ରିପୋର୍ଟ : ଓଡିଶା ନ୍ୟୁଜ ୨୪ ବ୍ୟୁରୋ //
ଗଞ୍ଜାମ, (୦୧/୦୧) : ଫାଷ୍ଟ ଫୁଡ ଖାଇଲେ । ମାତ୍ର ମାଗିବାରୁ ଟଙ୍କା ନ ଦେଇ ଦେଖାଇଲେ ନାଲି ଆଖି। ଏପରିକି ଛୁରୀ ଦେଖାଇ ଦାଦା ବଟି ମାଗିଲେ । ଦାଦା ବଟି ନ ମିଳିବାରୁ ଦୁଇ ଜଣଙ୍କୁ ଆକ୍ରମଣ କରି ଘାଇଲା କଲେ ।
ଏପରି ଏକ ନାରକୀୟ କାଣ୍ଡ ଗତ ସନ୍ଧ୍ୟାରେ ବ୍ରହ୍ମପୁର ଗାନ୍ଧୀନଗର ମୁଖ୍ୟ ରାସ୍ତାରେ ଘଟିଛି । ଗତ ସନ୍ଧ୍ୟାରେ ୪ ଯୁବକ ଦୁଇଟି ବାଇକ୍ ଯୋଗେ ବ୍ରହ୍ମପୁର ଗାନ୍ଧୀନଗର ମୁଖ୍ୟ ରାସ୍ତାରେ ପହଞ୍ଚିଥିଲେ । ଏକ ଦୋକାନରୁ ସେମାନେ ଫାଷ୍ଟ ଫୁଡ ଖାଇଥିଲେ। ମାତ୍ର ଦୋକାନୀ ଟଙ୍କା ମାଗିବାରୁ ଆରମ୍ଭ ହୋଇଥିଲା ବଚସା । ଟଙ୍କା ନ ଦେଇ ସେମାନେ ଧମକଚମକ ଦେବା ସହ ଦାଦା ବାଟି ମାଗିବାକୁ ପଛାଇଲେ ନାହିଁ ।
ଏହାକୁ ନେଇ ଦୋକାନୀ ଓ ତାଙ୍କ ଭାଇଙ୍କ ସହ ୪ ଯୁବକଙ୍କ ଉଚ୍ଚବାଚ ହେଲା । ଫଳରେ ୪ ଦୁର୍ବୃତ୍ତ ଛୁରୀ ବାହାର କରି ସେମାନଙ୍କୁ ଆକ୍ରମଣ କରିଥିଲେ । ଦୁଇ ଭାଇଙ୍କ ଚିତ୍କାର ଶୁଣି ପାଖରେ ଥିବା ଅନ୍ୟମାନେ ଦୌଡ଼ି ଆସିବାରୁ ଦୁଇ ଜଣ ଖସି ପଳାଇଛନ୍ତି । ଆଉ ଦୁଇ ଜଣଙ୍କୁ କାବୁ କରି ସେମାନେ ପୁଲିସ୍ ଜିମା ଦେଇଛନ୍ତି । ପୁଲିସ୍ ଘଟଣାସ୍ଥଳରେ ପହଞ୍ଚି ଦୁଇ ଯୁବକଙ୍କୁ ଥାନାକୁ ନେଇଥିବା ବେଳେ ସିସିଟିଭି ଫୁଟେଜ ଆଧାରରେ ଆଉ ଦୁଇ ଯୁବକଙ୍କୁ ଖୋଜୁଛି । ଖୁବ୍ ଶୀଘ୍ର ସେମାନଙ୍କୁ ଗିରଫ କରାଯିବ ବୋଲି ଥାନା ଅଧିକାରୀ ସୂଚନା ଦେଇଛନ୍ତି ।
