ରିପୋର୍ଟ : ଭଗବାନ ମହାନ୍ତି
ମୁରିବାହାଲ, (୦୬/୦୨) : ମୁରିବାହାଲ ବ୍ଲକ ସଦର ମହକୁମା ପଞ୍ଚାୟତି ଉଚ୍ଚ ବିଦ୍ୟାଳୟରେ ଛାତ୍ର ପୋଲିସ କେଡେଟ୍ ର ଶୁଭାରମ୍ଭ କାର୍ଯ୍ୟକ୍ରମ ଗୁରୁବାର ଅନୁଷ୍ଠିତ ହୋଇଯାଇଛି ।
ପଞ୍ଚାୟତି ଉଚ୍ଚ ବିଦ୍ୟାଳୟ ପ୍ରଧାନଶିକ୍ଷକ ସୁନୀଲ କୁମାର ପାତ୍ରଙ୍କ ସଭାପତିତ୍ବରେ ଅନୁଷ୍ଠିତ ଏହି କାର୍ଯ୍ୟକ୍ରମ ରେ ମୁରିବାହାଲ ଥାନା ଆଇଆଇସି ସିପୋରା ସରାୟ ଲୁଗୁନ ମୁଖ୍ୟ ଅତିଥି ରୂପେ ଯୋଗଦେଇ ଏହାକୁ ଉଦଘାଟନ କରିଥିଲେ । ମୁରିବାହାଲ ଗୋଷ୍ଠୀ ଶିକ୍ଷା ଅଧିକାରୀ ଶାନ୍ତନୁ କୁମାର ପଢ଼ିହାରୀ,ସଦର ସରପଞ୍ଚ ବିଶ୍ବବିହାରୀ ଯୋଷୀ, ପୋଲିସ କନେଷ୍ଟବଳ ସୁଦାମ ନାଗ ଓ ଓଏପିଏପିଏଫ ଉଙ୍ଗା ମାଡ଼କାମୀ ସମ୍ମାନିତ ଅତିଥି ରୂପେ ଯୋଗଦେଇ ମତବ୍ୟକ୍ତ କରିଥିଲେ । ଛାତ୍ରଛାତ୍ରୀ ପ୍ରଥମେ ନିଜେ କିପରି ଶୃଙ୍ଖଳିତ ହେବା ସଙ୍ଗେସଙ୍ଗେ ଜନସାଧାରଣଙ୍କୁ କିଭଳି ଶୃଙ୍ଖଳିତ କରାଯାଇପାରିବ, ନିୟମ ମାନି ଚଳିବା,ନିଜେ କୌଣସି ଅପରାଧ ନ କରିବା ତଥା ଲୋକଙ୍କୁ କୌଣସି ଅପରାଧ ନ କରିବାକୁ ବୁଝାଇବା ଉପରେ ଅତିଥିମାନେ ନିଜ ବକ୍ତବ୍ୟରେ ଗୁରୁତ୍ବ ପ୍ରଦାନ କରିଥିଲେ ।
ଛାତ୍ର ପୋଲିସ କେଡେଟରେ ସାମିଲ ହୋଇଥିବା ଉଚ୍ଚ ବିଦ୍ୟାଳୟର ସମସ୍ତ ୪୪ଜଣ ଛାତ୍ରଛାତ୍ରୀ ମୁରିବାହାଲ ପୋଲିସ ଥାନା ମଧ୍ୟ ପରିଦର୍ଶନ ପାଇଁ ଯାଇ ପୋଲିସର ବିଭିନ୍ନ କାର୍ଯ୍ୟଧାରା ସମ୍ପର୍କରେ ପଚାରି ବୁଝିଥିଲେ।ଏଥିରେ ଥାନାର ସମସ୍ତ କର୍ମଚାରୀମାନେ ସହଯୋଗ କରିଥିଲେ।ଏ ସମ୍ପର୍କରେ ଥାନା ଆଇଆଇସି ଶ୍ରୀମତୀ ଲୁଗୁନଙ୍କୁ ପଚାରିବାରୁ ପ୍ରଥମ ଥର ପାଇଁ ଗଠିତ ଏହି କେଡେଟରେ ସାମିଲ ସ୍ୱେଚ୍ଛାସେବୀମାନଙ୍କ ପାଇଁ ଅଲଗା ୟୁନିଫର୍ମ ସହ ସେମାନେ ବିଭିନ୍ନ ସମୟରେ ପୁଲିସକୁ ସହଯୋଗ କରିବେ ବୋଲି ପ୍ରକାଶ କରିଥିଲେ।ଏହି କାର୍ଯ୍ୟକ୍ରମରେ ଉଚ୍ଚ ବିଦ୍ୟାଳୟ ସହକାରୀ ଶିକ୍ଷକ ଚନ୍ଦ୍ରଧ୍ଵଜ ଭୋଇ, ହେମନ୍ତ ନାଗ,ରଶ୍ମିଲତା ପାତ୍ର, ଦିପ୍ତିମୟୀ ଲେଙ୍କା, ଓ ଅନ୍ଯ କର୍ମଚାରୀ ସହଯୋଗ କରିଥିଲେ । ଉଚ୍ଚ ବିଦ୍ୟାଳୟ କ୍ରୀଡା ଶିକ୍ଷକ ତଥା ଏସପିସି ଇନଚାର୍ଜ ନୀତେଶ କୁମାର ତାଣ୍ଡି ଧନ୍ୟବାଦ ଦେଇଥିଲେ ।
