ପଦ୍ମପୁର, (୧୩/୫) : ଆପ୍ର. : ପଦ୍ମପୁର ବ୍ଲକ, ଜାତିଲି ପଞ୍ଚାୟତ ଅନ୍ତର୍ଗତ ଅଞ୍ଜଳି ଗ୍ରାମ ମୈାଳିକ ସମସ୍ୟା ଭିତରେ ଛନ୍ଦି ହୋଇପଡିଥିବା ଦେଖିବାକୁ ମିଳିଛି ।
ଦୀର୍ଘ ୫୦ ବର୍ଷ ହେଲା ଉକ୍ତ ଗ୍ରାମକୁ ଯିବାକୁ ରାସ୍ତା ଟିକେ ହୋଇପାରିଲା ନାହିଁ । ସଉରା ରେଲା ମୂଖ୍ୟ ରାସ୍ତାରୁ ୩ କିଲୋମିଟର ଅଙ୍କାବଙ୍କା ପଥୁରିଆ ପାଦଚଲା ରାସ୍ତା ଦେଇ ଏହି ଗ୍ରାମକୁ ଯିବାକୁ ପଡ଼େ । ପ୍ରଶାସନର ଦୃଷ୍ଟି ଆଢ଼ୁଆଳରେ ଥିବା ଏହି ଅଞ୍ଜଳି ଗ୍ରାମରେ ୩୦ ପରିବାରର ୧୬୦ ରୁ ଉର୍ଦ୍ଧ ଲୋକ ବାସ କରନ୍ତି । ସବୁ ପ୍ରଶାସନିକ ଅଧିକାରୀ ଓ ରାଜନେତାଙ୍କ ଦ୍ଵାରସ୍ଥ ହେଲେ ମଧ୍ୟ ରାସ୍ତା ସମସ୍ୟାର ସମାଧାନ ହୋଇପାରୁନି ।
ବର୍ଷା ଦିନରେ ଗ୍ରାମଟି ବାହ୍ୟ ଜଗତରୁ ବିଛିନ୍ନ ହୋଇଯାଏ । ସ୍ବାସ୍ଥ୍ୟ ଖରାପ ହେଲେ ଦୀର୍ଘ ୩ କିଲୋମିଟର ବାଟ ରୋଗିକୁ ଖଟିଆରେ ବୋହି ମୁଖ୍ୟ ରାସ୍ତା ନିକଟକୁ ନେବାକୁ ପଡେ । ସେଠାରୁ ୧୦୮ ଆମ୍ବୁଲାନ୍ସ ଯୋଗେ ସ୍ବାସ୍ଥ୍ୟକେନ୍ଦ୍ରକୁ ନିଆଯାଏ । ବର୍ଷା ହେଲେ ପିଲାଙ୍କ ପାଠପଢ଼ାରେ ଡୋରି ବନ୍ଧା ହୋଇଯାଏ । କାଦୁଅ ପଚପଚ ରାସ୍ତାରେ ପଡ଼ି ପିଲାମାନେ ସ୍କୁଲକୁ ଯାଇନପାରି ଘରେ ବସନ୍ତି । ବୁଢ଼ା ବୁଢୀ ମାନେ ଭତ୍ତା ପାଇବାରୁ ବଞ୍ଚିତ ହୋଇ ଭୋକ ଉପାସରେ ରହିବାକୁ ଵାଧ୍ୟ୍ୟ ହୁଅନ୍ତି । ଜଙ୍ଗଲ ଜାତ ଦ୍ରବ୍ଯ ସଂଗ୍ରହ ସହ ଚାଷବାସ କରି ଗୁଜୁରାଣ ମେଣ୍ଟାଉଥିବା ଏହି ଅଞ୍ଜଳି ଗ୍ରାମବାସୀ ରାସ୍ତା ଅପେକ୍ଷାରେ ଦିନ କାଟୁଛନ୍ତି ।
ଗ୍ରାମର ଅଙ୍ଗନୱାଡି କର୍ମୀ ଗିନି ଶଵର, ଆଶା ଦିଦି ସୁନେଇ ଶଵର ବର୍ଷାଦିନେ ଗର୍ଭବତୀ ମହିଳାଙ୍କୁ ସ୍ବାସ୍ଥ୍ୟସେବା ଯୋଗାଇ ପାରୁନଥିବା କହିଛନ୍ତି । ତୁରନ୍ତ ଅଞ୍ଜଳି ଗ୍ରାମକୁ ପକ୍କା ରାସ୍ତା ଯୋଗାଇ ନଦେଲେ ଆଗାମୀ ଦିନରେ ଆନ୍ଦୋଳନ କରାଯିବ ବୋଲିି ସହଦେବ ଶଵର, ଗାସାରୁ ଶଵର , ସୁମାନି ଶଵର ଚେତାବନୀ ଦେଇଛନ୍ତି । ତେବେ କେବେ ଏହି ନିରିହ ଆଦିବାସୀ ଙ୍କ ଗ୍ରାମକୁ ପ୍ରଶାସନ ରାସ୍ତା ନିର୍ମାଣ କରି ଏହି ଗ୍ରାମର ରାସ୍ତା ସମସ୍ୟା ଦୂର କରିବାକୁ ସମର୍ଥ ହେଉଛି ଦେଖିବାକୁ ବାକି ରହିଲା ।
