ଗୁଣପୁର : ୫/୪/୨୫ -ଆପ୍ର): ଗ୍ରୀଷ୍ମ ଆରମ୍ଭରୁ ଉପାନ୍ତ ଅଞ୍ଚଳରେ ଦେଖିବାକୁ ମିଳିଛି ଜଳ ସଙ୍କଟ । ଏପରି ଏକ ଗ୍ରାମ ହେଉଛି ରାୟଗଡ଼ା ଜିଲ୍ଲା ଗୁଣପୁର ବ୍ଲକ ଅନ୍ତର୍ଗତ ଶଗଡା ପଞ୍ଚାୟତର ରୁଙ୍ଗରୁଙ୍ଗବା । ସରକାରଙ୍କ ମାଳମାଳ ଯୋଜନା ଯେପରି ଏ ଅଞ୍ଚଳରେ ବାଟବଣା ହୋଇଯାଇଛି । ଏହି ଗ୍ରାମରେ ନା ଅଛି ନଳକୂପ , ନା ଅଛି କୂଅ , ନା ଅଛି ସୋଲାର ନଳକୂପ ।
ବର୍ଷସାରା ରୁଙ୍ଗରୁଙ୍ଗବା ଗ୍ରାମବାସୀଙ୍କ ଏକ ମାତ୍ର ଭରସା ପାହାଡି ଚୁଆ ପାଣି । ଯେଉଁଠି ଗାଈଗୋରୁ ଓ ମଣିଷ ଏକାଠି ପାଣି ପିଅନ୍ତି । ରୁଙ୍ଗରୁଙ୍ଗବା ଗ୍ରାମରେ ବାସ କରନ୍ତି ୪୫ ପରିବାରର ୨୭୦ ରୁ ଉର୍ଦ୍ଧ ଲୋକ । ପୂର୍ବ ବର୍ଷ କମ୍ ବର୍ଷା ଯୋଗୁଁ ବର୍ତ୍ତମାନ ଠାରୁ ପାହାଡି ଚୁଆ ଶୁଖି ଆସିଲାଣି । ବାରମ୍ବାର ପ୍ରଶାସନ ଓ ନେତା ମନ୍ତ୍ରୀ ଙ୍କୁ ଗୁହାରି କଲେ ମଧ୍ୟ କେହି ଶୁଣୁନଥିବା ଅଭିଯୋଗ କରିଛନ୍ତି ଗ୍ରାମବାସୀ । ଗ୍ରାମଠାରୁ ଦୀର୍ଘ ଏକ କିଲୋମିଟର ଦୂରରେ ଥିବା ପାହାଡିଆ ଜଳ ଉତ୍ସର ପାଣିକୁ ଏକାଠି କରି ପାଇପ୍ ଯୋଗେ ଗ୍ରାମ ନିକଟକୁ ଆଣି ବ୍ୟବହାର କରୁଥିଲେ କିନ୍ତୁ ବର୍ତ୍ତମାନ ତାହା ଶୁଖିବାକୁ ବସିଲାଣି ।
ଆଗକୁ ଗ୍ରୀଷ୍ମ ଋତୁର ପ୍ରଚଣ୍ଡ ରୌଦ୍ରତାପରେ ବିନା ପିଇବା ପାଣିରେ ଗ୍ରାମବାସୀ କିପରି ଚଳିଵେ ଏବେଠାରୁ ଭାଳେଣୀ ପଡ଼ିଲାଣି । ବାରମ୍ବାର ଅଭିଯୋଗ ପରେ ଦୀର୍ଘ ୫ ବର୍ଷ ତଳେ ପ୍ରଶାସନ ତରଫରୁ ଏକ ସୋଲାର ନଳକୂପର ବ୍ୟବସ୍ଥା କରାଯାଇଥିଲା । କିନ୍ତୁ ବର୍ଷକ ପରେ ମଟର ଟି ଵୋର ଗର୍ତ୍ତ ଭିତରେ ଛିଡି ପଡ଼ିଥିବାରୁ ଦୀର୍ଘ ୪ ବର୍ଷ ହେଲା ତାହା ଅଚଳ ହୋଇ ପଡିଛି । ତେଣୁ ପ୍ରଶାସନ ତୁରନ୍ତ ରୁଙ୍ଗରୁଙ୍ଗବା ଗ୍ରାମରେ ପିଇବା ପାଣିର ବ୍ୟବସ୍ଥା ନ କଲେ ଗ୍ରାମବାସୀ ରାଜରାସ୍ତାକୁ ଓହ୍ଲାଇବାକୁ ଧମକ ଦେଇଛନ୍ତି । ତେବେ ପ୍ରଶାସନ ରୁଙ୍ଗରୁଙ୍ଗବା ଗ୍ରାମବାସୀଙ୍କ ଜଳସଙ୍କଟର ସମାଧାନ କେବେ କରୁଛି ଦେଖିବାକୁ ବାକି ରହିଲା ।
