ରିପୋର୍ଟ : ଓଡିଶା ନ୍ୟୁଜ ୨୪ ବ୍ୟୁରୋ //
ଭୁବନେଶ୍ୱର, (୨୨/୦୨) : ଭାରତୀୟ ଛାତ୍ରଛାତ୍ରୀଙ୍କ ବିଦେଶରେ ଡାକ୍ତରୀ ପାଠପଢ଼ାକୁ ନେଇ ବଡ଼ ରାୟ ଦେଇଛନ୍ତି ସୁପ୍ରିମକୋର୍ଟ ।
ବିଦେଶରେ ଡାକ୍ତରୀ ପଢ଼ିବାକୁ ହେଲେ ପ୍ରଥମେ ନ୍ୟାସନାଲ ଏଲିଜିବିଲିଟି କମ ଏଣ୍ଟ୍ରାନ୍ସ ଟେଷ୍ଟ (ନିଟ୍- ୟୁଜି) ପାସ କରିବା ବାଧ୍ୟତାମୂଳକ ହେବ। ଏନେଇ ମେଡିକାଲ କାଉନସିଲ ଅଫ ଇଣ୍ଡିଆର (ଏମସିଆଇ) ସପକ୍ଷରେ ସୁପ୍ରିମକୋର୍ଟ ରାୟ ଶୁଣାଇଛନ୍ତି । ବିଦେଶରେ ଡାକ୍ତରୀ ପାଠପଢ଼ାକୁ ନେଇ ୨୦୧୮ରେ ଏମସିଆଇ ଏକ ନିୟମ ଜାରି କରିଥିଲେ। ଏଥି ନିମନ୍ତେ ଛାତ୍ରଛାତ୍ରୀଙ୍କ ନିଟ୍-ୟୁଜି ଯୋଗ୍ୟତା ଜରୁରୀ ବୋଲି ଏମସିଆଇ କର୍ତ୍ତୃପକ୍ଷ ନିୟମ କରିଥିଲେ। ଏହାକୁ ବିରୋଧ କରି ଅନେକ ଛାତ୍ରଛାତ୍ରୀ ସୁପ୍ରିମକୋର୍ଟରେ ଆବେଦନ କରିଥିଲେ।
ସୁପ୍ରିମକୋର୍ଟରେ ବିଚାରପତି ବି.ଆର. ଗଭାଇ ଏବଂ କେ. ବିନୋଦ ଚନ୍ଦ୍ରନଙ୍କ ଖଣ୍ଡପୀଠ ଏହି ଆବେଦନର ଶୁଣାଣି କରିଥିଲେ। ସୁପ୍ରିମକୋର୍ଟ ନିଜ ନିଷ୍ପତ୍ତିରେ କହିଛନ୍ତି ଯେ ଏମସିଆଇ ଜାରି କରିଥିବା ଏହି ନିୟମ ନିରପେକ୍ଷ, ସ୍ୱଚ୍ଛ ଏବଂ ଏହା କୌଣସି ପ୍ରକାରର ଆଇନଗତ ଜଟିଳତା ସୃଷ୍ଟି କରିବ ନାହିଁ । ୨୦୧୮ ମସିହା ପରଠୁ ବିଦେଶରେ ଡାକ୍ତରୀ ପଢ଼ି ଭାରତରେ ଡାକ୍ତରୀ ଚାକିରୀ କରିବାକୁ ଚାହୁଁଥିବା ଛାତ୍ରଛାତ୍ରୀଙ୍କ କ୍ଷେତ୍ରରେ ଏହା ବାଧ୍ୟତାମୂଳକ ହେବ। କିନ୍ତୁ ବିଦେଶରେ ଡାକ୍ତର ଚାକିରି କଲେ ଏହି ନିୟମ ଲାଗୁହେବ ନାହିଁ ବୋଲି ସୁପ୍ରିମକୋର୍ଟ ସ୍ପଷ୍ଟ କରିଛନ୍ତି।
