ରିପୋର୍ଟ : ସୁଭାସିସ ନାୟକ
ଭୁବନେଶ୍ୱର,(୧୬/୧୧) : ପଞ୍ଚୁକର ସ୍ୱତନ୍ତ୍ର ଦିନ ପୂର୍ଣ୍ଣିମା ଓ ବଡ଼ଓଷା ଦିନ ରେ ଏକାମ୍ର କ୍ଷେତ୍ରରେ ଥିବା ବିନ୍ଦୁସାଗରରେ ଶ୍ରଦ୍ଧାଳୁମାନେ ବୁଡ଼ ପକାଇ ପାରିବେ ନାହିଁ । ଏ ନେଇ ଭୁବନେଶ୍ୱର ମହାନଗର ନିଗମ ପକ୍ଷରୁ ଗାଇଡଲାଇନ୍ ଜାରି କରାଯାଇଛି ।
କରୋନା ଭାଇରସ୍ ମହାମାରୀକୁ ଦୃଷ୍ଟିରେ ରଖି ବିଏମ୍ସି ତରଫରୁ ନଭେମ୍ବର ୧୯ ତାରିଖ ପାଇଁ ଗାଇଡଲାଇନ୍ ଜାରି କରାଯାଇଛି । ବିଏମସି ପକ୍ଷରୁ କୁହାଯାଇଛି ଯେ, ପଞ୍ଚୁକର ସ୍ୱତନ୍ତ୍ର ଦିନ ରେ ବିଏମ୍ସି ଅଧିନରେ ଥିବା ସମସ୍ତ ଜଳାଶୟ ଉପରେ କଟକଣା ଲାଗୁ କରାଯାଇଛି । ଫଳରେ ଶ୍ରଦ୍ଧାଳୁମାନେ ବିନ୍ଦୁସାଗର ସମେତ ଭୁବନେଶ୍ୱର ପରିସର ମଧ୍ୟରେ ଥିବା ଅନ୍ୟ ଜଳାଶୟ (ନଦୀ ଓ ପୋଖରୀ) ରେ ବୁଡ଼ ପକାଇ ପାରିବେ ନାହିଁ । ରାଜ୍ୟରେ କରୋନା ସଂକ୍ରମଣ ହ୍ରାସ ପାଇଥିବା ବେଳେ ଭୁବନେଶ୍ୱରରେ ସମ୍ପୂର୍ଣ୍ଣ ଭାବେ କମିନାହିଁ । ତେଣୁ କରୋନା ସଂକ୍ରମଣକୁ ଦୃଷ୍ଟିରେ ରଖି ବିଏମ୍ସି ପଦକ୍ଷେପ ନେଇଛି ।
ପବିତ୍ର କାର୍ତ୍ତିକ ମାସ ଅବସରରେ ଶ୍ରଦ୍ଧାଳୁମାନେ ଭୋର ସମୟରେ ଜଳାଶୟରେ ଆସ୍ଥା ଓ ଭରସାର ସ୍ନାନ କରୁଛନ୍ତି । ରାଜଧାନୀ ଭୁବନେଶ୍ୱର ସମେତ ଏକାମ୍ର କ୍ଷେତ୍ରରେ ହବିଷ୍ୟାଳିମାନେ ପ୍ରତିଦିନ ଭୋର ସକାଳୁ ଶୁଦ୍ଧ ସ୍ନାନ କରୁଛନ୍ତି । ଏହାରି ମଧ୍ୟରେ ଆଜି ପବିତ୍ର ବଡ଼ ଏକାଦଶୀ ମଧ୍ୟରେ ପଞ୍ଚୁକ ଆରମ୍ଭ ହୋଇଯାଇଛି ।
