ଯାଜପୁର, (୨୮/୦୫) : ଆପ୍ର. : ପାଣିକୋଇଲି ଥାନା ଅନ୍ତର୍ଗତ ଜହ୍ନକଣା ଗାଁ ପୋଖରୀରେ ବୁଡି ଯୁବକଙ୍କ ମୃତ୍ୟୁ ହୋଇଛି ।
ଆଈର ଶ୍ରାଦ୍ଧ ବାର୍ଷିକ କାର୍ଯ୍ୟରେ ଯୋଗ ଦେବାକୁ ଆସି ପୋଖରୀକୁ ଗାଧେଇ ଯାଇଥିବା ସମୟରେ ଘଟିଛି ଅଘଟଣ । ସୂଚନା ମୁତାବକ କେନ୍ଦ୍ରାପଡା ଜିଲ୍ଲା ବସୁପୁର ଗ୍ରାମର ବିଶ୍ୱରଂଜନ ବିଶ୍ୱାଳଙ୍କ ପୁଅ ଓଁକାର ବିଶ୍ୱାଳ ଯାଜପୁର ପାଣିକୋଇଲି ଥାନା ଜହ୍ନକଣା ଗାଁ’କୁ ଆଇଙ୍କ ଶ୍ରଦ୍ଧା ବାର୍ଷିକ କାର୍ଯ୍ୟରେ ଯୋଗଦେବାକୁ ଗତକାଲି ଆସିଥିଲେ । ଆଜି ସକାଳୁ ଓଁକାର ତାଙ୍କ ମାଙ୍କ ସହ ଗାଁ ପୋଖରୀକୁ ଗାଧୋଇବାକୁ ଯାଇଥିବାବେଳେ ଅସାବଧାନତା ବଶତଃ ପୋଖରୀରେ ବୁଡି ଯାଇଥିଲେ ।
ଏହାକୁ ଦେଖି ଓଁକାରଙ୍କ ମା ସ୍ଥାନୀୟ ଲୋକଙ୍କୁ ଡାକ ପକାଇଥିଲେ । ଗ୍ରାମବାସୀ ଓ ଦମକଳ ବାହିନୀଙ୍କ ସହାୟତାରେ ଓଁକାରଙ୍କୁ ପୋଖରୀ ମଧ୍ୟରୁ ଉଦ୍ଧାର କରାଯାଇଥିଲା । ପରେ ତାଙ୍କୁ ଯାଜପୁର ରୋଡ଼ ମେଡ଼ିକାଲରେ ଭର୍ତ୍ତି କରାଯାଇଥିଲା । ମାତ୍ର ପ୍ରାଥମିକ ଚିକିତ୍ସା ପରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଖବରପାଇ ପାଣିକୋଇଲି ପୋଲିସ ମେଡ଼ିକାଲରେ ପହଂଚି ଶବକୁ ବ୍ୟବଚ୍ଛେଦ ପାଇଁ ପଠାଇଥିଲେ । ଏନେଇ ପୋଲିସ ଏକ ଅପମୃତ୍ୟୁ ମାମଲା ରୁଜୁକରି ଘଟଣାର ତଦନ୍ତ ଆରମ୍ଭ କରିଛି ।
