ସାଲେପୁର, (୦୨/୦୭) : ଆପ୍ର. : ରାଜ୍ୟରେ ଏବେ ନୂଆ ସରକାର, ନୂଆ ନିୟମ । କିନ୍ତୁ ସରକାରୀ ଚାକିରିଆ ମାନଙ୍କ ମନୋମୁଖୀ କାର୍ଯ୍ୟ ଧୀରେ ଧୀରେ ବଢ଼ିବାରେ ଲାଗିଥିବା ନେଇ ଆସିଛି ଅଭିଯୋଗ ।
ଠିକ୍ ସମୟରେ ଅଫିସର ମାନେ ଅଫିସକୁ ଆସୁନାହାନ୍ତି । ଯାହା ଫଳରେ ନାନା ସମସ୍ୟାର ସମ୍ମୁଖିନ ହେଉଛନ୍ତି ହିତାଧିକାରୀ ଓ ଜନସାଧାରଣ । ଅଫିସ୍ ଖୋଲିବା ସମୟ ସକାଳ ୧୦ ଟା ରହିଥିବା ବେଳେ ଦିନ ୧୨ ଟା ଯାଏ ବି ଅଫିସର ମାନଙ୍କ ଦେଖାମିଳୁନାହିଁ । ଏମିତି ଘଟଣା ଦେଖିବାକୁ ମିଳିଛି କଟକ ଜିଲ୍ଲା ମାହାଙ୍ଗା ନିର୍ବାଚନ ମଣ୍ଡଳୀର ଉଭୟ ମାହାଙ୍ଗା ଓ ନିଶ୍ଚିନ୍ତକୋଇଲି ବ୍ଲକ୍ କାର୍ଯ୍ୟାଳୟରେ । ବ୍ଲକ୍ କାର୍ଯ୍ୟାଳୟକୁ ସମୟରେ ସରକାରୀ ଅଫିସର ମାନେ ଆସୁନଥିବାରୁ ଲୋକେ ମାନେ ବିଭିନ୍ନ କାର୍ଯ୍ୟ ପାଇଁ ଆସି ଦୀର୍ଘ ସମୟ ପର୍ଯ୍ୟନ୍ତ ଅପେକ୍ଷା କରିବାକୁ ପଡୁଛି ବୋଲି ଅଭିଯୋଗ କରିଛନ୍ତି । ସକାଳ ୧୦ ଟା ରୁ ଦିନ ୫ଟା ପର୍ଯ୍ୟନ୍ତ କାର୍ଯ୍ୟାଳୟ ଚାଲୁ ରହିବାକୁ ନିର୍ଦ୍ଦେଶ ଥିଲେ ବି ଦିନ ୧୨ଟା ସୁଦ୍ଧା କୌଣସି ଅଧିକାରୀଙ୍କ ଦେଖାମିଳୁନି ।
ବିଭିନ୍ନ ବିଭାଗର ଅଧିକାରୀ ମାନଙ୍କ ଦେଖା ମିଳୁନଥିବା ବେଳେ ଦୀର୍ଘ ସମୟ ଅପେକ୍ଷାରେ ରହୁଛନ୍ତି ହିତାଧିକାରୀ । ଅଧିକାରୀ ମାନେ ଏଭଳି ମନୋମୁଖୀ ହୋଇଯାଇଛନ୍ତି ଯେମିତି ଅଫିସ୍ ନୁହେଁ ବରଂ ଫିଲ୍ମ ଦେଖିବାକୁ ଆସୁଛନ୍ତି । ସମୟ ଜ୍ଞାନ ଭୁଲି ଯାଉଛନ୍ତି ସରକାରୀ ବାବୁ ମାନେ । ଆଉ ଅଫିସରେ କାର୍ଯ୍ୟରତ ପିଅନଙ୍କ କଥାରେ କୌଣସି ତାଳ ମେଳ ରହୁନାହିଁ । କିଏ କହୁଛି ସାର୍ ରାତିରେ ଡେରିରେ ଶୋଉଛନ୍ତି ତ, କିଏ କହୁଛି ଅଫିସରେ ସମସ୍ତେ ଅଛନ୍ତି । ଆଉ କିଏ କହୁଛି ସରକାରୀ ବାବୁ ମାନେ ନିଜ ଘରୁ ସିଧାସଳଖ ଫିଲ୍ଡକୁ ଯାଇଛନ୍ତି ।
କିନ୍ତୁ ବାସ୍ତବ କଥା ହେଉଛି ଯାହା ଆପଣ ଶୁଣୁଛନ୍ତି । ତେବେ ଦେଖିବକୁ ବାକି ରହିଲା କେବେ ସରକାରଙ୍କ ନଜର ପଡୁଛି ଆଉ ସରକାରୀ ବାବୁଙ୍କ ଉପରେ କାର୍ଯ୍ୟନୁଷ୍ଠାନ ଗ୍ରହଣ ହେଉଛି । ଏ ବାବଦରେ ଆମେ ପଂଚାୟତ ରାଜମନ୍ତ୍ରୀଙ୍କୁ ପଚାରିବାରୁ, ଯେଉଁ ଅଫିସର ମାନେ ସରକାର ନିୟମକୁ ପାଳନ କରିବେନି ତାଙ୍କ ଉପରେ ଦୃଢ କାର୍ଯାନୁଷ୍ଠାନ ନିଆଯିବ ବୋଲି କହିଛନ୍ତି । ତେବେ ଦେଖିବାକୁ ବାକି ରହିଲା ଏପଟେ ଖବର ପ୍ରସାରଣ ପରେ କେବେ ମନ୍ତ୍ରୀଙ୍କ କଥା କାର୍ଯ୍ୟକାରୀ ହେଉଛି ଆଉ ସରକାରୀ ବାବୁଙ୍କୁ ଦଣ୍ଡ ମିଳୁଛି ।
