ଭଦ୍ରକ, (୨୪/୦୬) : ଆପ୍ର. : ଭଦ୍ରକ ପୁରୁଣା ବଜାର ପୋଲିସ ଦ୍ୱାରା ୧୫ ଗ୍ରାମ ବ୍ରାଉନସୁଗାର ସହ ଗୋଟିଏ କାର ଜବତ ହୋଇଛି । ଏହି ଘଟଣାରେ ଦୁଇ ମହିଳାଙ୍କ ସମେତ ଜଣେ ଡ୍ରାଇଭର ଗିରଫ ହୋଇଛନ୍ତି ।
ସେମାନେ ଭୁବନେଶ୍ୱର ଖଣ୍ଡଗିରି ଅଂଚଳର ବୋଲି ଜଣାପଡିଛି । ପୁରୁଣା ବଜାର ପୋଲିସ ପକ୍ଷରୁ ଭଦ୍ରକ ଚାନ୍ଦବାଲି ରାସ୍ତାର ନାଥସାହିଠାରେ ଏମଭି ଚେକିଂ କରାଯାଉଥିଲା । ଏହି ସମୟରେ ଗୋଟିଏ କାରରେ ଦୁଇଜଣ ମହିଳା ସନ୍ଦେହ ଜନକ ଭାବେ ଯାଉଥିଲେ । ଏନେଇ ପୋଲିସର ସନ୍ଦେହ ହେବାରୁ କାରକୁ ଅଟକାଇବା ପାଇଁ ଉଦ୍ୟମ କରିଥିଲା । ତେବେ ସେଠାରୁ କାର ଚାଳକ ଖସି ଯିବାକୁ ଉଦ୍ୟମ କରିଥିଲା । ତେଣୁ ସେଠାରେ ଥିବା ପୋଲିସ ସେହି କାରଟିକୁ ଅଟକାଇବାରୁ ସେଥିରେ ୧୫ ଗ୍ରାମରୁ ଅଧିକ ବ୍ରାଉନସୁଗାର ବାହାରିଥିଲା ।
ତେଣୁ ପୋଲିସ ବ୍ରାଉନସୁଗାରକୁ ଜବତ କରିବା ସହିତ ଦୁଇଜଣ ମହିଳାଙ୍କୁ ଗିରଫ କରିଥିଲା । ସେମାନଙ୍କ ନିକଟରୁ ୪ଟି ଗୋଟି ମୋବାଇଲ ଫୋନ ଏବଂ ସେହି କାରକୁ ଜବତ କରାଯାଇଥିଲା । ପୁରୁଣା ବଜାର ପୋଲିସ ଏକ ମାମଲା ରୁଜୁକରି ଘଟଣାର ଅଧିକ ତଦନ୍ତ ଆରମ୍ଭ କରିଥିବା ଅତିରିକ୍ତ ଏସପି ସୂଚନା ଦେଇଛନ୍ତି ।
