ରିପୋର୍ଟ : ରଞ୍ଜିତ ବେହେରା
ଢେଙ୍କାନାଳ,(୦୯/୧୦) : ପରଜଙ୍ଗ ପୋଲିସ ଦ୍ୱାରା ବନ୍ଧୁକ ତିଆରି କାରଖାନା ଠାବ ହୋଇଛି | ଗତ ୭ ତାରିଖ ରାତିରେ ଏକ ବିଶେଷ ସୂତ୍ରରୁ ଖବର ପାଇ ପରଜଙ୍ଗ ଥାନା ଓ ମହାବିରୋଡ଼ ପୋଲିସ ଫାଣ୍ଡି ପୋଲିସ ମିଳିତ ହୋଇ ମହାବିରୋଡ଼ ଅନ୍ତର୍ଗତ ବାମ ଗ୍ରାମର ଭୁତୁଭୁତିଆ ସାହିର ମଙ୍ଗୁଲୁ ମହାରଣାଙ୍କ ଘରେ ଚଢ଼ାଉ କରି ଏକ ଦେଶୀ ବନ୍ଧୁକ ତିଆରି କାରଖାନାକୁ ଠାବ କରିଛନ୍ତି ।
ଉକ୍ତ ସ୍ଥାନରୁ ସମ୍ପୂର୍ଣ୍ଣ ତିଆରି ବନ୍ଧୁକ, ଅଧା ତିଆରି ବନ୍ଧୁକ, ଲୁହା ଓ କାଠ ସାମଗ୍ରୀ, ବନ୍ଧୁକ ତିଆରି ଯନ୍ତ୍ରପାତି ଆଦି ଜବତ କରାଯାଇଛି । ଏହି କାରଖାନାରୁ ବନ୍ଧୁକ ତିଆରି କରି ବାହାରେ ବିକ୍ରି କରାଯାଉଥିବା ବେଳେ ଫାଣ୍ଡି ଅନ୍ତର୍ଗତ ଗ୍ରାମ-ବାମ ଭୁତୁଭୁତିଆ ସାହିର ସ୍ୱର୍ଗତ ନିତନ ମହାରଣାଙ୍କ ପୁତ୍ର ମଙ୍ଗୁଲୁ ମହାରଣାଙ୍କୁ ଗିରଫ କରାଯାଇଅଛି । ପରଜଙ୍ଗ ପୋଲିସ ଦ୍ୱାରା ପରଜଙ୍ଗ ଥାନା ମାମଲା ସଂଖ୍ୟା ୪୦୮ ତା ୦୭/୧୦/୨୦୨୧ ୟୁ/ଏସ ୨୫ ଆର୍ମସ ଆର୍ଟରେ ମାମଲା ରୁଜୁ କରି କୋର୍ଟ ଚାଲାଣ କରାଯାଇଅଛି ।
ଏ ସମ୍ପର୍କରେ ପରଜଙ୍ଗ ଥାନା ଅଧିକାରୀ ସୌଭାଗ୍ୟ ସ୍ୱାଇଁ ସୂଚନା ପ୍ରଦାନ କରିଛନ୍ତି । କିନ୍ତୁ ବନ୍ଧୁକଗୁଡ଼ିକୁ ସେ କେଉଁ ସ୍ଥାନରେ ଓ କାହାକୁ ବିକ୍ରି କରୁଥିଲେ ସେ ବିଷୟରେ ପୋଲିସ ପକ୍ଷରୁ କୌଣସି ସୂଚନା ଦିଆ ଯାଇନାହିଁ । ଫାଣ୍ଡି ଠାରୁ କିଛି ଦୂରରେ ଏପରି ବନ୍ଧୁକ କାରବାର ହେଉଥିଲା କିନ୍ତୁ ଫାଣ୍ଡି ପୋଲିସ ପାଖରେ କୌଣସି ସୂଚନା କିପରି ପୂର୍ବରୁ ନ ଥିଲା ତାହା ନେଇ ସାଧାରଣରେ ସନ୍ଦେହ ପ୍ରକାଶ ପାଇଛି ।
ତଦନ୍ତରେ ବାଧାହେବ ବୋଲି ବିଶେଷ ସୂଚନା ଦେବାକୁ ଥାନାଧିକାରୀ ମନା କରିଛନ୍ତି । ଆଗାମୀ ଦିନରେ ଏହାର ଚେର କେଉଁ ପର୍ଯ୍ୟନ୍ତ ଲମ୍ବିଛି ଏବଂ କିଏ କିଏ ସମ୍ପୃକ୍ତ ଅଛନ୍ତି ତାହା ସ୍ପଷ୍ଟ ହେବ ବୋଲି କହିଛି ପୋଲିସ ।
