ମୁରିବାହାଲ ୨୬.୩- ଆପ୍ର): ମୁରିବାହାଲ ବ୍ଲକ୍ ଗୁଡିଘାଟ ଗ୍ରାମପଞ୍ଚାୟତର ଅନ୍ତର୍ଗତ ବିଜାମାଲ ଗ୍ରାମରେ ବସୁଧା ଯୋଜନାରେ ପାନୀୟ ଜଳ ଯୋଗାଣ ପ୍ରକ୍ରିୟା ଦୀର୍ଘ ଦିନରୁ ଶେଷ ହୋଇ ନ ଥିବା ବେଳେ ସେହି ଗ୍ରାମର ବାସିନ୍ଦା ନାହିଁ ନଥିବା ପାନୀୟ ଜଳ ସଙ୍କଟର ସମ୍ମୁଖୀନ ହୋଇଥାନ୍ତି l ଗଣ ମାଧ୍ୟମରେ “ବିଜାମାଲ ଗ୍ରାମରେ ବସୁଧା ଯୋଜନା ଫେଲ୍”ଶୀର୍ଷକ ଖବର ପ୍ରକାଶିତ ପାଇଥିଲା l
ଖବର ପ୍ରକାଶିତ ହେଲାପରେ ସେଚ୍ଛେସେବୀ ଜନମୁକ୍ତି ଅନୁଷ୍ଠାନ ସମ୍ପାଦକ ଶ୍ରୀ ଭଜରାମ ସାହୁଙ୍କ ପ୍ରଚେଷ୍ଟାରେ ଏବଂ ଗ୍ରାମ ବାସୀଙ୍କ ଅନୁରୋଧ କ୍ରମେ ଏହାର ସାମୟିକ ସମାଧାନ ଲାଗି ପ୍ରୟାସ ଆରମ୍ଭ କରିଥିଲେ| ଗାଁରେଥିବା ପରିତ୍ୟକ୍ତ ଖୋଲା କୂଅ ହ୍ରଦ ଓ ଦୂଷିତ ଜଳକୁ ସଫା କରିବା ସହିତ କୂପର ନିର୍ମାଣ ଲାଗି ଯୋଜନା କରିଥିଲେ l ଯୋଜନା ଅନୁଯାୟୀ ଏଥିରେ ୨୫ ଗୋଟି କଂକ୍ରିଟ ରିଙ୍ଗ ଓ ଚାନ୍ଦିନୀ ନିର୍ମାଣ ସହିତ ସମୁଦାୟ ୫୦ ହଜାର ଟଙ୍କାର ବଜେଟ ଅଟକଳ ରହିଥିଲା l ଏଥି ପାଇଁ ଜନମୁକ୍ତି ଅନୁଷ୍ଠାନ ଦାତବ୍ୟ ସଂସ୍ଥା ରିଲାଏନ୍ସ ଫାଉଣ୍ଡେସନର ସହାୟତା ଲୋଡିଥିଲା ଏବଂ ଅନୁମୋଦିତ ଉକ୍ତ ରାଶି ଜରିଆରେ ସାମୟୀକ ଭାବେ ଗ୍ରାମବାସୀଙ୍କ ପାନୀୟ ଜଳକଷ୍ଟ ଦୂର କରିପାରିଛି |
ପ୍ରକାଶ ଥାଉକି ଜଳ କଷ୍ଟ ପାଇଁ ଏହି ଗ୍ରାମ ସର୍ବଦା ଚର୍ଚ୍ଚା ରେ ଆସିଥାଏ l ଏହି ବର୍ଷ ମଧ୍ୟ ସେମାନେ ପାନୀୟ ସମସ୍ୟାର ସମ୍ମଖୀନ ଥିଲେ l ଜନମୁକ୍ତି ଅନୁଷ୍ଠାନର ପ୍ରୟାସ ଲାଗି ସେମାନେ ଗୋଟିଏ କୂପରୁ ପାନୀୟ ଜଳ ପାଇପାରି ସେହି ସମସ୍ୟାର ସାମୟିକ ସମାଧାନ କରିପାରିଥିବା ହେତୁ ଆଶ୍ୱସ୍ତି ସହିତ ଜନମୁକ୍ତି ଅନୁଷ୍ଠାନ ଓ ରିଲାଏନ୍ସ ଫାଉଣ୍ଡେସନର ଆଶୁ ପଦକ୍ଷେପକୁ ଭୂୟସୀ ପ୍ରଶଂସା କରୁଛନ୍ତି l
ଏହି କାର୍ଯ୍ଯରେ ଜନମୁକ୍ତି ଅନୁଷ୍ଠାନର ସିଭିଲ ଇଞ୍ଜିନିୟର ଉମାକାନ୍ତ ରାଉତରାୟ, ଏକ୍ସଟେନସନ୍ ୱାର୍କର୍ ହିମାଂଶୁ ପଣ୍ଡା, କାର୍ଯ୍ଯକ୍ରମ ସଂଯୋଜକ ବିକାଶ ଥପା,ଗ୍ରାମର,ଥବିର ସ।, ନରୋତ୍ତମ ମାଝୀ, ପୁରୁଷୋତ୍ତମ ଭୋଇ, ଦାମୋଦର ମୁଦୁଲି ସହିତ ଗ୍ରାମ୍ୟ କମିଟିର ସଦସ୍ୟ/ସଦସ୍ୟା ସହଯୋଗ କରିଥିଲେ | ବସୁଧା ଯୋଜନାର କାର୍ଯ୍ୟକାରିତା ଓ ଜଳ ଯୋଗାଣକୁ ଏବେ ମଧ୍ୟ ଗ୍ରାମ ବାସୀ ଚାହିଁ ରହିଛନ୍ତି|କେବେ ହେଉଛି କାର୍ଯ୍ୟକ୍ଷମ ବସୁଧା ଯୋଜନା ଦେଖିବାକୁ ବାକିରହିଲା |
