ଗଞ୍ଜାମ, (୨୯/୦୪) : ଗଞ୍ଜାମ ଜିଲ୍ଲା ପୁରୁଷୋତ୍ତମପୁର ଥାନା ଅନ୍ତର୍ଗତ କୁଶପୁର ଗାଁ’ରେ ଅଭାବନୀୟ ଘଟଣା । ନିଜ ବାପାକୁ ପିଟିପିଟି ହତ୍ୟା କରିଛନ୍ତି ଦୁଇ ପୁଅ ।
କୁଶପୁର ଗାଁ’ର ଗୋପାଳକୃଷ୍ଣ ସାହୁ ପାରିବାରିକ କଳହକୁ ନେଇ ନିଜ ପତ୍ନୀଙ୍କୁ ବିଭିନ୍ନ ସମୟରେ ବାଡେଇବା ସହ ଗଣ୍ଡଗୋଳ କରୁଥିଲେ । ଆଜି ସକାଳ ସମୟରେ ମଧ୍ୟ ଗୋପାଳକୃଷ୍ଣ ନିଜ ପତ୍ନୀଙ୍କ ସହ ଗଣ୍ଡଗୋଳ ଲାଗିବା ସହ ଏକ ଲୁହା ରୋଡରେ ଆକ୍ରମଣ କରିବା ପାଇଁ ଉଦ୍ୟମ କରିଥିଲେ । ଏହାକୁ ଘରେ ଥିବା ଦୁଇ ପୁଅ ଦେଖିଥିଲେ । ନିଜ ମା’ଙ୍କ ଉପରେ ଏଭଳି ବାରମ୍ବାର ଆକ୍ରମଣ ସହ୍ୟ କରିନପାରି ଗୋପାଳକୃଷ୍ଣ ଧରିଥିବା ଲୁହା ରୋଡକୁ ଛଡ଼ାଇ ତାଙ୍କୁ ଦୁଇ ଭାଇ ଆକ୍ରମଣ କରିଥିଲେ ।
ଦୁଇ ଭାଇଙ୍କ ଆକ୍ରମଣରେ ଗୋପାଳକୃଷ୍ଣଙ୍କ ମୃତ୍ୟୁ ଘଟଣାସ୍ଥଳରେ ହିଁ ହୋଇଥିଲା । ଘଟଣା ସମ୍ପର୍କରେ ଖବର ପାଇ ପୁରୁଷୋତ୍ତମପୁର ଥାନା ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲା । ଗୋପାଳକୃଷ୍ଣଙ୍କୁ ହତ୍ୟା କରିଥିବା ଅଭିଯୋଗରେ ପୋଲିସ ତାଙ୍କ ଦୁଇ ପୁଅ ରଞ୍ଜନ ଓ ପିଣ୍ଟୁ ସାହୁଙ୍କୁ ଅଟକ ରଖି ଅଧିକ ତଦନ୍ତ ଜାରି ରଖିଛି ।
