ନୟାଗଡ, (୦୩/୦୭) :ଆପ୍ର. : ବନ୍ଧୁକ ମୁନରେ ଜେମାଦେଇପୁର ଇଣ୍ଡିଆନ୍ ବ୍ଯାଙ୍କରୁ ଡକାୟତି । ୭ ଜଣ ଦୁର୍ବୃତ୍ତ ବ୍ଯାଙ୍କରେ ପଶି ବନ୍ଧୁକ ଦେଖାଇ ସୁନା ଓ ଟଙ୍କା ଡକାୟତି କରିଛନ୍ତି ।
୨୦ଲକ୍ଷରୁ ଅଧିକ ଟଙ୍କା ଓ ଗ୍ରାହକଙ୍କଠାରୁ ସୁନା ଅଳଙ୍କାର ଲୁଟ୍ ହୋଇଛି । ସଦରଥାନା ପୋଲିସ ବ୍ୟାଙ୍କ ଯାଇ ତଦନ୍ତ ଚଳାଇଛନ୍ତି । ଅପରାହ୍ନ ୪ ଟା ସମୟରେ ବ୍ୟାଙ୍କ ବନ୍ଦ ହେବାକୁ ଯାଉଥିଲା । ବ୍ୟାଙ୍କରେ ୨ ଜଣ ମହିଳା ଗ୍ରାହକ ଥିଲେ । ଗ୍ରାହକ ବେଶରେ ୪ ଟି ବାଇକରେ ୭ ଜଣ ଡକାୟତ ବ୍ୟାଙ୍କରେ ପଂହଁଚି ଥିଲେ । ଅଚାନକ ବ୍ୟାଙ୍କରେ ପଶି ବନ୍ଧୁକ ଓ ଠେଙ୍ଗାରେ ବ୍ୟାଙ୍କ କର୍ମଚାରୀଙ୍କୁ ଆକ୍ରମଣ କରିଥିଲେ ।
କର୍ମଚାରୀଙ୍କୁ ରକ୍ତାତ କରି ଟଙ୍କା ସୁନା ନେଇଯାଇଥିଲେ । ଜଣେ ମହିଳା ଗ୍ରାହକ ଠାରୁ ୨୦ ହଜାର ଟଙ୍କା ଓ ଜଣେ ମହିଳାଙ୍କ ଠାରୁ ସୁନା ଚେନ ନେଇ ଯାଇଥିଲେ । ଡକାୟତ ମାଡରେ ବ୍ୟାଙ୍କ ପିଅନ ଓ ବଣିଆଙ୍କ ମୁଣ୍ଡରେ ଗଭୀର ଆଘାତ ଲାଗିଛି । ଖବର ପାଇ ସଦରଥାନା ପୋଲିସ ବ୍ୟାଙ୍କକୁ ଆସି ସିସିଟିଭି ଯାଞ୍ଚ କରିଛି । ପୋଲିସ ବିଭିନ୍ନ ସ୍ଥାନରେ ଚଢ଼ାଉ କରି ୨ ଡକାୟତକୁ ଅଟକ ରଖିଥିବା ବିଶେଷ ସୂତ୍ରରୁ ଖବର ମିଳିଛି ।
