ରିପୋର୍ଟ : ଓଡିଶା ନ୍ୟୁଜ ୨୪ ବ୍ୟୁରୋ //
ପିପିଲି, (୨୮/୦୨) : ଯୌତୁକ ଜୁଇରେ ବଳି ପଡ଼ିଲା ଆଉ ଜଣେ । ବାହାଘରର ୧୬ ବର୍ଷ ପରେ ମୃତ୍ୟୁ । ଗତକାଲି ଜାଗର ଥିଲା ସମସ୍ତେ ଶିବଙ୍କୁ ଆରଧାନା କରିବାକୁ ମନ୍ଦିର ଚାଲିଯାଇଥିଲେ ।
କିନ୍ତୁ ଘରକୁ ଫେରି ଯେତେବେଳେ ବୋହୂ ନାହିଁ । ବହୁ ଖୋଜାଖୋଜି କରିଥିଲେ ହେଲେ ପାଇନଥିଲେ । ଲୋକେ ସକାଳୁ ସକାଳୁ ମନୋରମାକୁ ଏପରି ଅବସ୍ଥାରେ ଦେଖିବାକୁ ପାଇଥିଲେ । ଗଛରେ ଶିଡ଼ି ଲାଗିଥିବା ବେଳେ ମନୋରମା ସେହିଠାରେ ହିଁ ଥିଲେ । ମନୋରମାଙ୍କ ମରଶରୀର ବାଡ଼ି ପଛପଟେ ଥିବା ଓଉ ଗଛରୁ ଉଦ୍ଧାର ହୋଇଛି । ସଙ୍ଗେ ସଙ୍ଗେ ପୋଲିସକୁ ଖବର ଦିଆଯାଇଥିଲା । ମନୋରମାଙ୍କ ପରିବାର ଲୋକେ ପହଞ୍ଚିବା ପରେ ଝିଅକୁ ହତ୍ୟା କରାଯାଇଛି ବୋଲି ଅଭିଯୋଗ କରିଛନ୍ତି ।
ମନୋରମାଙ୍କ ପରିବାର ଲୋକେ ସତ୍ୟବାଦୀ ଥାନାରେ ଝିଅକୁ ମାରି ଦିଆଯାଇଥିବା ନେଇ ବାପା ତ୍ରିଲୋଚନ ମୁଦୁଲି ଏତଲା ଦେଇଛନ୍ତି । ଏତଲାରେ ଦର୍ଶାଇଛନ୍ତି ଯେ ବାଟିଗୋରଡ଼ାର ପ୍ରମୋଦ କୁମାର ପରିଡ଼ାଙ୍କ ସହ ମନୋରମାଙ୍କର ବାହାଘର ହୋଇଥିଲା । ତେବେ ଶାଶୁଘର ଲୋକଙ୍କ ଦାବି ମୁତାବକ ବାହାଘର ବେଳେ ଆବଶ୍ୟକ ଯୌତୁକ ଦିଆଯାଇଥିଲା । ହେଲେ ଏସବୁ ପରେ ବି ଅଧିକ ଯୌତୁକ ଦାବି କରି ତାଙ୍କୁ ନିର୍ଯାତନା ଦିଆ ଯାଉଥିଲା । ବାରମ୍ବାର ମନୋରମାଙ୍କ ପରିବାରରେ କଳି ଝଗଡ଼ା ହେଉଥିଲା । ପରେ ମନୋରମାଙ୍କୁ ବୁଝା ସୁଝା କରୁଥିଲେ ଝଗଡ଼ାର ସମାଧାନ ହେଇଯାଉଥିଲା । କିନ୍ତୁ ଏଥର ଆଉ ସମାଧାନ ହେଲାନି ସବୁଦିନ ପାଇଁ ଆଖି ବୁଜିଦେଲେ ମନୋରମା ।
ତେବେ ଏ ନେଇ ମନୋରମାଙ୍କ ଶାଶୁଘର ଲୋକଙ୍କ ପ୍ରତିକ୍ରିୟା ମିଳି ନାହିଁ । ପୋଲିସ୍ ମଧ୍ୟ କିଛି କହୁ ନାହିଁ । ତେଣୁ ପୋଲିସ ଘଟଣାକୁ ଚାପି ଦେବାକୁ ଚେଷ୍ଟା କରି ପାରେ ବୋଲି ଗ୍ରାମବାସୀ ଚର୍ଚ୍ଚା କରୁଛନ୍ତି । କାରଣ ସ୍ବାମୀ ପ୍ରମୋଦ ଫେରାର ଥିବା କୁହାଯାଉଛି । ତେବେ ସଠିକ୍ ତଦନ୍ତ ପରେ ମନୋରମାଙ୍କ ମୃତ୍ୟୁର କାରଣ ସ୍ପଷ୍ଟ ହେବ ।
