ସୁବର୍ଣ୍ଣପୁର (୨୬/୦୩ – ଆ.ପ୍ର): ସୁବର୍ଣ୍ଣପୁର ଜିଲ୍ଲା ଉଲୁଣ୍ଡା ଥାନା ଅନ୍ତର୍ଗତ ସୋନପୁର – ସମ୍ବଲପୁର ମୁଖ୍ୟ ରାସ୍ତା ମାଟୁପାଲି (ଠାକୁରପଡା) ଛକ ନିକଟରେ ଆଜି ସନ୍ଧ୍ୟାରେ ଭାରସାମ୍ୟ ହରାଇ ବିଦ୍ୟୁତ ବିଭାଗ ତଥା ଟିପିଡବ୍ଲୁଓଡିଏଲ ଅଧିନସ୍ଥ ଏକ ବୋଲେରୋକୁ ଧକ୍କା ଦେଇଛି ହାଇୱା ।
ଦୁର୍ଘଟଣାରେ ବିଦ୍ୟୁତ ବିଭାଗର କର୍ମଚରୀଙ୍କ ସମେତ ୩ ଜଣଙ୍କ ମୃତ୍ୟୁ ଘଟିଥିବା ଜଣାପଡ଼ିଛି । ଏଥିସହ ହାଇୱାର ଚାଳକ ଏବଂ ହେଲପର ଗୁରୁତର ଆହତ ହୋଇଛନ୍ତି । ମୃତକ ମାନେ ଉଲୁଣ୍ଡା ଥାନା ଗୌଡଗାଁ ଗ୍ରାମର ସ୍ୱର୍ଗତ ବେଟିଖାଇ ପୁରୋହିତଙ୍କ ପୁଅ ଆର୍ତତ୍ରାଣ ପୁରୋହିତ (୪୦), ସ୍ୱର୍ଗତ ଅର୍ଜୁନ ପାତ୍ରଙ୍କ ପୁଅ ପପୁନ ଓରଫ ସଂଜିବ ପାତ୍ର (୪୦) ଏବଂ ବୀରମହାରାଜପୁର ଥାନା ନାଏକପଡା ଗ୍ରାମର ସୁଶୀଲ ନାଏକ (୨୮) ବୋଲି ଜଣାପଡିଛି । ଅନ୍ୟପଟେ ଗୁରୁତର ଆହତ ଥିବା ହାଇୱା ଚାଳକ ଓ ହେଲପରଙ୍କ ପରିଚୟ ମିଳି ପାରିନାହିଁ ।
ସୂଚନା ଅନୁଯାୟୀ ଆଜି ସନ୍ଧ୍ୟାରେ ସିଣ୍ଢୋଲ ଅଂଚଳରୁ ବିଦ୍ୟୁତ ବିଲ ଟଙ୍କା ସଙ୍ଗ୍ରହ କରି ବୋଲେରୋରେ ଉଲୁଣ୍ଡା ଫେରୁଥିବା ବେଳେ ସାମ୍ନାରୁ ଦୃତଗତିରେ ଯାଉଥିବା ଏକ ହାଇୱା ଭାରସାମ୍ୟ ହରାଇ ବୋଲେରୋକୁ ଧକ୍କା ଦେବା ସହିତ ରାସ୍ତା ପାର୍ଶ୍ଵରେ ଏକ ଗଛରେ ବାଡେଇ ଦେଇଥିଲା । ଦୁର୍ଘଟଣା ଫଳରେ ଉଭୟ ବୋଲେରୋ ଏବଂ ହାଇୱା ରାସ୍ତା ଉପରେ ଓଲଟି ପଡିଥିଲା । ବୋଲେରୋ ଚାଳକ ସୁଶୀଲଙ୍କ ଘଟଣାସ୍ଥଳରେ ମୃତ୍ୟୁ ଘଟିଥିବା ବେଳେ ପପୁନକୁ ଉଲୁଣ୍ଡା ଡାକ୍ତରଖାନା ଏବଂ ଆର୍ତତ୍ରାଣଙ୍କୁ ସୁବର୍ଣ୍ଣପୁର ଜିଲା ମୁଖ୍ୟ ଚିକିତ୍ସାଳୟରେ ଡାକ୍ତର ମୃତ ଘୋଷଣା କରିଥିଲେ ।
ସେହିପରି ହାଇୱା ଚାଳକ ଏବଂ ହେଲପରଙ୍କ ସ୍ୱାସ୍ଥ୍ୟବସ୍ଥା ଅତି ଗୁରୁତର ରହିଥିବା ବେଳେ ଜିଲା ମୁଖ୍ୟ ଚିକିତ୍ସାଳୟରେ ଚିକିତ୍ସା ଜାରି ରହିଛି । ଉଲୁଣ୍ଡା ପୁଲିସ ଘଟଣାସ୍ଥଳରେ ପହଞ୍ଚି ଦୁର୍ଘଟଣାଗ୍ରସ୍ତ ବୋଲେରୋ ଏବଂ ହାଇୱା ଜବତ କରିବା ସହିତ ତଦନ୍ତ ଜାରି ରଖିଛି । ଆସନ୍ତାକାଲି ଶବ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ଶବ ହସ୍ତାନ୍ତର କରାଯିବ ବୋଲି ଜଣାପଡିଛି ।
