କାଶୀନଗର, (୨୦/୩) : ଆ.ପ୍ର. : ଗଜପତି ଜିଲ୍ଲା କାଶୀନଗର ବ୍ଳକ ଅନ୍ତର୍ଗତ କେ. ଶୀତାପୁର ଗ୍ରାମ ଠାରେ ନିଆରା ଭାବେ ପାଳନ କରାଯାଉଛି ମାଁ ବିନ୍ଦ୍ୟଗିରୀ ବାସୀନଙ୍କ ଉତ୍ସବ ପର୍ବ ।
ଉକ୍ତ ଗ୍ରାମରେ ବସବାସ କରୁଥିବା ଚରତି ବଂଶର ଇଷ୍ଟ ଦେବତା ଭାବେ ପୂଜା ପାଉଥିବା ମାଁ ବିନ୍ଧ୍ୟଗିରୀ ବାସିନୀଙ୍କୁ ପୂଜା ଅର୍ଚ୍ଚନା କରି ଏହି ପର୍ବ ପାଳନ କରିଥାନ୍ତି ପ୍ରତ୍ୟେକ ବର୍ଷ। ଏହି ପର୍ବ ପାଳନରେ ଗ୍ରାମର ସମସ୍ତ ଗ୍ରାମବାସୀ ବି ସହଯୋଗ କରନ୍ତି ଓ ଶହ ଶହ ଶ୍ରଦ୍ଧାଳୁ ଏଠାରେ ଉପସ୍ଥିତ ହୁଅନ୍ତି। ପ୍ରଥମେ ଏଠାରେ ଥିବା ମଆଙ୍କ ମନ୍ଦିରକୁ ଗ୍ରାମର ସମସ୍ତ ମହିଳା କଳସୀ ଯାତ୍ରା କରି ମାଆଙ୍କ ପାଣି ଦେଇ ପୂଜାର୍ଚ୍ଚନା କରାଯାଏ। ପରେ ଏକ ନଡ଼ିଆ ଗଛ ଡ଼ାଳରେ ତିଆରି ଛାମୁଡ଼ାରେ ଶ୍ରଦ୍ଧାଳୁ ମାନେ ନଡ଼ିଆ ଓ କଦଳୀ ପେନ୍ତ୍ତା ବାନ୍ଦନ୍ତି ।
ମାଆଙ୍କ ପୂଜା ସରିବା ସଙ୍ଗେ ସଙ୍ଗେ ଗ୍ରାମର ଉପସ୍ଥିତ ଶହ ଶହ ଶ୍ରଦ୍ଧାଳୁ ବନ୍ଦା ଯାଇଥିବା ଫଳମୂଳକୁ ନେବା ପାଇଁ ଏକ ପ୍ରତିଯୋଗିତା ଆରମ୍ଭ ହୁଏ। ଯିଏ ଯାହା ଫଳମୂଳ ପାଇଲା ସେ ସେଠାରୁ ନେଇ ଯାଏ କିମ୍ବା ସେଠାରେ ଥିବା ଗ୍ରାମବାସୀ ତଥା ଶ୍ରଦ୍ଧାଳୁ ମାନଙ୍କୁ ନେଇଥିବା ଫଳମୂଳ ଦିଅନ୍ତି । ଏହିପରି ନିଆରା ପର୍ବ କାଶୀନଗର ବ୍ଲକରେ ଏହି ସ୍ଥାନରେ ହିଁ ହେଉଥିବା ଦେଖିବାକୁ ମିଳିଛି। ଏହି ପରମ୍ପରା ଦୀର୍ଘ ୧୦୦ ବର୍ଷ ଧରି କରାଯାଉଥିବା ନେଇ ଶ୍ରଦ୍ଧାଳୁ ମାନେ କହିଛନ୍ତି। ସେହିପରି ପୂଜା ସରିବା ସନ୍ଧ୍ୟାରେ ଶହ ଶହ ଶ୍ରଦ୍ଧାଳୁଙ୍କ ପାଇଁ ମାଆଙ୍କ ପ୍ରସାଦ ବଣ୍ଟନ କାର୍ଯ୍ୟକ୍ରମ କରାଯାଏ। ଏହି ଅବସରରେ ଆଖପାଖ ଥିବା ବହୁ ଗ୍ରାମରୁ ଲୋକେ ଏହି ପୂଜାରେ ଓ ପ୍ରସାଦ ସେବନ କାର୍ଯ୍ୟକ୍ରମରେ ଉପସ୍ଥିତ ହୋଇଥାନ୍ତି।
ଏହି ପୂଜାର୍ଚ୍ଚନା କେବଳ ଚରତି ବଂଶର ପରିବାର ଦ୍ଵାରା ମାଆଙ୍କୁ ପୂଜାର୍ଚ୍ଚନା କରାଯାଏ , କିନ୍ତୁ ମାଆଙ୍କ ଦର୍ଶନ ପାଇଁ ବହୁ ଲୋକେ ଏଠାକୁ ଆସନ୍ତି ବୋଲି ଗ୍ରାମବାସୀ କହିଛନ୍ତି । ଉକ୍ତ ବର୍ଷ ଧୁବା ଚରତି, ଧନଞ୍ଜୟ ଚରତି ଓ ହୁର୍ଦୟନନ୍ଦ ଚରତି ସହ ବହୁ ଲୋକେ ଉକ୍ତ ପୂଜାର୍ଚ୍ଚନାର ଦାୟିତ୍ଵ ତୁଲାଇଥିଲେ। ଏଠାରେ ମାଆଙ୍କୁ ପୂଜା କରିଲେ ମନସ୍କାମନା ପୂରଣ ହୋଇଥାଏ ବୋଲି ବିଶ୍ୱାସ କରନ୍ତି ଶ୍ରଦ୍ଧାଳୁ। ସେଇଥିପାଇଁ ଏଠାର ମନ୍ଦିରରେ ବହୁ ଭିଡ଼ ଜମିଥାଏ। ହିନ୍ଦୁ ଧର୍ମର ଏହି ପରି ପରମ୍ପରା ରହିଥିବା ଓ ତାହା ବର୍ତ୍ତମାନ ବି ନିଷ୍ଟାର ଶହ ପାଳନ କରିଥିବା ନେଇ ବିଭିନ୍ନ ମହଲରେ ପ୍ରଶଂସା କରୁଥିବା ଦେଖିବାକୁ ମିଳିଛି।
