସେମାନଙ୍କ ଦାବି ପୂରଣ କରିବା, ଅଦିନିଆ ବର୍ଷାରେ କ୍ଷତିଗ୍ରସ୍ତ ହୋଇ ଯେଉଁ ଚାଷୀମାନଙ୍କ ଧାନ ଏଫ୍ ଏ କ୍ୟୁ ଗୁଣବତ୍ତା ହରାଇଛି ଓ ବିକ୍ରି ହୋଇ ପାରିବାର ସମ୍ଭାବନା ନାହିଁ, ସେହି ଚାଷୀମାନଙ୍କୁ କ୍ଷତିପୂରଣ ଦେବା , ଭାଗଚାଷୀଙ୍କ ସମସ୍ୟାର ସମାଧାନ କରିବା ପ୍ରଭୃତି ଦାବି ରହିଛି ।
ପ୍ରକାଶ ଯୋଗ୍ୟ ଯେ , ବୁଧବାର ଦିନ ଚାଷୀମାନେ ସ୍ଥାନୀୟ ତହସିଲ କାର୍ଯ୍ୟାଳୟ ଆଗରେ ଅନିର୍ଦ୍ଦିଷ୍ଟ କାଳ ଧାରଣାରେ ବସିବା ପାଇଁ ସମବେତ ହୋଇଥିଲେ । ତେବେ ଚାଷୀମାନଙ୍କ ପ୍ରତିନିଧି ଭାବେ କାଶୀନଗର ନାଗରିକ ମହାସଭା ସଭାପତି ପ୍ରଶାନ୍ତ ମିଶ୍ର ଆଇ ଆଇ ସି ସୁନୀଲ କୁମାର ବେହେରାଙ୍କ ଉପସ୍ଥିତିରେ ତହସିଲଦାର ଓ ସିଭିଲ ସପ୍ଲାଇ ଇନ୍ସପେକ୍ଟରଙ୍କ ସହ ଆଲୋଚନା କରିବା ପରେ ଧାରଣା ପ୍ରତ୍ୟାହୃତ ହୋଇଥିଲା । ଆଲୋଚନା ଅବସରରେ ତହସିଲଦାର ସୁଧୀର କୁମାର ନନ୍ଦ କହିଥିଲେ ଯେ , ତାଙ୍କ କ୍ଷମତା ଓ ଆଇନର ପରିସର ଭିତରେ ଚାଷୀଙ୍କ ସମସ୍ୟାର ସମାଧାନ ପାଇଁ ଯାହା ସମ୍ଭବ , ସେ ତାହା କରୁଛନ୍ତି ଓ କରିବେ । ଯଦି ଚାଷୀମାନେ ଅଧିକ କିଛି ଆଶା କରୁଛନ୍ତି , ତେବେ ସେମାନେ ଉଚ୍ଚ କର୍ତ୍ତୃପକ୍ଷଙ୍କୁ ଜଣାଇବା ଉଚିତ । ନାଗରିକ ମହାସଭା ସଭାପତି ସାମ୍ବାଦିକଙ୍କ ପ୍ରଶ୍ନର ଉତ୍ତର ଦେଇ ଚାଷୀମାନଙ୍କୁ ମଣିଷର ମେରୁଦଣ୍ଡ ସହ ତୁଳନା କରିଥିଲେ ।
କହିଥିଲେ ଯେ, ମେରୁଦଣ୍ଡ କେବେ ଆଗକୁ ଆସିପାରେ ନାହିଁ । ପଛରେ ରହି ହିଁ ସାରା ଶରୀରକୁ ସପୋର୍ଟ କରିଥାଏ । ବର୍ତ୍ତମାନ ଚାଷୀଙ୍କ ଅବସ୍ଥା ମେରୁଦଣ୍ଡ ଭଳି । ସେମାନଙ୍କ ଦ୍ୱାରା ଉତ୍ପାଦିତ ଅନ୍ନରେ ପ୍ରତିପାଳିତ ବ୍ୟବସ୍ଥାଧରମାନେ ଆଗରେ । ଚାଷୀ ପଛରେ, ବଂଚିତ ଶୋଷିତ ଓ ଅବହେଳିତ । ନିଜକୁ ନିଜେ ସପୋର୍ଟ କରିବା ପାଇଁ ଅସମର୍ଥ, ଯଦିବା ସମାଜ ତା ସାମର୍ଥ୍ୟ ଉପରେ ନିର୍ଭରଶୀଳ । ଶାନ୍ତି ଶୃଙ୍ଖଳା ରକ୍ଷା ପାଇଁ ସ୍ଥାନୀୟ ଥାନା ପକ୍ଷରୁ ବୁଧବାର ଦିନ ପୋଲିସ ମୁତୟନ କରା ଯାଇଥିବା ବେଳେ ଗୁରୁବାର ଦିନ ଚାଷୀଙ୍କ ପକ୍ଷରୁ ଜିଲ୍ଲାପାଳଙ୍କୁ ଦିଆ ଯାଇଥିବା ଦାବିପତ୍ରରେ ରବିବାର ସୁଦ୍ଧା ଉପସ୍ଥାପିତ ଦାବିସମୂହ ପୂରଣ ନହେଲେ ସୋମବାର ଠାରୁ ଆନ୍ଦୋଳନକୁ ଜୋରଦାର କରାଯିବ ବୋଲି ଉଲ୍ଲେଖ ରହିଛି ।
