ରିପୋର୍ଟ : ବିରଞ୍ଚି ପ୍ରସାଦ ଶତପଥୀ
ଗୁଣପୁର, (୩୧/୧୨) : ଆଜି ଅଖିଲ ଭାରତ କୃଷକ ମହାସଭା (AIKM) ତରଫରୁ ଗୁଣପୁର ବାଇପାସ୍ ଛକ ଠାରୁ ଏକ ଶୋଭାଯାତ୍ରା ବାହାରି ଗୁଣପୁର ଉପଜିଲ୍ଲାପାଳଙ୍କ କାର୍ଯ୍ଯାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିବା ସହ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ୧୨ ଦଫା ଦାବି ନେଇ ଏକ ସ୍ମାରକପତ୍ର ପ୍ରଦାନ କରିଛନ୍ତି ।
ଋଣ ବୋଝ ଓ ଅତ୍ମହତ୍ୟା ଦୂର କରିବା ପାଇଁ ସମସ୍ତ ଚାଷୀମାନଙ୍କୁ କୃଷି ଋଣ ଛାଡ଼ କରିବା, ମଣ୍ଡିରେ କଟଣି – ଛଟନି ବନ୍ଦ କରି ଚାଷୀମାନଙ୍କ ଠାରୁ ଧାନ ଓ କପା କିଣିବାର ସୁ-ବ୍ୟବସ୍ଥା କରିବା, ବିନା ଲାଇସେନସ୍ରେ ନିମ୍ନ ମାନର କୀଟନାଶକ ଔଷଧ, ସାର ବିକ୍ରି କରୁଥିବା ଦୋକାନିକୁ ଉଚିତ ଦଣ୍ଡ ଦେଇ ପ୍ରକୃତ କୀଟନାଶକ ଔଷଧ ଚାଷୀମାନଙ୍କୁ ଯୋଗାଇବା, ଭାଗଚାଷୀ ମାନଙ୍କୁ ଚାଷୀର ମାନ୍ୟତା ସହ ବର୍ଷାରେ କ୍ଷତିଗ୍ରସ୍ତ ଭାଗ ଚାଷୀମାନଙ୍କୁ କ୍ଷତିପୂରଣ ଯୋଗାଇବା ଓ ଲଘୁଚାପ ଫଳରେ କ୍ଷତିଗ୍ରସ୍ତ ଚାଷୀମାନଙ୍କୁ ମୁଗ, ବିରି, ସୂର୍ଯ୍ୟମୂଖୀ, ଚଣା ଇତ୍ୟାଦି ବିହନ ପର୍ଯ୍ୟାପ୍ତ ପରିମାଣରେ ଯୋଗାଇଦେବା, କୃଷିଜାତ ଦ୍ରବ୍ୟ ଉପରେ ଜି.ଏସ୍.ଟି. ପ୍ରତ୍ୟାହାର କରିବା, ଲଘୁଚାପ ଫଳରେ ଧାନ ଓ କପାର ମାନ କୋହଳ କରିବା, ଲଘୁଚାପ ବର୍ଷା ଫଳରେ କ୍ଷତିଗ୍ରନ୍ଥ ଚାଷୀମାନଙ୍କୁ ଏକର ପିଛା ଟ.୫୦,୦୦୦/- ପ୍ରଦାନ କରିବା, ଓଡ଼ିଶାରେ ହେଉଥିବା ଲଘୁଚାପକୁ ପ୍ରାକୃତିକ ବିପର୍ଯ୍ୟୟ ଘୋଷଣା କରିବା ଇତ୍ୟାଦି ।
ଚାଷୀ ମାନଙ୍କ ବିଭିନ୍ନ ସମସ୍ୟା ଗୁଡିକ ରାଜ୍ୟ ସଭାପତି ଅନାସିମ ଶବର ଓଡିଶା ସରକାରଙ୍କ ଦୃଷ୍ଟି ଆକର୍ଷଣ କରିଥିଲେ ଓ ଜିଲ୍ଲା ସମ୍ପାଦକ ତ୍ରିପତି ଗମାଙ୍ଗ ଚାଷୀ ମାନଙ୍କ ସମସ୍ୟା ସମାଧାନ ନ ହେଲେ ତୀବ୍ର ଆନ୍ଦୋଳନ କରାଯିବ ବୋଲି ବକ୍ତବ୍ୟ ପ୍ରଦାନ କରିଥିଲେ । ଆଜିର ଏହି ପ୍ରତିବାଦ ସଭାରେ ମଦନ ଶବର (ସରପଞ୍ଚ ବାଗଶଳା ପଞ୍ଚାୟତ) ବୃନ୍ଦାବନ ବିଡିକା, ରମେଶ ବିଡିକା, କେଶବ ଶବର, କୃଷ୍ନ ଶବର, ଚିତ୍ରସେନ ଶବର, ମୋଜେସ ଶବର, କରୂଣାକର ଲିମା, ତାଉଡୁ ଶବର, ରାଜେନ୍ଦ୍ର ମାଝୀ ପ୍ରମୁଖ ସହଯୋଗ କରିଥିଲେ ।
