ସୁବର୍ଣ୍ଣପୁର, (୦୭/୦୬) : ଆ.ପ୍ର : କୋଶଲ ସାହିତ୍ୟ ସଂସ୍କୃତି ଏକାଡେମୀ ଏବଂ ସୁବର୍ଣ୍ଣପୁର ବୁଣାକାର ଉନ୍ନୟନ ସଂଘ ତରଫରୁ ଆଜି ସ୍ଥାନୀୟ ସର୍କିଟ ହାଉସରେ ମାନ୍ୟବର ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ଦୁଇଟି ସ୍ମାରକପତ୍ର ପ୍ରଦାନ କରାଯାଇଛି ।
ସ୍ମାରକ ପତ୍ର କୋଶଲ ସାହିତ୍ୟ ସଂସ୍କୃତି ଏକାଡେମୀର ସାଧାରଣ ସଂପାଦକ ତଥା ସୁବର୍ଣ୍ଣପୁର ବୁଣାକାର ଉନ୍ନୟନ ସଂଘର ପୂର୍ବତନ ସଭାପତି ଗୋରେଖନାଥ ସାହୁ ପ୍ରଦାନ କରିଥିଲେ । ଉକ୍ତ ସ୍ମାରକ ପତ୍ରରେ କୋଶଲି/ସମ୍ବଲପୁରୀ ଭାଷାକୁ ସାମ୍ବିଧାନିକ ମାନ୍ୟତା ଦେବା ସଙ୍ଗେ ସଙ୍ଗେ ପ୍ରାଥମିକ ସ୍ତରରେ ପଶ୍ଚିମ ଓଡିଶାର ଶିଶୁମାନଙ୍କୁ ସେମାନଙ୍କ ମାତୃଭାଷା କୋଶଲି/ସମ୍ବଲପୁରୀ ଭାଷାରେ ଶିକ୍ଷାଦାନ ପାଇଁ ପଶ୍ଚିମ ଓଡିଶାବାସୀଙ୍କ ତରଫରୁ ଦାବୀ କରାଯାଇଛି । ଉକ୍ତ ସ୍ମାରକ ପତ୍ରରେ ସୂଚନା ଦିଆଯାଇଛି ଯେ ପଶ୍ଚିମ ଓଡିଶାର ଶିଶୁମାନଙ୍କୁ ସେମାନଙ୍କ ମାତୃଭାଷାରେ ଶିକ୍ଷା ଦିଆ ନ ଯିବା ଦ୍ବାରା ସେମାନଙ୍କ ବୌଦ୍ଧିକ ବିକାଶ ବ୍ୟାହତ ହେଉଛି ଏବଂ ଏହି ଅଞ୍ଚଳରେ ଅପାଠୁଆ ଓ ଅଧାରୁ ପାଠ ଛାଡୁଥିବା ଛାତ୍ରଛାତ୍ରୀଙ୍କ ସଂଖ୍ୟା ଦିନକୁ ଦିନ ବୃଦ୍ଧି ପାଇବାରେ ଲାଗିଛି ।
୨୦୨୦ ଶିକ୍ଷାନୀତି ମତେ ପ୍ରାଥମିକ ସ୍ତରରେ ଶିଶୁମାନଙ୍କୁ ମାତୃଭାଷାରେ ଶିକ୍ଷାଦାନ ବାଧ୍ୟତାମୂଳକ ବୋଲି ସରକାରଙ୍କୁ ସ୍ମରଣ କରାଇ ଦିଆଯାଇଛି । ଅପରପକ୍ଷରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହା ସୁବର୍ଣ୍ଣପୁର ଠାରେ ତାଙ୍କ ନିର୍ବାଚନୀ ସଭାରେ ବିଜେପିର ଡବଲ ଇଂଜିନ ସରକାର କ୍ଷମତାକୁ ଆସିଲେ ସୁବର୍ଣ୍ଣପୁର ଠାରେ ଏକ ବୟନ ଶିଳ୍ପ କାରଖାନା ପ୍ରତିଷ୍ଠା ପାଇଁ ଯେଉଁ ପ୍ରତିଶ୍ରୃତି ଦେଇଥିଲେ ତାହା ଶୀଘ୍ର କାର୍ଯ୍ୟକାରୀ କରିବାକୁ ବୁଣାକାର ଉନ୍ନୟନ ସଂଘ ତରଫରୁ ନିବେଦନ କରାଯାଇଛି । ଏହି ଅବସରରେ ସୁବର୍ଣ୍ଣପୁର ସଂପର୍କୀତ ସ୍ବ ରଚିତ କେତୋଟି ପୁସ୍ତକ ଶ୍ରୀ ସାହୁ ମୁଖ୍ୟମନ୍ତ୍ରୀଙ୍କୁ ଉପହାର ଦେଇଥିଲେ ଯାହା ଦେଖି ମୁଖ୍ୟମନ୍ତ୍ରୀ ମହୋଦୟ ଆନନ୍ଦ ପ୍ରକାଶ କରିଥିଲେ ।
