ରିପୋର୍ଟ : ଓଡିଶା ନ୍ୟୁଜ ୨୪ ବ୍ୟୁରୋ //
ଭୁୁବନେଶ୍ୱର, (୧୫/୦୨) : ପୁଣି ଜୀବନ ନେଲା ମୋ ବସ୍ । ଲାଗୁଛି ଯେମିତି ରାଜଧାନୀବାସୀଙ୍କ ପାଇଁ ମୋ ବସ୍ ଯମ ପାଲଟିଛି ।
ଏପରିକି ପ୍ରତି ସପ୍ତାହରେ କେଉଁଠି ନା କେଉଁଠି ରାଜ୍ୟର ଯେ କୌଣସି ଅଞ୍ଚଳରେ ମୋ ବସ୍ ଚକା ତଳେ କାହାରି ନା କାହାରି ପ୍ରାଣହାନୀ ଘଟୁଛି । ଆଜି ଭୁବନେଶ୍ୱର ତମାଣ୍ଡୋ ଥାନା ଅଞ୍ଚଳର ଓଭରବ୍ରିଜ ତଳେ ମୋ ବସ୍ ଚକା ତଳେ ମହିଳାଙ୍କ ମୃତ୍ୟୁ ଘଟିଛି । ଘଟଣାସ୍ଥଳରେ ଲୋକଙ୍କ ମଧ୍ୟରେ ଉତ୍ତେଜନା ଦେଖିବାକୁ ମିଳିଛି । କେବଳ ସେତିକି ନୁହେଁ ମୋ ବସ ମହିଳାଙ୍କୁ ୧୦୦ ମିଟର ପର୍ଯ୍ୟନ୍ତ ଘୋଷାଡି ନେଇଥିଲା ।
ସୂଚନାଯୋଗ୍ୟ, କିଛି ଦିନ ତଳେ ଭୁବନେଶ୍ୱର ନନ୍ଦନକାନନ ଅଞ୍ଚଳରେ ଜଣେ ନାବାଳିକା ରାସ୍ତା ପାରି ହେଉଥିବା ବେଳେ ମୋ ବସ୍ ଧକ୍କା ଦେଇଥିଲା । ଘଟଣାସ୍ଥଳରେ ଛୋଟ ଝିଅଟିର ମୃତ୍ୟୁ ଘଟିଥିଲା । ସେହିପରି ୨୦୨୪ ନଭେମ୍ବର ୨ ତାରିଖରେ ଚନ୍ଦ୍ରଶେଖରପୁରରେ ମୋ ବସ ଦୁର୍ଘଟଣାରେ ଜଣେ ଯୁବତୀ ନିଜର ବାମହାତ ହରାଇଥିଲେ । ପୁଣି ସେହି ବର୍ଷ ଅକ୍ଟୋବରରେ କଟକ ନେତାଜୀ ବସ୍ ଟର୍ମିନାଲରେ ମୋ ବସ୍ ଧକ୍କାରେ ଜଣେ ମହିଳାଙ୍କ ମୃତ୍ୟୁ ଘଟିଥିଲା ।
