ବୋରିଗୁମ୍ମା, (୨୬/୬) : ଆପ୍ର. : ଆଜି ବୋରିଗୁମ୍ମା ବଜାରରେ ଶ୍ରାବଣ ଛତୁ ଦେଖିବାକୁ ମିଳିଛି । କିନ୍ତୁ ଅଦିନରେ ବାହାରି ଥିବାରୁ କିଲୋ ୨୦୦୦ ଟଙ୍କାରେ ବିକ୍ରି ହୋଇଛି ।
ରାଜସ୍ଵ ନିରୀକ୍ଷକଙ୍କ କାର୍ଯ୍ୟାଳୟ ବାହାରେ ଜଣେ ବେପାରୀ ଆଜି ବିକ୍ରି କରିଛନ୍ତି । ଏହି ଛତୁ ସାଧାରଣତଃ ଅବିଭକ୍ତ କୋରାପୁଟ ଜିଲ୍ଲାରେ ତଥା କୋରାପୁଟ ଜିଲ୍ଲା ସୀମାନ୍ତବର୍ତ୍ତୀ ଆନ୍ଧ୍ର ପ୍ରଦେଶର କିଛି ଅଞ୍ଚଳରେ ସାଧାରଣତଃ ଶ୍ରାବଣ ମାସରେ ଫୁଟିଥାଏ । ସମସ୍ତ ଛତୁ ଠାରୁ ଏହା ସ୍ୱାଦିଷ୍ଟ ଓ ପୁଷ୍ଟିକର ହୋଇ ଥିବାରୁ ମାଂସ ଠାରୁ ୩ ଗୁଣ ଅଧିକା ଦାମ୍ ହେଲେ ମଧ୍ୟ ଲୋକେ କିଣିବାକୁ ପଛାନ୍ତି ନାହିଁ ।ତେବେ ଏହି ସମୟରେ ପ୍ରଚୁର ପରିମାଣରେ ଆସୁଥିବା ବଡା ଛତୁ ଚଳିତ ବର୍ଷ ବଜାରରେ ଦେଖିବାକୁ ମିଳୁ ନ ଥିବା ବେଳେ ହଠାତ୍ ଶ୍ରାବଣ ଛତୁର ଆବିର୍ଭାବ ସାଧାରଣରେ ଆଶ୍ଚର୍ଯ୍ୟ ସୃଷ୍ଟି କରିଛି । ପ୍ରକାଶ ଥାଉ କି ଏହି ଶ୍ରାବଣ ଛତୁକୁ ନେଇ ବିଭିନ୍ନ ଲୋକଙ୍କ ଭିନ୍ନ ଭିନ୍ନ ବିଶ୍ୱାସ ମଧ୍ୟ ରହିଛି ।
ଯେପରିକି କଳାହାଣ୍ଡି ଜିଲ୍ଲାରେ ଏହି ଛତୁ ଖାଇଲେ ମାମୁଁ ମରିଯା’ନ୍ତି କହି ଅଧିକାଂଶ ଲୋକ ଖାଆନ୍ତି ନାହିଁ ।ତେଣୁ ସେହି ଅଞ୍ଚଳରେ ଏହାର ଦର ଖୁବ୍ ଶସ୍ତା ହୋଇଥାଏ ।କଳାହାଣ୍ଡି ଜିଲ୍ଲାରେ ଭାଦ୍ରବ ମାସରେ ଏହି ଛତୁ ଫୁଟୁ ଥିବାରୁ ସେହି ଅଞ୍ଚଳରେ ଏହାକୁ “ଭଦୋ ଛତୁ” ବୋଲି କହି ଥା’ନ୍ତି । କୋରାପୁଟ ଅଞ୍ଚଳରେ ଏହି ଛତୁ ଯଦି କାହାର ଘରର ଓଦା ମାଟି କାନ୍ଥରେ ବାହାରେ, ତେବେ ସେହି ପରିବାରରେ ଲୋକେ ଆସନ୍ନ ବିପଦ ବା ଅକାଳ ମୃତ୍ୟୁର ଆଶଙ୍କା କରିଥାନ୍ତି ।
ଅନ୍ୟ କେତେକଙ୍କ ମତରେ ଏହି ଛତୁ ଖାଇଲେ ପୂର୍ବରୁ ଛାଡ଼ି ଯାଇଥିବା ଯେ କୌଣସି ପୁରୁଣା ରୋଗ ପୁଣି ଥରେ ବାହାରିବା ଆଶଙ୍କା କରି ଖାଇ ନ ଥାନ୍ତି । ତେବେ ବୋରିଗୁମ୍ମା ସମେତ ଅବିଭକ୍ତ କୋରାପୁଟ ଜିଲ୍ଲାରେ ଏହି ଛତୁ ସର୍ବାଧିକ ଲୋକପ୍ରିୟ ଛତୁ ହିସାବ ରେ ଚଢ଼ା ଦରରେ ବିକ୍ରୀ ହୋଇଥାଏ । ପ୍ରଚୁର ପରିମାଣରେ ବଜାରକୁ ଆସିଲେ କିଲୋ ପିଛା ୫୦୦ ଟଙ୍କାରେ ମଧ୍ୟ ମିଳିଥାଏ ।
