ରିପୋର୍ଟ : ଓଡିଶା ନ୍ୟୁଜ ୨୪ ବ୍ୟୁରୋ //
କନ୍ଧମାଳ, (୨୯/୦୫) : ଗତ କିଛି ଦିନ ଧରି ଜଙ୍ଗଲ କାଟି କନ୍ଧମାଳ ଜିଲ୍ଲା ଦାରିଙ୍ଗବାଡି ବ୍ଲକ ବ୍ରାହ୍ମଣୀଗାଁ ବନାଞ୍ଚଳରୁ ଗଞ୍ଜାମ ଜିଲ୍ଲା ବଡ଼ଗଡ଼ ଥାନା ଅଞ୍ଚଳକୁ ଚୋରାଚାଲାଣ କରାଯାଉଥିଲା ମୂଲ୍ୟବାନ କାଠ ।
ଏହି ଖବର ବ୍ରାହ୍ମଣୀଗାଁ ବନାଞ୍ଚଳ ନିକଟରେ ପହଞ୍ଚିବା ପରେ ବିଭାଗ ପକ୍ଷରୁ ରାତିରେ ପାଟ୍ରୋଲିଂ କୁ କଡାକଡି କରାଯାଇଥିଲା । ସୂଚନା ଅନୁସାରେ, ବ୍ରାହ୍ମଣୀଗାଁ ବନାଞ୍ଚଳ କାଟିଙ୍ଗିଆ ସେକ୍ସନର ଗୁଡିକିଆ ଅଞ୍ଚଳରେ ପାଟ୍ରୋଲିଂ ବେଳେ ଏକ ମିନି ଟ୍ରକରେ ୨୪ ଖଣ୍ଡ ଶାଗୁଆନ କାଠ ଗଣ୍ଡି ଗଞ୍ଜାମ ଜିଲ୍ଲା ବଡ଼ଗଡ଼ ଅଞ୍ଚଳକୁ ଚୋରାଚାଲାଣ ବେଳେ ମାଡ଼ିବସିଲା ବନ ବିଭାଗ । ଏଥିରେ ସମ୍ପୃକ୍ତି ୮ ଜଣଙ୍କୁ ବନ କର୍ମଚାରୀ ଗିରଫ କରିଥିଲେ । ଜବତ କାଠ ଗଣ୍ଡିର ମୂଲ୍ୟ ପ୍ରାୟ ୫ ଲକ୍ଷ ଟଙ୍କା ହେବ ବୋଲି ସେ କହିଛନ୍ତି ।
ଗିରଫ ୮ ଜଣଙ୍କ ମଧ୍ୟରେ ବଡ଼ଗଡ଼ ଥାନା ଅଞ୍ଚଳର ପ୍ରଶାନ୍ତ କୁମାର ସାହୁ, ଉପେନ୍ଦ୍ର ଗୌଡ଼, ଶରତ ସେଠି, ବାବୁଲା ସ୍ୱାଇଁ, ଶିବ ଜେନା, କୃଷ୍ଣ ବିଶୋଇ, ବାବୁଲା ଘଡେଇ ଏବଂ ଶଙ୍କର ପାତ୍ର ବୋଲି ବିଭାଗ ପକ୍ଷରୁ କୁହାଯାଇଛି । ଏହି ଚଢ଼ାଉରେ ବନାଞ୍ଚଳ ଅଧିକାରୀ ବେହେରାଙ୍କ ସମେତ ବନପାଳ ସରୋଜ ମଙ୍ଗରାଜ, ଦୀପକ ପଟ୍ଟନାୟକ, ସରୋଜ ପାତ୍ର, ମାର୍କା ମଲିକ, ଇନ୍ଦ୍ରମଣୀ ଦିଗାଲ ଏବଂ ଅନ୍ୟ ଟିମ ସାମିଲ ହୋଇଥିଲେ ।
