ରିପୋର୍ଟ : ଓଡିଶା ନ୍ୟୁଜ ୨୪ ବ୍ୟୁରୋ //
ଭୁବନେଶ୍ୱର, (୦୨/୦୩) : ମାର୍ଚ୍ଚ ମାସ ଆରମ୍ଭରୁ କଲବଲ କଲାଣି ତାତି । ଜନଜୀବନ ହନ୍ତସନ୍ତ ହୋଇପଡ଼ିଲେଣି । ଗରମ ସହ ଗୁଳୁଗୁଳି ଅସହ୍ୟ ଅନୁଭୂତ ହେଉଛି ।
ଗତକାଲି ତାପମାତ୍ରା ଟିଟିଲାଗଡ଼ରେ ୩୮.୫ ଡିଗ୍ରୀ ସେଲସିଅସ ରେକର୍ଡ କରାଯାଇଛି । ଯଦି ବର୍ତ୍ତମାନରୁ ସ୍ଥିତି ଏମିତି , ଆଗାମୀ ମାସରେ ସ୍ଥିତି କ’ଣ ହେବ ଭାବିଲେ ଭୟ ଲାଗୁଛି । ଗତକାଲି ରାଜ୍ୟର ୧୧ ସହରର ତାପମାତ୍ରା ୩୭ ଡିଗ୍ରୀ ଉପରେ ରହିଛି। ୩୮.୫ ଡିଗ୍ରୀ ସହ ଟିଟିଲାଗଡ଼ ସବୁଠୁ ଉତ୍ତପ୍ତ ସହର ପାଲଟିଛି। ଝାରସୁଗୁଡ଼ା ୩୮.୨ଡିଗ୍ରୀ , ବଲାଙ୍ଗିର ୩୮ ଡିଗ୍ରୀ , ସୋନପୁର ଓ ଅନୁଗୁଳ ୩୭.୭ଡିଗ୍ରୀ, ସମ୍ବଲପୁର ୩୭.୬, ସୁନ୍ଦରଗଡ଼ ୩୭.୫, ଭବାନୀପାଟଣା ୩୭.୨,ହୀରାକୁଦ ୩୭.୧, ବୌଦ୍ଧ ଓ ବାରିପଦା ତାପମାତ୍ରା ୩୭ ଡିଗ୍ରୀ ରେକର୍ଡ କରାଯାଇଛି । ଅଧିକାଂଶ ସ୍ଥାନରେ ତାପମାତ୍ରା ସ୍ୱାଭାବିକ ଠାରୁ ଅଧିକ ରହୁଛି । ଯାହା ମାର୍ଚ୍ଚ ମାସ ଆରମ୍ଭରୁ ଗ୍ରୀଷ୍ମ ଲହରୀ ସୃଷ୍ଟି କରୁଛି । ମାର୍ଚ୍ଚ ମାସରୁ ଏତେ ତାତି ଦେଖି ରାଜ୍ୟବାସୀଙ୍କ ଚିନ୍ତା ବଢ଼ିଯାଇଛି। ଲୋକମାନଙ୍କୁ ସଚେତନ ରହିବା ପାଇଁ ମଧ୍ୟ ସତର୍କ ସୂଚନା ଦିଆଯାଇଛି ।
